جاپوندار دا جىلقى ەتىن تۇتىنادى - مينيستر شاققاليەۆ

Фото: uniface.kz
Фото: uniface.kz

جاپون حالقى دا جىلقى ەتىن تۇتىنادى. سۇرانىس بولسا، 45 ءوندىرۋشى ءونىمدى جاپونياعا جەتكىزۋگە دايىن وتىر.

بۇل تۋرالى ساۋدا جانە ينتەگراتسيا ءمينيسترى ارمان شاققاليەۆ ايتتى، - دەپ حابارلايدى Massaget.kz ءتىلشىسى.

«جاپوندار جىلقى ەتىن تۇتىنادى. ەلىمىزدە جىلقى ەتىن ەكسپورتتايتىن 45 ءوندىرۋشى بار. ولار ءوز ءونىمىن جاپونياعا جىبەرۋگە دايىن. قازىرگى تاڭدا (جاپونيالىق) ارىپتەسىمە (جاپونيانىڭ ەكونوميكا، ساۋدا جانە ونەركاسىپ ۆيتسە-ءمينيسترى رەسۋكە كودزۋكي) اقپارات بەرىپ، دايىندىقتى كورسەتتىم. قىتاي ارقىلى كونتەينەرمەن (جاپونياعا جىلقى ەتىن) جەتكىزۋگە بولادى، تەك جاپونيادان سۇرانىس كەرەك»، - دەدى ارمان شاققاليەۆ ۇكىمەتتىڭ باسپا ءسوز ورتالىعىندا.

ايتا كەتەيىك، وتكەن اپتادا ساۋدا جانە ينتەگراتسيا ءمينيسترى جاپونيانىڭ ەكونوميكا، ساۋدا جانە ونەركاسىپ ۆيتسە-ءمينيسترى رەسۋكە كودزۋكيمەن كەزدەسكەن ەدى.

كەزدەسۋدە قوس تاراپ ساۋدا بايلانىسىن نىعايتۋ ماسەلەسىن تالقىعا سالعان.

«ءبىز قازاقستاندىق ونىمدەردىڭ ەكسپورتىن كەڭەيتتىك. 204 ميلليون دوللارعا 45 وڭدەلگەن تاۋاردى جەتكىزۋدى ودان ءارى ارتتىرۋعا دايىنبىز. قازاقستاندا ءىرى اۋىل شارۋاشىلىعى جانە ازىق-تۇلىك حابىنا اينالۋ ءۇشىن بارلىق رەسۋرس بار. اۋىل شارۋاشىلىعى ونىمدەرىن، اسىرەسە، جىلقى ەتىن جەتكىزۋدە ۇلكەن مۇمكىندىك بار»، - دەدى ارمان شاققاليەۆ.

2023-جىلعى 11 ايدا قوس ەل اراسىنداعى ساۋدا اينالىمى 2 ميلليارد دوللارعا جەتتى.

سوڭعى جاڭالىقتار