جاپونيا ورتالىق ازياعا ەكونوميكالىق كومەك پاكەتىن جاريالايدى
توكيو. KAZINFORM - جاپونيا پرەمەر-ءمينيسترى فۋميو كيشيدا تامىز ايىندا قازاقستاندا ورتالىق ازيانىڭ بەس ەلىنىڭ باسشىلارىمەن كەزدەسۋ وتكىزىپ، ايماققا ەكونوميكالىق كومەك كورسەتۋ پاكەتىن جاريالايدى.
بۇل تۋرالى جاپونيا ۇكىمەتىنىڭ وكىلدەرىنە سىلتەمە جاساپ، The Japan Times حابارلادى.
- جاپونيا پرەمەر-ءمينيسترى فۋميو كيشيدانىڭ 9-12-تامىز ارالىعىندا وزبەكستان، قازاقستان جانە موڭعولياعا ساپارى جوسپارلانعان. ەكونوميكالىق پاكەت ساۋدا جولىن قۇرۋعا، دەكاربونيزاتسياعا جانە ادامدار اراسىنداعى الماسۋدى ىلگەرىلەتۋگە باعىتتالعان. بۇل قازاقستانداعى التىجاقتى سامميتتەن كەيىن جاريالاناتىن بىرلەسكەن مالىمدەمەنىڭ ءبىر بولىگى بولادى دەپ كۇتىلۋدە، - دەلىنگەن حابارلامادا.
كومەك جوسپارىنا سايكەس، جاپونيا ورتالىق ازيا مەن ەۋروپانى رەسەيسىز بايلانىستىراتىن كاسپي تەڭىزى ارقىلى ساۋدا جولىن قۇرۋعا كومەكتەسەدى. سوندىقتان جاپونيا تۇراقتى ەكسپورتتىق باعىت ايماققا ەكونوميكالىق تاۋەلسىزدىك بەرەدى دەپ ۇمىتتەنەدى.
- دەكاربونيزاتسيا سالاسىندا جاپوندىق كومپانيالاردىڭ تەحنولوگيالارى مەن نەسيەلەرى تابيعي گازدى وڭدەۋگە كومەكتەسۋ سياقتى شارالارعا جۇمسالادى دەپ كۇتىلۋدە. جاپونيا وڭىردەن بىلىكتى جۇمىسشىلاردى قابىلداۋدى جوسپارلاپ وتىر، - دەلىنگەن حابارلامادا.
توكيونىڭ قىتاي جانە رەسەي سياقتى قۋاتتى ەلدەرمەن تىعىز بايلانىسى بار ايماققا تۇراقتى ەكونوميكالىق دامۋعا كومەكتەسۋدى ماقسات ەتكەنى اتاپ ءوتىلدى.
- ورتالىق ازيا شىعىس ازيا مەن ەۋروپا اراسىنداعى نەگىزگى گەوساياسي ايماق جانە گاز سياقتى تابيعي رەسۋرستارعا باي. قىتاي سوڭعى جىلدارى ونداعى ەكونوميكالىق ىقپالىن كەڭەيتۋدە، ا ق ش پەن ەۋرووداق تا بايلانىستاردى نىعايتۋعا ۇمتىلۋدا، - دەپ جازدى The Japan Times.
بۇعان دەيىن جاپونيا پرەمەر-ءمينيسترى فۋميو كيشيدا قازاقستانعا كەلەتىنىن حابارلاعان ەدىك.
اۆتور
جاراسقان نۇرىبايەۆ
