جاساندى ينتەللەكت داۋىرىندە گۋمانيتارلىق باعىتتى كۇشەيتۋى كەرەك - ايماعامبەتوۆ
استانا. KAZINFORM - ج ي داۋىرىندە ادام ءوز بەتىنشە ويلانۋ، قايتا وقۋ قابىلەتىن ساقتاپ قالۋى ءتيىس. بۇل تۋرالى پارلامەنت ماجىلىسىندە جوعارى ءبىلىمدى كادرلاردى دايارلاۋ تاقىرىبىنا ارنالعان ۇكىمەت ساعاتىندا دەپۋتات اسحات ايماعامبەتوۆ ءمالىم ەتتى.
- ەسكى مودەل قانداي ەدى؟ وقىتۋشى ءبىلىم بەرەدى، ستۋدەنت ونى ەمتيحاندا دالەلدەيدى، ديپلوم الادى، جۇمىسقا تۇرادى. ەندى، بۇل لوگيكا ءۇزىلدى. بۇگىن ستۋدەنت ج ي-دىڭ كومەگىمەن ءۇش مينۋتتىڭ ىشىندە كەز كەلگەن ديپلومدىق جۇمىستان ارتىق بيزنەس-جوسپار نەمەسە تالداۋ جاساپ الادى. ەندىگى قۇندىلىق - ج ي-دىڭ قولىنان كەلمەيتىن ارەكەتتە، ياعني تازا ادامي قۇزىرەتتىلىكتەردە. سوندىقتان ءبىزدىڭ ءبىر قاراعاندا وعاش كورىنەتىن تۇجىرىمىم مىنانداي: ج ي داۋىرىندە ۋنيۆەرسيتەت ناقتى ماماندىقتارعا قامالىپ قالماي، ىرگەلى جانە گۋمانيتارلىق باعىتتى كۇرت كۇشەيتۋى كەرەك - «فيلوسوفيا»، «سوتسيولوگيا»، «تىلدەر»، «لوگيكا»، «ەتيكا».
اشىعىن ايتقاندا، ءبىز بۇل پاندەرگە «باللاست» رەتىندە قاراۋعا ۇيرەنىپ قالعانبىز. جوعارى وقۋ ورىندارى پروفيلدىك ساعاتتاردى كوبەيتۋ ءۇشىن وسى پاندەردى قىسقارتىپ جاتىر. بۇل - ستراتەگيالىق قاتەلىك! قاراڭىزدار، بۇرىن باعدارلامالاۋ ءۇشىن Python ءتىلىن ءبىلۋ كەرەك بولسا، بۇگىن «ۆايب-كودينگ» زامانى كەلدى. ءسىز ماقساتتى قاراپايىم تىلمەن سيپاتتاپ بەرەسىز، ال ج ي دايىن كودتى ءوزى جازىپ بەرەدى. سوندىقتان ەندى ساپالى پرومپت جازۋ ءۇشىن ماسەلەنىڭ ءمانىن ءتۇسىنۋ، كونتەكست پەن ونىڭ سالدارىن كورە ءبىلۋ قاجەت، - دەدى اسحات ايماعامبەتوۆ.
ونىڭ پايىمىنشا، بۇعان تەك ىرگەلى گۋمانيتارلىق ءبىلىم عانا ۇيرەتەدى. ج ي كومپانيالارىنىڭ وسىنداي گۋمانيتارلىق ءبىلىمى مىقتى مامانداردى كوپتەپ جالداۋى دا تەگىن ەمەس: ولار سۇراق قويا بىلەدى، سىني تۇرعىدان ويلايدى جانە ماسەلەگە كەڭىنەن قارايدى.
- قازىرگى ۋنيۆەرسيتەتتىڭ ەندىگى باستى مىندەتى - تەك جۇمىسقا دايىنداۋ ەمەس. ول ماماندىقتار تەز اۋىساتىن، كوپ دۇنيە اۆتوماتتاندىرىلعان الەمدە ءومىر سۇرۋگە دايىنداۋى ءتيىس. ادام ءوز بەتىنشە ويلانۋ، قايتا وقۋ جانە ءومىردىڭ ءمانىن تابا ءبىلۋ قابىلەتىن ساقتاپ قالۋى ءتيىس، - دەدى دەپۋتات.
بۇدان بۇرىن حابارلانعانداي، 2035 -جىلعا قاراي قازاقستاندا 562 كاسىپ نەمەسە ەڭبەك نارىعىنىڭ %44 ى (شامامەن 4 ميلليون ادام) جاساندى ينتەللەكتىنىڭ ىقپالىمەن وزگەرۋى مۇمكىن.
