جەتىسايدا ماتا ءوندىرىسى قولعا الىندى

استانا. قازاقپارات- تۇركىستان وبلىسىنىڭ جەتىساي اۋدانىندا «توقىما ەمەس ماتا ءوندىرىسى» سەحى ءوز ءونىمىن شىعاردى، دەپ حابارلايدى 24KZ.

مۇندا كۇنىنە 5 مىڭ مەتر ماتا شىعارىلادى. ودان بولەك، ايىنا 60 توننا ماقتا زاۋىتتارىنا قاجەتتى سىمتەمىر وندىرىلەدى. جاڭااۋىل اۋىلدىق وكرۋگىندە ورنالاسقان سەحتىڭ جالپى جوبا قۇنى - 350 ميلليون تەڭگە.

كاسىپكەر ونىڭ 65 ميلليون تەڭگەسىن جەڭىلدەتىلگەن نەسيە رەتىندە العان. قالعانى - ءوز قارجىسى. وعان قۇرىلىس جۇرگىزىپ، قاجەتتى قۇرال-جابدىقتار ساتىپ العان. قازىر ماقتانىڭ ەڭ تومەنگى سورتىنان وندىرىستە قولداناتىن ماتا ءوندىرىپ جاتىر. كاسىپكەر ءابدىساتتار قولداسوۆتىڭ ايتۋىنشا، تاۋلىگىنە 60 وراما توقىما ەمەس ماتا شىعاراتىن 8 ستانوكتا 20 ادام تۇراقتى جۇمىسپەن قامتىلعان. «دايىن ونىمگە سۇرانىس جاقسى»، - دەيدى.

ءابدىساتتار قولداسوۆ، كاسىپكەر:

- زاۋىتتار دا ءاربىر وڭدەلگەن ماقتانىڭ سىرتى وسىمەن قاپتاپ شىعارىلادى. بۇل ءار زاۋىتقا كەرەك. ودان كەيىن ۇلكەن ءوندىرىس ورىندارىندا تازالىققا، «تراپكى» رەتىندە قولدانىلادى كوپ جەرلەردە. ماي سۇرتۋگە پايدالانادى. مەكتەپتەردە ەدەن جۋۋعا الادى. ءبىر مەكتەپتىڭ ءوزى ءبىر ماۋسىمدا 30-40 رۋلون الادى ەكەن. بىزگە دەيىن بۇنداي بولماعان. وسى شىققالى بەرى الىپ جاتىر. بۇدان بولەك، سەحتا ايىنا 60 توننا ماقتا زاۋىتتارىنا قاجەتتى سىمتەمىر شىعارىلادى. ونى ماقتا وڭدەيتىن كاسىپورىندار دايىن ءونىمنىڭ بەلىن بۋۋعا قولدانادى.

ساپاسى جاعىنان وزبەكستاندىق سىمتەمىرلەردەن كەم تۇسپەيتىن ءونىمنىڭ باعاسى دا قولجەتىمدى. تونناسى قوسىمشا قۇن سالىعىن قوسا ەسەپتەگەندە 720 مىڭ تەڭگەگە باعالانىپ وتىر. شيكىزات قىتاي مەن رەسەيدەن جەتكىزىلەدى.

دانيار تولىبايەۆ، اۋداندىق كاىسىپكەرلىك ءبولىمىنىڭ باسشىسى:

- مۇندا قوسىمشا تاعى سەحتاردى اشۋ جوسپارلانىپ وتىر. بيىل اۋداندا 12 جوبانى ىسكە اسىرۋ مەجەلەنىپ وتىر. سونىڭ ەسەبىنەن 20 ميلليارد ينۆەستيتسيا تارتۋ كوزدەلىپ وتىر. سونى ناتيجەسىندە 1700-دەن استام جۇمىس ورنىن اشىپ، جۇمىسپەن قامتۋدى كوزدەپ وتىرمىز.

ماماندار بيىل اۋداندا باقشا جانە كوكونىس داقىلدارىن قايتا وڭدەپ، ودان كەپتىرىلگەن جەمىس شىعاراتىن سەح سالۋدى جوسپارلاپ وتىرعاندارىن جەتكىزدى. قۇنى 750 ميلليون تەڭگەلىك جوباعا شەتەلدىك ينۆەستور قىزىعۋشىلىق تانىتىپ وتىر، - دەيدى. وندىرىلگەن دايىن ءونىم بولاشاقتا ەكسپورتقا باعىتتالماق.