جايىق وزەنىندەگى سۋدىڭ كوتەرىلۋى 94 ەلدى مەكەنگە قاۋىپ توندىرەدى - نۇرلان بايبازاروۆ
ورال. KAZINFORM - جايىق وزەنىندەگى سۋ دەڭگەيىنىڭ كوتەرىلۋى ورال قالاسىمەن قوسا، 94 ەلدى مەكەنگە قاۋىپ توندىرەدى. باتىس قازاقستان وبلىسىندا سۋ تاسقىنى باستالعاننان بەرى 3700-گە جۋىق تۇرعىن ەۆاكۋاتسيالىق ورتالىقتارعا ورنالاستىرىلدى.
سونىڭ 2700-گە جۋىعى ۇيىنە ورالدى. بۇل تۋرالى ق ر پرەمەر-ءمينيسترىنىڭ ورىنباسارى نۇرلان بايبازاروۆ ب ق و- داعى سۋ تاسقىنىنا قاتىستى احۋال بويىنشا جاساعان ۇندەۋىندە ءمالىم ەتتى.
پرەمەر-مينيستر ورىنباسارىنىڭ ايتۋىنشا، قالعان مىڭنان استام ادام 13 ەۆاكۋاتسيالىق پۋنكتتە. ولار ازىق-تۇلىكپەن، قاجەتتى مەديتسينالىق كومەكپەن قامتاماسىز ەتىلدى. قاجەت بولعان جاعدايدا وڭىردە 30 مىڭنان استام ورىنعا ەۆاكۋاتسيالىق پۋنكتتەر دايىندالدى.
«وبلىس تۇرعىندارىنا كەلتىرىلگەن ماتەريالدىق شىعىندى ەسەپتەۋ جۇمىستارى باستالدى. 581 تۇرعىن ءۇيدىڭ 236-سىنا تەحنيكالىق تەكسەرۋ جۇرگىزىلدى. بۇل جۇمىس جالعاسادى. سۋ تاسقىنىنان زارداپ شەككەن 481 وتباسىنا 89 ميلليون تەڭگەگە ءبىر رەتتىك تولەمدەر جاسالدى. الداعى ۋاقىتتا تولەمدەر جالعاساتىن بولادى»، - دەدى ن. بايبازاروۆ.
ۇكىمەت باسشىسىنىڭ ورىنباسارى قازىرگى ۋاقىتتا ەڭ ماڭىزدى ماسەلە - سۋ تاسقىنىنىڭ ەكىنشى كەزەڭى ەكەنىن اتاپ كورسەتتى. الدىڭعى كۇنى رەسەي فەدەراتسياسىنىڭ يريكلا سۋ قويماسىنان سەكۋندىنا 2170 تەكشە مەتر سۋ جىبەرىلىپ جاتسا، كەشە 1670 تەكشە مەترگە ءتۇستى.
«سوعان قاراماستان، جاعداي كۇردەلى. ورال قالاسى بويىنشا جايىق وزەنىندەگى سۋ دەڭگەيى 7 مەترگە دەيىن كوتەرىلدى. بۇل ورال قالاسىنا عانا ەمەس، وزەن بويىندا ورنالاسقان اقجايىق، ءبورلى، بايتەرەك، تەرەكتى اۋداندارىنىڭ 94 ەلدى مەكەنىنە قاۋىپ توندىرەدى. وبلىستا سۋ تاسقىنى زارداپتارىن ازايتۋ ءۇشىن قاجەتتى رەسۋرستار جۇمىلدىرىلدى. ورال قالاسىنداعى جايىق وزەنى جاعالاۋىنداعى ەڭ قاۋىپتى التى ۋچاسكەدە ۇزىندىعى 5 شاقىرىم بولاتىن بوگەتتەر سالىنىپ جاتىر. باسقا دا اۋدانداردا قاۋىپسىزدىك شارالارى اتقارىلۋدا. جالپى سۋ تاسقىنى بويىنشا احۋال جەدەل شتابتىڭ باقىلاۋىندا»، - دەدى ن. بايبازاروۆ.
ەسكە سالا كەتەيىك، بۇدان بۇرىن ورالدا جايىق جاعاسىنداعى بوگەتتەردى بيىكتەتۋ جۇمىستارى جۇرگىزىلىپ جاتقانىن جازعان بولاتىنبىز.
اۆتور
عايساعالي سەيتاق
