جوعارعى كەڭەس ءتوراعاسى جۇمابەك تاشەنوۆتىڭ باۋىرجان مومىش ۇلىن قابىلداۋى

جوعارعى كەڭەسكە باردىم. تاپ مەنى كۇتىپ وتىرعانداي-اق، كومەكشىسى الدىمنان شىعىپ، ىزەتپەن كەزەكسىز مەنى تىپتەن-تىكە ءتوراعا جۇمابەك تاشەنوۆقا ەندىردى.

كەڭ كابينەتتىڭ تورىنەن الدىمنان ورتا بويلى، تىعىنشىق سارى جىگىت ورنىنان تۇرىپ، جەڭىل ادىممەن الدىمنان شىقتى.

امانداستىق. «تاقتىڭ» الدىنداعى ستولعا قاراما-قارسى وتىردىق.

- باۋكە، حالىڭىز قالاي؟ - دەگەن سۇراقتاردان ءسوزىن باستادى ءتوراعا. مەن جاۋاپ قاتتىم.

- دەنساۋلىق قالاي؟

- ونشا ماقتانارلىق ەمەس... - دەپ باستاي بەرگەنىمدە ول ستولداعى ءبىر سەدەپ تۇيمەنى باستى. كومەكشىسى جەتىپ كەلدى.

- ەراستوۆقا دەرەۋ قوڭىراۋ شالىڭىز. پولكوۆنيكتىڭ مينيسترلەر كەڭەسىنىڭ اۋرۋحاناسىنا جاتىپ ەمدەلۋىنە جاعداي جاساسىن...

- مەن ەراستوۆقا شاعىمدانىپ وتىرعان جوقپىن...

- قاجەت بولسا، ونى اۋرۋحانانىڭ ۇكىمەتتىك پالاتاسىنا جاتقىزىڭىز. جۇرە بەرىڭىز.

كومەكشىسى كەتتى. مەن نە ايتارىمدى بىلمەستەن، ساسقالاقتاپ:

- راقمەت سىزگە، - دەپپىن.

- ءسىز اراق ىشەسىز بە؟

- ىشەمىن.

- سىزگە پيۆو دا ىشۋگە بولمايدى. تەمەكى تارتاسىز با؟

- تارتامىن.

- كوپ تارتاسىز با؟

- كوپ تارتامىن.

- ونىڭىزدى قويىڭىز. ءسىز بىزگە وتە كەرەك ادامسىز. نە ىستەپ ءجۇرسىز؟

- جازىپ ءجۇرمىن.

- نە جازىپ ءجۇرسىز؟

- كورگەن-بىلگەندەر مەن وتكەن-كەتكەندەر. مەنىڭ تەمالارىم...

- ول وتە دۇرىس ەكەن. ول دا بىزگە وتە كەرەك، - دەپ باستىرمالاتىپ ءسوزىمدى اياقتاتپادى. «ە، بۇل كىسى اسىعىپ وتىر ەكەن عوي» دەگەن ويمەن ءتىلىمدى تارتتىم.

ءتوراعا ماعان راحىمجان قوشقاربايەۆتىڭ ارىزىن كورسەتتى.

- مەن سىزبەن وسى جاعىنان اقىلداسايىن دەپ شاقىرىپ ەدىم، - دەدى مەن وقىپ شىققان سوڭ.

- Его личное заявление не служит основанием (ونىڭ جەكە مالىمدەمەسى نەگىز بولا المايدى)

- قازاقشا سويلەڭىز.

- ارحيۆتان دالەلدەيتىن ماتەريالدار كەرەك. ولارسىز كيلىكسەڭىز، ۇيالىپ قالۋىڭىز مۇمكىن.

- بۇنىڭىز وتە دۇرىس اقىل. ونى قالاي تابامىز؟

- ىزدەۋ كەرەك.

- ءسىز ىزدەسەڭىز قايتەدى؟

- ىزدەيىن.

- قاراجاتتى مەن بەرگىزەيىن.

- جوق. مەن قاراجات المايمىن.

- بۇنىڭىز نە؟

- تابا الماسام شە؟

- جوق. ءسىز تاباسىز. ءسىز تاپپاعاندا كىم تاپپاق ونى؟

- مەن ىزدەستىرەيىن. تاپسام دۇرىس، تاپپاسام ەشقانداي مىندەتتەمەنى موينىما العىم كەلمەيدى.

- كەلىستىك. ءسىز ىزدەستىرەسىز، ءسىز تاباسىز.

- جارايدى. ءبىراق تا مەن اقشادان اۋلاقپىن.

- جارايدى. ال ەندى ءسىز تۋرالى دا كوپ حاتتار بار. ءسىزدى نەگە  كەڭەس وداعىنىڭ باتىرى ەمەس دەپ حات جازادى مەنىڭ اتىما...

- بۇل ۇكىمەتتىڭ جاۋاپكەرشىلىگى. 

- مەن - ۇكىمەت باستىعىمىن.

- سەن تەك رەسپۋبليكا جوعارعى كەڭەسى ءتورالقاسىنىڭ ءتوراعاسىسىڭ.

- مەن ۆوروشيلوۆتىڭ ورىنباسارىمىن.

- ونى مەن بىلەمىن.

- ءسىز مەنىڭ اتىما ارىز، ءومىربايانىڭىزدى تولىق ەتىپ جازىڭىز. بارلىق كورسەتكەن ەرلىكتەرىڭىزدى جازىڭىز. مەن ول ماسەلەنى ۆوروشيلوۆتىڭ الدىندا كوتەرەمىن.

- جوق. مەن ەش نارسە جازبايمىن. مەن تۋرالى جازىلعاندار از ەمەس.

- وندا سولاردى قاراستىرالىق. ولاردى قايدان تابۋعا بولادى؟

- مەن ول جاعىن بىلمەيمىن.

تاعى ءبىراز سويلەستىك.

باۋىرجان مومىش ۇلى. ايتىلماعان اقيقات. - الماتى: ونەر، 2010. - 98-101-ب ب.