جوشى حان كەسەنەسىنىڭ ىرگەتاسى نەگە دىمقىل
استانا. KAZINFORM - جۋىردا الەۋمەتتىك جەلى قولدانۋشىسى جوشى حان كەسەنەسىنىڭ قازىرگى جاعدايى تۋرالى جازبا جاريالاپ، تاريحي دۇنيەگە كوڭىل ءبولۋ قاجەتتىگىن ايتقان ەدى. فوتودان بايقاساق، عيماراتتىڭ ىرگەتاسىن ىلعال باسقانى كورىنەدى.
وسىعان وراي جوشى حان كەسەنەسىنىڭ بۇگىنگى جاعدايى مەن كۇتىپ-باپتاۋ جۇمىستارى تۋرالى مادەنيەت جانە اقپارات مينيسترلىگىنە ساۋال جولدادىق.
جوشى حان كەسەنەسى مادەنيەت جانە اقپارات مينيسترلىگىنىڭ 2020 -جىلعى 15-ساۋىردەگى № 88 بۇيرىعىمەن رەسپۋبليكالىق ماڭىزى بار تاريحي ەسكەرتكىشتەردىڭ مەملەكەتتىك تىزىمىنە ەنگىزىلگەن.
«جىلدىڭ جاڭبىر مول جاۋاتىن ماۋسىمىندا جوشى حان كەسەنەسىنىڭ تومەنگى بولىگىن ىلعال باسادى (بۇرىنعى سۋرەت بەرىلىپ وتىر). الەۋمەتتىك جەلىدەگى سۋرەت تە وسى سوڭعى ايلارى جاسالعان بولۋى مۇمكىن. كەسەنە تەگىس جەردە ەجەلگى تەحنولوگيامەن ىرگەتاسسىز (فۋندامەنسىز) سالىنعان، ونى قۇلاتپاي، ورنىقتى ۇستاپ تۇرعان - كەسەنەنىڭ سىرتقى اۋقىمدى قابىرعالارى. كەسەنە دالالى جەردە تۇر، وسى ورايدا قىس كەزىندە قابىرعالارىنىڭ تومەنگى جاعى - ۇلىتاۋ جەرىندە كوپ جاۋاتىن قاردىڭ ۇيىتقىپ جينالاتىن ورنى. سونىمەن قاتار، دروننىڭ كومەگىمەن باقىلاۋ جۇرگىزىلگەن كەزدە كەسەنەنىڭ اينالاسىندا گرۋنتتىق ىلعالدىڭ باسىم ەكەنى بايقالعان. سول سەبەپتى كەسەنەگە انتروپوگەندىك اسەردەن گورى كليماتتىق اسەردىڭ ىقپالى زور بولىپ تۇر»، - دەپ جاۋاپ بەردى مينيسترلىك.
مامانداردىڭ پىكىرىنشە، جوشى حان كەسەنەسىنىڭ كونسترۋكسيالىق تۇراقتىلىعى ويداعىداي. جالپى حالىقارالىق تاجىريبەدە ەجەلگى ەسكەرتكىشتەردى وڭتايلى ساقتاۋدىڭ بىردەن-ءبىر ءتيىمدى جولى جانە قاعيداسى - شۇعىل جۇرگىزىلەتىن جۇمىستاردى قاجەت ەتپەسە تيىسپەۋ كەرەك.
«تومەندە بەرىلگەن تاريحي سۋرەت پەن ەرتەرەكتە جاسالعان ەسكيزگە نازار اۋدارساڭىزدار، كەسەنەنىڭ قازىرگى سۋلانىپ تۇرعان بولىگى - بۇرىن دا كۇردەلى پروبلەما بولعانىن كورسەتەدى. بۇل دا ەسكەرىلەتىن جايت دەپ پايىمدايمىز»، - دەلىنگەن اقپاراتتا.
كەسەنەگە ۇلىتاۋ وبلىسىنىڭ ۇلىتاۋ اۋدانىنداعى « ۇلىتاۋ» ۇلتتىق تاريحي-مادەني جانە تابيعي مۋزەي-قورىق مەكەمەسى جاۋاپتى. ۆەدومستۆونىڭ مالىمەتىنشە، قىس مەزگىلىندە كەسەنە مەن ۇلىتاۋ مۋزەي-قورىعىنىڭ اراسى الىس بولعاندىقتان قاتىناۋ، قاداعالاۋ قيىن.
