جايلى مەكتەپ قانداي بولادى: ءبىلىم ورداسىنىڭ ىشكى 3D تۋرى ىسكە قوسىلدى

استانا. KAZINFORM - جوبا اياسىنداعى مەكتەپتەردىڭ ورنالاساتىن ورنى مەن تولتىرىلۋى تۋرالى مالىمەتتى، سونداي-اق وزەكتى سۇراقتارعا جاۋاپتاردى «جايلى مەكتەپ» ۇلتتىق جوباسىنىڭ رەسمي پاراقشاسىنان تابۋعا بولادى. بۇل جايىندا وقۋ-اعارتۋ مينيسترلىگى ءبىرىڭعاي وپەراتور Samruk-Kazyna Construction-عا سىلتەمە جاساپ حابارلادى.

3D تۋردى مىنا سىلتەمەدە تاماشالاۋعا بولادى.

ءۇش دەڭگەيلى ۇلگىدە مەكتەپتىڭ ىشكى قۇرىلىسى، سىنىپتاردىڭ، اسحانانىڭ، سپورت زالدارىنىڭ، ءدالىزدىڭ ورنالاسۋى كورسەتىلگەن.

كورىنىستەر مەيلىنشە شىنايىعا جاقىنداتىلعان، مۇندا ينتەرەر ديزاينىن، جيھازداردى، بەزەندىرىلۋىن تاماشالاۋعا بولادى.

بۇدان باسقا كەرى بايلانىس نىسانى ارقىلى كەز- كەلگەن سۇراققا جاۋاپ الۋعا بولادى.

مەملەكەت باسشىسىنىڭ تاپسىرماسىمەن وقۋشى ورنىنىڭ تاپشىلىعىن شەشۋ، اپاتتىق جاعدايداعى جانە ءۇش اۋىسىمدى مەكتەپتەردى جويۋ ماقساتىندا قازاقستاندا «جايلى مەكتەپ» جوباسى جۇزەگە اسىپ جاتىر.

جوبا اياسىندا 740 مىڭ ورىنعا ارنالعان 369 جاڭا فورماتتاعى مەكتەپ سالىنادى، ونىڭ 217 سى وسى جىلدىڭ سوڭىنا دەيىن، قالعان 152 مەكتەپ 2025 -جىلى پايدالانۋعا بەرىلەدى.

بۇعان دەيىن ق ر وقۋ-اعارتۋ مينيسترلىگى زاماناۋي ەرگونوميكالىق جانە قاۋىپسىز ءبىلىم ورتاسىن قۇرۋ ماقساتىندا قاجەتتى نورماتيۆتى قۇقىقتىق بازا ازىرلەنىپ، مەكتەپ قۇرىلىسى كەزىندەگى تالاپتاردى بەلگىلەگەن بولاتىن.

سونىمەن قاتار بولاشاق جايلى مەكتەپتەردە وقۋ پروتسەسىن ءتيىمدى ۇيىمداستىرۋ جانە ونى ساپالى كادرلارمەن قامتاماسىز ەتۋ بويىنشا جۇمىس ءجۇرىپ جاتىر.