جاستاردى بۇرمالانعان تاياز ءدىني تۇسىنىكتەرگە بۇرىپ اكەتۋ ارەكەتتەرى جالعاسىپ جاتىر - سەناتور
ءدىني ءبىلىم ىزدەنۋشىلەردىڭ 75 پايىزى اشىق ينتەرنەت رەسۋرستاردى پايدالانادى. بۇل تۋرالى سەناتتىڭ جالپى وتىرىسىندا دەپۋتات نۇرتورە ءجۇسىپ ايتتى، دەپ حابارلايدى قازاقپارات ءتىلشىسى.
«قازاقستان - دەموكراتيالىق، زايىرلى، قۇقىقتىق جانە الەۋمەتتىك مەملەكەت. كونستيتۋتسياعا سايكەس بىزدە ار- وجدان بوستاندىعى بار. يمان - جۇرەكتە. ىزگىلىك - تىلەكتە. ازامات قاي ءدىندى ۇستانادى؟ ونىڭ سەنىم- نانىمى قانداي؟ اركىمنىڭ ءوز ەركى. بۇعان اتا زاڭدا كەپىلدىك بەرىلگەن. ءبىراق سولاي ەكەن دەپ ءوزىمىز ءومىر ءسۇرىپ وتىرعان قوعامدى الا تايداي بۇلدىرۋگە، ءوز ءدىني ۇستانىمىن وزگەگە تاڭۋعا، توپ قۇرىپ، جىك- جىككە بولىنۋگە جول بەرۋگە بولمايدى. «دومبىرا - حارام، سالەم سالۋ - حارام، ەلدىڭ ءبارى حيدجاپ پەن نيقاب كيۋى كەرەك» دەگەن تالاپتار كونستيتۋتسيامىزعا قايشى كەلەدى. 21- عاسىر - جاھاندانۋ زامانى. وركەنيەت كوشىن باستاپ كەلە جاتقان مەملەكەتتەر قايدا؟ ءبىز قايدامىز؟ وزىق جۇرت قازىر جاساندى ينتەلەكتپەن، تەحنولوگيالىق جەتىستىكتەرمەن اينالىسىپ جاتقاندا، ءبىز ەلىمىزدى ورتا عاسىرداعى دەڭگەيگە سۇيرەمەكپىز بە؟»، - دەدى ن. ءجۇسىپ ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.
ونىڭ پايىمىنشا، ۇلتتىق قۇندىلىقتار - قازىرگىدەي جاھاندانۋ كەزەڭىندە جاستاردى ءتۇرلى گيبريد، سۋبمادەنيەتتەردىڭ ىقپالىنا ءتۇسىپ كەتۋدەن قورعايتىن بىردەن ءبىر يممۋنيتەت.
«ءبىزدىڭ اتا سالتىمىز بار. حالىقتىق قالپىمىز بار. قانشا داۋىردەن بەرى قالىپتاسقان ۇلتتىق قۇندىلىقتارىمىز بار. سولاردىڭ ءبارىن تارك ەتەمىز بە؟ اتا ءدىنىمىزدى ارداقتاۋدىڭ، سالت- ءداستۇرىمىزدى ساقتاۋدىڭ ورنىنا بۇكىل قوعام بولىپ وزگە اعىمداردىڭ جەتەگىندە كەتەمىز بە؟ ماسەلە دابىل قاعارلىق دەڭگەيگە جەتتى. ەلىمىزدە دىنگە قىزىعۋشىلاردىڭ ورتاشا جاس مولشەرى جاسارىپ كەلەدى. بەيرەسمي دەرەكتەرگە سايكەس ءدىني ءبىلىم ىزدەنۋشىلەردىڭ 75 پايىزى اشىق ينتەرنەت رەسۋرستاردى پايدالانادى. ءوز كەزەگىندە دەسترۋكتيۆتى كۇشتەر اقپاراتتىق كەڭىستىكتىڭ بارلىق مۇمكىندىكتەرىن ءوز قىزمەتىندە وڭتايلى پايدالانىپ وتىر. سونىڭ سالدارىنان ءوز ازاماتتارىمىزدان سالت- ءداستۇرىمىز بەن ۇلتتىق قۇندىلىقتارىمىزعا، ءداستۇرلى مادەنيەت پەن ونەرگە قارسىلىق ءبىلدىرۋ، مەملەكەتتىك رامىزدەر مەن كەيبىر مەرەكەلەردى قۇرمەتتەمەۋ، زاڭمەن بەلگىلەنگەن اسكەردە قىزمەت ەتۋ، ورتا ءبىلىم الۋ سىندى ورتاق مىندەتتەردەن، مەديتسينالىق راسىمدەردىڭ كەيبىر تۇرلەرىنەن باس تارتۋى سياقتى زايىرلى قوعام تالاپتارىنا ساي كەلمەيتىن قارسىلىقتار انىق بايقالۋدا. سونداي- اق جاستاردىڭ نازارىن جالپىعا ورتاق وقۋ- بىلىمنەن، پاراساتتى پايىمنان، زاماناۋي قۇندىلىقتاردان بۇرمالانعان تاياز ءدىني تۇسىنىكتەرگە بۇرىپ اكەتۋ ارەكەتتەرى اشىق جالعاسىپ جاتىر»، - دەدى سەناتور.
ونىڭ ايتۋىنشا، قازىر وسىنداي سىرت كۇشتەردەن ازماتتاردى اراشالاپ الۋعا كومەكتەسەتىن ساۋاتتى تەولوگتار مەن يمامدار دا تاپشى.
«بىرىنشىدەن، شەتەلدەردىڭ وزىق تاجىريبەسىن زەردەلەي وتىرىپ، قولدانىستاعى زاڭنامانى ۇلتتىق دۇنيەتانىمدى ەسكەرە وتىرىپ جەتىلدىرۋدى ۇسىنامىز. ەكىنشىدەن، ۇلتتىق قۇندىلىقتاردى مەملەكەتتىك دەڭگەيدە ناسيحاتتاۋ، ب ا ق- تا، مەكتەپ جانە وتباسىندا، قوعامدىق ينستيتۋتتاردا كەڭىنەن تانىم- تۇسىنىك جۇمىستارىن جۇرگىزۋ كەرەك. ۇشىنشىدەن، ءدىن ىستەرى باسقارمالارىن بارلىق وڭىرلەردە بولەك باسقارما رەتىندە قايتا اشۋ جانە ولاردىڭ كادرلىق الەۋەتىن كۇشەيتۋدى سۇرايمىز»، - دەدى دەپۋتات.
اۆتور
رۋسلان عابباسوۆ