«قولايلى مەزگىلدە مۋزەي- قورىق قىزمەتكەرلەرى كەسەنەنىڭ جاعدايىنا مونيتورينگ جۇرگىزىپ، ونىڭ ىرگەلەس اۋماعىن تازالىق جۇمىستارىمەن قامتاماسىز ەتىپ وتىرادى. جوشى حان كەسەنەسىنە سوڭعى رەت عىلىمي- رەستاۆراتسيا جۇمىستارى 2020 -جىلى جۇرگىزىلگەن. اتالعان جۇمىس الدىن الا جۇرگىزىلگەن زەردەلەۋدىڭ ناتيجەسىندە انىقتالعان عىلىمي- جوبالاۋ قۇجاتتاماسى نەگىزىندە اتقارىلدى. اتاپ ايتقاندا، كەسەنەنىڭ قابىرعالارىنا، كۇمبەزى مەن ىرگەتاسىنا كونسەرۆاتسيا جانە رەستاۆراتسيا جۇمىسى جاسالدى»، - دەيدى ۆەدومستۆودان.
سونداي-اق، مادەنيەت جانە اقپارات مينيسترلىگى الداعى ۋاقىتتا كەسەنەگە عىلىمي-رەستاۆراتسيالىق مەرزىمگە سايكەس جۇرگىزىلەتىنىن جانە ونىڭ ىرگەسىنىڭ سۋلانۋىنا بايلانىستى درەناجدىق جۇيەنى قولدانۋ مۇمكىن ەكەنىن ايتىپ وتىر.
قولدانىستاعى زاڭناماعا سايكەس ەجەلگى ەسكەرتكىشتەردە عىلىمي- رەستاۆراتسيا جۇمىستارىن ونىڭ تاريحي كەلبەتىن ساقتاپ وتىرۋ، تەك مەملەكەتتىك ارنايى ۇيىمدار عانا ەمەس، بەلگىلەنگەن ءتارتىپتى، كەلىسۋ پروتسەدۋرالارىن ورىنداي كەلە، بيۋدجەتتەن تىس تۇلعالار دا جۇرگىزە الادى، ياعني ەسكەرتكىشتىڭ تاريحي كەلبەتىن ساقتاۋعا بەلگىلى ءبىر تۇلعالار مەن ۇيىمدار عانا جاۋاپتى ەمەس.
«ەسكەرتكىشتىڭ كەلبەتىن ساقتاۋعا ونى باسقارىپ، پايدالانىپ وتىرعان مەملەكەتتىك مۋزەي- قورىقتان باستاپ ءتيىستى جەرگىلىكتى، ورتالىق مەملەكەتتىك ورگاندار، ارنايى رەستاۆراتسيالىق ۇيىمدار، جەكە تۇلعالار دا جاۋاپتى. ماسەلەن، جەكە تۇلعا تاريحي ەسكەرتكىش نەمەسە كەسەنە جانىنداعى زيراتقا تۋىسىن جەرلەسە، ەسكەرتكىشتىڭ كەلبەتى مەن لاندشافت كۇتىمىنە ول دا جاۋاپتى. سوندىقتان بۇل ماسەلەنى ءبىرجاقتى قاراۋ مۇمكىن ەمەس»، - دەپ تۇسىندىرەدى مينيسترلىكتەن.
وسى ورايدا ۆەدومستۆو تاريحي كەسەنەلەر مەن ەسكەرتكىشتەر باسىنا تۋريست رەتىندە نەمەسە نيەت ەتىپ بارۋشىلارعا ۇندەۋ جاريالادى.
«تۋريستەر مەن كەلۋشىلەرگە قويىلاتىن تالاپ - ونىڭ قۇندىلىعىنا نۇقسان كەلتىرمەسىن. ءبىلىپ نەمەسە بىلمەي ونىڭ كىرپىشتەرىنەن ەستەلىك رەتىندە فراگمەنت الۋ ماقساتىندا شۇقۋ، تازالىقتى ۇستاماۋ، جۇك كولىكتەرمەن وعان جاقىن ءجۇرۋ جانە تاعى باسقا ەسكەرتكىشتىڭ جاعدايىنا كەرى اسەرى ىقتيمال ارەكەتتەرگە جول بەرمەۋ كەرەك»، - دەلىنگەن ۇندەۋدە.
سونىمەن قاتار مادەنيەت جانە اقپارات مينيسترلىگى جوشى حان كەسەنەسىنە عىلىمي-رەستاۆراتسيا جۇمىسىن جۇرگىزۋگە رەسپۋبليكالىق بيۋدجەتتەن قارجى قاراستىرىلاتىنىن ايتادى، ءبىراق ۆەدومستۆو بولىنەتىن قاراجات كولەمىن كورسەتپەگەن.
ەسكە سالا كەتەيىك، بيىل قازاقستان جوشى ۇلىسىنىڭ 800 -جىلدىق مەرەيتويىن اتاپ ءوتىپ جاتىر.
اۆتور
داۋلەت ىزتىلەۋ
