جويىلۋعا شاق قالعان قاياز بەن ءپىلماي ارالعا قايتا ورالدى - بالىقشى
قىزىلوردا. KAZINFORM - بالىقشى قىلىشبەك بايبوسىنوۆ ارال اۋدانىنداعى قامىستىباس بالىق پيتومنيگىندە قىرىق جىلعا جۋىق ۋاقىتتان بەرى ەڭبەك ەتىپ كەلەدى. بۇگىندە ول - مۇندا توعان بريگاديرى.
كاسىپورىن ارال اۋدانىنىڭ قوسجار ەلدى مەكەنىندە ورنالاسقان، قىزمەتىندەگى باستى باعىت - مەملەكەتتىك تاپسىرىس شەڭبەرىندە كىشى ارال تەڭىزىن، سىرداريا وزەنى مەن قامىستىباس كولىن قۇندى بالىق تۇرلەرىمەن تولتىرۋ.
قوسجاردان بولەك، قاراتەرەڭ اۋىل وكرۋگىنە قاراستى تاستاق ەلدى مەكەنىندە بولىمشەسى بار.
توعان بريگاديرىنىڭ ايتۋىنشا، پيتومنيك جۇمىسشىلارى جىلىنا 50 ميلليونعا جۋىق دەرناسىل، 12 ميلليونداي ءبىر جازدىق جانە 420 مىڭداي ەكى جازدىق قۇندى بالىق تۇرلەرىن، ونىڭ ىشىندە تۇقى، ءدوڭماڭداي، اق امۋردى ءوسىرىپ، سۋ ايدىندارىنا جىبەرەدى.
- ءوزىم وسىرگەن سۋ مارجاندارىنىڭ اراسىنان ەڭ كىرپياز، نازىك بالىق دەپ ءدوڭماڭدايدى ايتار ەدىم. ويتكەنى ول كوپ كۇتىمدى قاجەت ەتەدى. باسقا بالىقتارعا قاراعاندا قاتتى ىستىققا ءتوزىمسىز. بالىق شارۋاشىلىعى - قيىندىعى مول كاسىپ، ەشقانداي قاتەلەسۋگە بولمايدى. سەبەبى سەنىڭ ءبىر عانا قاتەلىگىڭ ميلليونداعان بالىقتىڭ ومىرىنە قاۋىپ ءتوندىرۋى مۇمكىن. سوندىقتان كۇن مەن ءتۇندى ەلەمەي، بار ۋاقىتىڭدى، نازارىڭدى تەك جۇمىسقا اۋدارۋىڭا تۋرا كەلەدى، - دەدى قىلىشبەك بايبوسىنوۆ.
كەيىپكەرىمىز ءار مەزگىلدىڭ وزىنە ءتان ەرەكشەلىگى بارىن ايتتى. قىستا توعانداردىڭ مۇزىن ويىپ، بالىقتاردىڭ جاي-كۇيىن باقىلاسا، مۇزى تولىق ەرىگەسىن ءساۋىر ايىندا تۇقى، ءدوڭماڭداي، اق امۋر بالىقتارىن ءبولىپ، جايىلىم توعاندارعا جىبەرەدى.
- نەگىزگى جۇمىس وسىدان كەيىن، ياعني مامىر ايىندا باستالادى. بالىقتاردىڭ اتالىعى مەن انالىعىنا زاۋىتتىق ادىسپەن ينەكسيا جاساپ، ۋىلدىرىق الۋعا كىرىسەمىز. دەرناسىلدەردى جاساندى جولمەن شىعارامىز. بۇل پروتسەس مامىر-ماۋسىم ايلارىندا جۇرەدى. وسى ارالىقتا 50 ميلليونعا جۋىق دەرناسىل پايدا بولادى، - دەدى كاسىپورىن وكىلى.
قامىستىباس بالىق پيتومنيگى ەكى جىل بۇرىن قازاقستاننىڭ قىزىل كىتابىنا ەنگەن، جويىلۋعا شاق قالعان ارال قايازىن جيناپ، وسىرۋگە دەن قويدى.
- سونىمەن قاتار قازاقستاننىڭ قىزىل كىتابىندا كەزدەسەتىن، ارال تەڭىزىندە جويىلىپ كەتكەن بەكىرە تۇقىمداس ارال ءپىلمايى اكەلىندى. كەلەشەكتە ودان ءونىم الىپ، قورىن ارتتىرۋ ءۇشىن تاعى دا كوپتەپ اكەلۋدى ءجون كورىپ وتىرمىز، - دەدى قىلىشبەك بايبوسىنوۆ.
بالىقشى كىشى ارال تەڭىزىنىڭ تولۋى يحتيوفاۋنانىڭ دامۋىنا سەپتىگىن تيگىزەتىنىنە سەنىمدى. سەبەبى سۋ كەلسە، بالىق تا، بالىقتىڭ قورەگى دە كوبەيەدى دەپ ەسەپتەيدى.
ايتا كەتەيىك، بۇگىندە قازاقستاندا وندىرىلەتىن 50-دەن استام اتاۋلى بالىق ءونىمى الەمنىڭ 21 ەلىنە ەكسپورتتالادى. اۆتور
نازەركە سانيازوۆا
