Jeju Air اپاتىنان قازا بولعان 179 ادامنىڭ تۋىستارى شەنەۋنىكتەردىڭ ۇستىنەن شاعىم ءتۇسىردى
استانا. KAZINFORM - قازا تاپقانداردىڭ تۋىستارى وڭتۇستىك كورەيا تاريحىنداعى ەڭ اۋىر اۋە اپاتىنا اكەلگەن سالعىرتتىقتى تەرگەۋدى تالاپ ەتىپ وتىر، دەپ حابارلايدى BBC.
وتكەن جىلدىڭ جەلتوقسان ايىندا Jeju Air ۇشاعى اپاتىندا قازا تاپقانداردىڭ تۋىستارى 15 شەنەۋنىكتىڭ ۇستىنەن شاعىم ءتۇسىردى. ولاردىڭ اراسىندا وڭتۇستىك كورەيانىڭ كولىك ءمينيسترى مەن اۋە كومپانياسىنىڭ باس ديرەكتورى بار.
تالاپكەرلەردىڭ پىكىرىنشە، قايعىلى وقيعا قىلمىستىق نەمقۇرايدىلىق سالدارىنان بولعان.
ەندى قازا تاپقان 72 ادامنىڭ تۋىستارى اپاتتىڭ سەبەبىن مۇقيات تەكسەرۋدى تالاپ ەتىپ، بۇل جاي عانا جازاتايىم وقيعا ەمەس، «باسقارۋداعى سالعىرتتىق جانە الدىن الۋعا بولاتىن تاۋەكەلدەردى ەلەمەۋدەن تۋىنداعان اۋقىمدى ازاماتتىق اپات» بولعانىن ايتىپ وتىر.
بەس ايعا جۋىق ۋاقىت ءوتتى، ءبىراق بيلىك ۇشاقتىڭ مۋان اۋەجايىنا شۇعىل قونۋى مەن ودان كەيىنگى ءورتتىڭ ىقتيمال سەبەپتەرىن ءالى دە ساراپتاپ جاتىر.
قىلمىستىق ءىس سوڭعى شاعىم تۇسكەنگە دەيىن قوزعالدى، Jeju Air باس ديرەكتورى كيم ي- بەگە ەلدەن شىعۋعا تىيىم سالىندى. ولاي بولعانىمەن، بۇگىنگى كۇنگە دەيىن ەشكىمگە ايىپ تاعىلعان جوق.
ۇستىنەن شاعىم تۇسىرىلگەن 15 ادامنىڭ ىشىندە مەملەكەتتىك قىزمەتكەرلەر، اۋە كومپانياسىنىڭ قىزمەتكەرلەرى جانە ايرودروم ايماعىندا قۇرىلىس، تەحنيكالىق قىزمەت كورسەتۋ، قاداعالاۋ جانە قۇستاردى باقىلاۋعا جاۋاپتى اۋەجاي قىزمەتكەرلەرى بار.
سەيسەنبى كۇنى تۇسىرىلگەن شاعىم اپاتتىڭ ءمان-جايى تۋرالى سۇراقتاردى قوزعاپ وتىر.
ەسكە سالا كەتسەك، وڭتۇستىك كورەياداعى ۇشاق اپاتىنان بورتتاعى 181 ادامنىڭ 179-ى مەرت بولدى.
اۆتور
زارينا تۋعانبايەۆا
