جاستاردىڭ ءتارتىبى مەن جاۋاپكەرشىلىگىن ارتتىراتىن جاڭا باعدارلاما ازىرلەنە مە - بەكتەنوۆ جاۋابى
استانا. KAZINFORM - پرەمەر-مينيستر ولجاس بەكتەنوۆ سەنات دەپۋتاتتارىنىڭ جاستار اراسىندا ءتارتىپ پەن جاۋاپكەرشىلىكتى ارتتىراتىن جاڭا باعدارلاما ازىرلەۋ ۇسىنىسىنا جاۋاپ بەردى.
- جاستار اراسىندا ءتارتىپ پەن جاۋاپكەرشىلىكتى نىعايتۋ، سونداي-اق ءبىلىم بەرۋ ورتاسىندا وتباسىلىق تاربيە مەن ادامگەرشىلىك-ەتيكالىق قۇندىلىقتاردى ىلگەرىلەتۋ ماقساتىندا 2023 -جىلدان باستاپ «ءبىرتۇتاس تاربيە» باعدارلاماسى ىسكە اسىرىلىپ جاتىر. باعدارلاما 6 نەگىزگى قۇندىلىققا نەگىزدەلگەن: تاۋەلسىزدىك پەن پاتريوتيزم، بىرلىك پەن كەلىسىم، ادىلدىك پەن جاۋاپكەرشىلىك، زاڭ مەن ءتارتىپ، ەڭبەكقورلىق پەن كاسىبيلىك، جاسامپازدىق پەن يننوۆاتسيا. باعدارلامانى وقۋ- اعارتۋ مينيسترلىگى 10 مەملەكەتتىك ورگانمەن بىرلەسىپ ىسكە اسىرادى، - دەدى ولجاس بەكتەنوۆ.
ونىڭ اتاپ وتۋىنشە، وقۋ جىلىنىڭ باسىنان بەرى باعدارلاما اياسىندا 1 ميلليونعا جۋىق سىنىپ ساعاتى جانە 46,8 مىڭنان استام سىنىپتان تىس ءىس-شارا وتكىزىلدى.
- ءبىلىم الۋشىلاردى قامتۋ 100 پايىزدى قۇرادى. باعدارلامانىڭ ماقساتى - تەرەڭ ءبىلىمدى، ەڭبەك ەتيكاسىن ۇستاناتىن، ادال، ۇلتتىق جانە امبەباپ قۇندىلىقتاردى قۇرمەتتەيتىن، ءادىل قوعامنىڭ دامۋىنا ۇلەس قوسۋعا دايىن تۇلعانى تاربيەلەۋ. پرەزيدەنتتىڭ تاپسىرماسى بويىنشا 2025 -جىلعى 14- ناۋرىزدا وتكەن ۇلتتىق قۇرىلتايدىڭ IV وتىرىسىندا باعدارلاما اتاۋى «ادال ازامات» دەپ وزگەرتىلدى، - دەدى ول.
ولجاس بەكتەنوۆ پرەزيدەنتتىڭ تاپسىرمالارىن ورىنداۋ ءۇشىن 2025 -جىلعى 14- ناۋرىزدان باستاپ وقۋ- اعارتۋ مينيسترلىگى بالالاردىڭ قۇقىقتارىن كەشەندى قورعاۋعا باعىتتالعان «قازاقستان بالالارى» ءبىرىڭعاي باعدارلاماسىن ازىرلەۋگە كىرىسكەنىن اتاپ وتەدى. باعدارلامادا مىناداي 7 باسىم باعىت انىقتالعان:
وتباسى - بالانىڭ ءال- اۋقاتىنىڭ نەگىزى؛
ءبىلىم الۋ قۇقىعى؛
مەديتسينالىق كومەك الۋ قۇقىعى؛
بالالارى بار وتباسىلاردى الەۋمەتتىك قولداۋ؛
بۋللينگتەن، زورلىق زومبىلىقتان جانە باسقا تاۋەكەلدەردەن قورعاۋ؛
ينفراقۇرىلىمدىق قاۋىپسىزدىك؛
بوس ۋاقىت، سپورت جانە قوسىمشا ءبىلىم الۋ قۇقىعى.
- جوعارىدا اتالعان باستامالاردىڭ ىسكە اسىرىلۋىن ەسكەرە وتىرىپ، قازىرگى ۋاقىتتا جەكەلەگەن جاڭا تاربيە باعدارلاماسىن ازىرلەۋدىڭ قاجەتتىلىگى بايقالمايدى، - دەدى پرەمەر-مينيستر.
ەستەرىڭىزگە سالا كەتسەك، سەناتور گەننادي شيپوۆسكيح جاستار اراسىندا ءتارتىپ پەن جاۋاپكەرشىلىكتى كۇشەيتەتىن، ياعني وتباسىلىق تاربيە مەن مەكتەپتەگى مورالدىق-ەتيكالىق قۇندىلىقتارعا نەگىزدەلگەن جاڭا باعدارلامالار ازىرلەۋ قاجەتتىگىن كوتەرىپ، ۇكىمەت باسشىسىنىڭ اتىنا دەپۋتاتتىق ساۋال جولداعان ەدى.
