جەتىسايدا قاربىز ءپىستى
تۇركىستان. KAZINFORM - جەتىسايلىق ديقاندار العاشقى ءونىمدى رەسەيگە ەكسپورتتاپ جاتىر. اۋدان اۋماعىنداعى 4 مىڭ گەكتار جەرگە قاربىز ەككەن شارۋالار بيىل مول ءونىم الامىز دەپ جوسپارلاپ وتىر.
اتامەكەن اۋىلدىق وكرۋگىندەگى «پاۆەل» شارۋا قوجالىعى 9 گەكتار ەگىستىككە 20 جىلدان بەرى باقشا داقىلدارىن ەگىپ كەلەدى.
بيىلعى جىلى دا مۇنداعى ديقاندار قاربىزدىڭ ەرەكشە كۇتىمدى قاجەت ەتەتىن «ۆيكتوريا» سورتىن ءساۋىر ايىنىڭ باسىندا ەككەن بولاتىن. قاجەتتى اگروتەحنيكالىق شارالاردىڭ دەر كەزىندە جاسالۋىنىڭ ناتيجەسىندە ءپىسىپ جەتىلگەن قاربىزدان مول ءونىم الىنادى دەپ جوسپارلانىپ وتىر. سونداي-اق، اعىن سۋدى ۇنەمدەۋ ماقساتىندا ەنگىزىلگەن تامشىلاتىپ سۋعارۋ ءادىسى ءونىمنىڭ ارتۋىنا دا سەپتىگىن تيگىزىپ وتىر.
«العاشقى ءونىمدى قازىر رەسەيگە جىبەرىپ جاتىرمىز. كەيىن سۇرانىسقا قاراي وزگە دە وڭىرلەرگە جىبەرەمىز. جىلداعىدان شىعىن كوپ بولعانىمەن باعاسى دا جوعارى بولىپ تۇر. قازىر كەلىسىن 150-170 تەڭگە ارالىعىندا ساتىپ جاتىرمىز. تامشىلاتىپ سۋعارۋ ءادىسىن قولداناتىندىقتان اعىن سۋدان، مينەرالدى تىڭايتقىشتاردان قيىندىق كورمەدىك. ونىمدىلىك تە ويداعىداي»، - دەدى شارۋا قوجالىق ءتوراعاسى اسان مۋبينوۆ.
جەتىسايلىق شارۋالار بيىلعى جىلى 79,3 مىڭ گەكتار سۋارمالى جەردىڭ 40,8 مىڭ گەكتارىنا ماقتا شيتىن سەپسە، 20,1 مىڭ گەكتار جەرگە باقشا، 7,2 مىڭ گەكتار جەرگە داندىك جۇگەرى، 3,3 مىڭ گا جەرگە كوكونىس پەن 6,3 مىڭ گەكتار جەرگە جوڭىشقا داقىلىن ەككەن.
«اۋدانداعى 20,1 مىڭ گەكتارعا ەگىلگەن باقشا داقىلدارىنىڭ 4 مىڭ گەكتارى قاربىز. بيىلعى جىلى 600 مىڭ توننادان استام باقشا ونىمدەرى جينالادى دەپ جوسپارلانىپ وتىر. بىلتىرعى جىلى دا باقشا داقىلدارىنان جوعارى دەڭگەيدە ءونىم الىنىپ، وبلىستا ۇزدىكتەردىڭ قاتارىنان كورىنگەنبىز»، - دەدى اۋداندىق اۋىل شارۋاشىلىعى جانە جەر قاتىناستارى ءبولىمىنىڭ باسشىسى نۇرتاس تۇرسىنبەكوۆ.
اۆتور
قايرات زاينيشيەۆ
