جاساندى ينتەللەكت شەنەۋنىكتەردى الماستىرا ما

ونىڭ نەگىزگى مىندەتى - مەملەكەتتىك اپپارات جۇمىسىنىڭ تيىمدىلىگىن ارتتىرۋ. بۇل تۋرالى جۋرناليستەردىڭ سۇراعىنا جاۋاپ بەرگەن جاساندى ينتەللەكت جانە سيفرلىق دامۋ ۆيتسە-ءمينيسترى باحتيار مۇحامەتقاليەۆ مالىمدەدى.

ۆيتسە- ءمينيستردىڭ ايتۋىنشا، باستى ماقسات ادامداردى تەحنولوگيامەن الماستىرۋ ەمەس، ولاردىڭ جۇمىس تيىمدىلىگىن ارتتىرۋ.

- بۇل جەردە قانداي دا ءبىر الماستىرۋ ماقساتى جوق. مىندەت تيىمدىلىكتى ارتتىرۋ. جالپى، جاساندى ينتەللەكت تەحنولوگياسىنىڭ ءوزى كەيبىر ماماندىقتارعا اسەر ەتەتىنى ءسوزسىز. بۇعان دەيىن دە يندۋستريالىق ريەۆوليۋتسيا بولدى. ەستەرىڭىزدە بولسا، بۋ قوزعالتقىشىنىڭ پايدا بولۋى ەڭبەك قۇرىلىمىن تۇبەگەيلى وزگەرتتى. بۇل جەردە دە قايتالاپ ايتامىن: شەنەۋنىكتەردى الماستىرۋ دەگەن مىندەت جوق. مىندەت - ولاردىڭ جۇمىسىن كۇشەيتۋ ،- دەپ ءتۇسىندىردى باحتيار مۇحامەتقاليەۆ.

ول ستراتەگيانىڭ جەكە ءبىر باعىتى ادامي كاپيتالدى دامىتۋعا ارنالعان، ونىڭ اياسىندا حالىقتىڭ ءارتۇرلى توپتارىنا ارنالعان ارنايى باعدارلامالار قاراستىرىلعانىن اتاپ ءوتتى.

باحتيار مۇحامەتقاليەۆتىڭ ايتۋىنشا، سيفرلىق ترانسفورماتسيانىڭ نەگىزگى باعىتتارىنىڭ ءبىرى - جاساندى ينتەللەكتىنى مەملەكەتتىك اپپاراتقا ەنگىزۋ. بۇل رەتتە پروتسەستەردىڭ تيىمدىلىگىن 30 پايىزعا دەيىن ارتتىرۋ مىندەتى قويىلعان.

ول مەملەكەتتىك قىزمەتشىلەر ۋاقىتىنىڭ ەداۋىر بولىگى تاپسىرمالارعا جاۋاپ دايىنداۋعا، اقپارات جيناپ، ونى تەكسەرۋگە، سونداي-اق ماتەريالداردى بەيىندى دەپارتامەنتتەرمەن، مينيسترلىكتەرمەن جانە باسقا دا مەملەكەتتىك ورگاندارمەن كەلىسۋگە جۇمسالاتىنىن ءتۇسىندىردى.

جاساندى ينتەللەكت وسى جۇمىستاردىڭ ءبىر بولىگىن اۆتوماتتاندىرا الادى. اتاپ ايتقاندا، ول ۇلكەن كولەمدەگى اقپاراتتى جىلدام وڭدەۋگە، قىسقاشا قورىتىندى دايىنداۋعا، قاجەتتى مالىمەتتەردى تابۋعا جانە جاۋاپ جوبالارىن ازىرلەۋگە مۇمكىندىك بەرەدى.

- قازىر ەنگىزۋ بارىسىندا، ءوزىم ايتقانداي، ءبىر مينيسترلىكتە پيلوتتىق رەجيمدە قولدانىپ جاتىرمىز. ول جاۋاپ جوبالارىن دايىنداۋعا، قاجەتتى اقپاراتتى بىردەن تابۋعا مۇمكىندىك بەرەدى. بۇل رەتتە زاڭناما تالاپتارى ساقتالادى،- دەدى ۆيتسە-مينيستر.

سونىمەن قاتار ول جاساندى ينتەللەكتىنى مەملەكەتتىك اپپاراتقا ەنگىزۋدىڭ وزىندىك ەرەكشەلىكتەرى بار ەكەنىن اتاپ ءوتتى. سەبەبى بۇل جەردە قۇپيا ءارى سەزىمتال اقپاراتپەن جۇمىس ىستەۋ ماسەلەسى بار جانە اقپاراتتىق قاۋىپسىزدىك تالاپتارىن ساقتاۋ قاجەت. جاساندى ينتەللەكتىنىڭ ارقاسىندا مەملەكەتتىك قىزمەتشىلەردىڭ ۋاقىتى ۇنەمدەلىپ، ولار بوسايتىن ۋاقىتتى اناعۇرلىم ماڭىزدى مىندەتتەرگە باعىتتاي الادى.

- زامان تالابىنا ساي ءجۇرۋ ماڭىزدى. ءتىپتى ودان دا جاقسىسى - زاماننان وزىپ، وسى تەحنولوگيالاردى بەيىمدەي ءبىلۋ نەمەسە ولاردى ءوزىمىز جاساۋ، - دەپ اتاپ ءوتتى ول.

بۇعان دەيىن سيفرلاندىرۋعا بايلانىستى ح ق ك و قىزمەتكەرلەرى قىسقارتىلمايتىنىن جازعانبىز.