جاستارعا ەنەرگەتيكالىق سۋسىندار ساتۋعا تىيىم سالىنادى - ءماجىلىس زاڭ قابىلدادى
استانا. KAZINFORM - قازاقستاندا 21 جاسقا تولماعان ادامدارعا ەنەرگەتيكالىق سۋسىنداردى ساتۋعا تىيىم سالىنادى. بۇل نورما بۇگىن ءماجىلىستىڭ جالپى وتىرىسىندا قابىلدانعان لوتەرەيا قىزمەتى ماسەلەلەرى بويىنشا وزگەرىستەر ەنگىزۋ تۋرالى زاڭدا قامتىلدى. ءماجىلىس دەپۋتاتى ەلنۇر بەيسەنبايەۆتىڭ ايتۋىنشا، قۇمار ويىندارعا اۋەستەنگەن ازاماتتار ءتۇنى بويى سەرگەك ءجۇرىپ، قۇمار ويىن ويناۋ ءۇشىن ەنەرگەتيكالىق سۋسىنداردى كوپتەپ الادى.
«قارجىلىق مونيتورينگ اگەنتتىگى مالىمەتىنە قاراعاندا، قازىر كامەلەتكە تولماعان 200 مىڭنان استام ادام تۇراقتى تۇردە قۇمار ويىن ويناعان. بۇل جاسوسپىرىمدەر دە ەنەرگەتيكالىق سۋسىنداردى ءىشىپ وتىرىپ، ءباس تىگۋلەرى مۇمكىن. ەنەرگەتيكالىق سۋسىندار الكوگولدەن دە قاۋىپتى بولدى. قازىر 10 جاسار بالا دا ەنەرگەتيكالىق سۋسىندى وڭاي ساتىپ الادى. وسىعان وراي مەملەكەت باسشىسىنىڭ تاپسىرماسىن ورىنداۋ ماقساتىندا 21 جاسقا تولماعان ادامدارعا ەنەرگەتيكالىق سۋسىنداردى ساتۋعا تىيىم سالىندى»، - دەدى دەپۋتات.
ايتا كەتەيىك، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيالار جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكىنشى وقىلىمدا قارالىپ، قابىلداندى.
بۇعان دەيىن دەپۋتات ەلىمىزدە 400 مىڭداي ادام بۋكمەكەرلەر مەن كازينولاردىڭ تۇراقتى كليەنتىنە اينالعانىن ايتقان ەدى.
اۆتور
رۋسلان عابباسوۆ
