جۇرگىزۋشى كۋالىگىن ۇيدە وتىرىپ-اق رەتتەۋگە مۇمكىندىك بار

استانا. KAZINFORM - بۇگىندە ىشكى ىستەر ورگاندارى حالىققا 105 قىزمەت ءتۇرىن كورسەتەدى. جىل باسىنان بەرى تۇرعىندارعا 5 ميلليونعا جۋىق مەملەكەتتىك قىزمەت ۇسىنىلعان. ونىڭ ىشىندە ءتولقۇجات نەمەسە جۇرگىزۋشى كۋالىگىن الۋ، اۆتوكولىكتى تىركەۋ سياقتى قىزمەتتەر سۇرانىسقا يە.

ءى ءى م دەپارتامەنت باستىعى - ءى ءى م رەسمي وكىلى شىڭعىس الەكەشەيەۆتىڭ ايتۋىنشا، مەملەكەتتىك قىزمەت الۋعا كۇنىنە ورتا ەسەپپەن 40 مىڭداي ازامات جۇگىنەدى ەكەن.

«جىل سايىن كولىك قۇرالدارىن تىركەۋ ماسەلەسى بويىنشا 2,5 ميلليوننان استام ازامات، ال جۇرگىزۋشى كۋالىگىن الۋعا 1 ميلليوننان استام ادام جۇگىنەدى. قۇجاتتاردى راسىمدەۋ نەمەسە ولاردى اۋىستىرۋ ءۇشىن شامامەن 2,5 ميلليون ازامات جۇگىنسە، 2 ميلليونعا جۋىق ادام تۇرعىلىقتى جەرى بويىنشا تىركەۋ ماسەلەسىمەن كەلەدى. ءى ءى م مەملەكەتتىك قىزمەتتەردى اۆتوماتتاندىرۋعا جانە وڭتايلاندىرۋعا ەرەكشە نازار اۋدارادى. بۇل قىزمەت كورسەتۋدى جەدەلدەتىپ، پوليتسيامەن تىكەلەي بايلانىستى ازايتادى، ازاماتتاردىڭ ءومىرىن جەڭىلدەتەدى»، - دەيدى ول.

بەلگىلى بولعانداي، ەگەر بۇرىن ءتولقۇجاتتار مەن جەكە كۋالىكتەر ەكى اي ىشىندە بەرىلسە، قازىر بۇل مەرزىم 15 جۇمىس كۇنىنە دەيىن قىسقارتىلعان. ال قۇجاتتاردى دايىنداۋ ورتالىقتارى بار استانا، الماتى، شىمكەنت جانە اقتوبە قالالارىندا ءوتىنىش بەرۋشى قۇجاتتاردى ءتىپتى ءبىر جۇمىس كۇنى ىشىندە الا الادى.

تاعى ءبىر اتاپ وتەرلىگى، ءى ءى م مەملەكەتتىك قىزمەتتەردى سمارتفوندارعا دا ەنگىزە باستاعان. بۇگىنگى تاڭدا تەلەفوندارعا ەڭ كوپ سۇرانىسقا يە 8 مەملەكەتتىك قىزمەت قوسىلعان. ولار eGov mobile پلاتفورماسىندا، سونداي-اق ەكىنشى دەڭگەيلى بانكتەردىڭ موبيلدى قوسىمشالارىندا قولجەتىمدى.

ولار:

- اۆتوكولىكتى تىركەۋ جانە قايتا جابدىقتاۋ؛
- جۇرگىزۋشى كۋالىگىن بەرۋ؛
- تۇرعىلىقتى جەرى بويىنشا تىركەۋ جانە تىركەۋدەن شىعارۋ؛
- شەكارالاس اۋماقتاردىڭ تۇرعىندارى ءۇشىن مەكەنجايدى راستاۋ؛
- ەلدە تۇراقتى تۇرۋعا جانە شەتەلدىكتەرگە ۋاقىتشا تۇرۋعا قۇجات راسىمدەۋ.
اۆتور
ورالحان قوجانوۆ