جارىس الدىندا مەدالمەن ورالاتىنىن ايتتى - وليمپيادا جۇلدەگەرى يسلام ساتپايەۆتىڭ اناسى

الماتى. KAZINFORM - پنيەۆماتيكالىق ۆينتوۆكامەن 10 مەترگە نىسانا كوزدەۋدەن ارالاس كوماندالىق سىندا يسلام ساتپايەۆ پەن الەكساندرا لە وليمپيادانىڭ قولا جۇلدەسىن جەڭىپ الدى.

 وسىعان وراي Kazinform ءتىلشىسى يسلام ساتپايەۆتىڭ اناسى ءاليا ساتپايەۆامەن حابارلاسىپ، از- كەم اڭگىمەلەستى.

ءاليا ساتپايەۆا ۇلىنىڭ جەڭىسىن بىلگەندە كوز جاسىنا ەرىك بەرگەنىن ايتادى.

- تاڭەرتەڭنەن بەرى تەلەديداردى قوسىپ، جارىستى كۇتىپ وتىردىق. جۇلدە العانىن بىلگەندە جىلاپ قالدىم. قاتتى قۋاندىم. بالامنىڭ جەڭىسىنە ريزامىن. قازاقستان مەنىڭ ۇلىمدى ءوسىردى. قازاق ەلىنە العىسىم شەكسىز، - دەدى ول.

وليمپيادا جۇلدەگەرىنىڭ اناسى يسلام ساتپايەۆتىڭ جارىس الدىنداعى دايىندىعى قالاي وتكەنىن ايتىپ بەردى. ونىڭ سوزىنشە، سپورتشى اناسىنا جارىس الدىندا ەلگە جۇلدەمەن ورالۋعا ۋادە بەرگەن.

- ولار پاريجگە دەيىن وقۋ- جاتتىعۋ جيىندارىنا كەتىپ، سول جاقتا قونىپ، سول جاقتا ءومىر ءسۇردى. ءاردايىم جاتتىعۋمەن ءجۇردى. دايىندىعى ويداعىداي ءوتتى. ءحالىن سۇراپ، حابارلاسقان كەزدە ماعان: «اناشىم، ۋايىمداما، ءبارى دۇرىس، دايىندالىپ جاتىرمىن» دەپ ايتاتىن. سوسىن ول وليمپياداعا جولداما العان كەزدە قاتتى قۋاندى. پاريج ىستىق دەيدى. بارلىعى ۇناعانىن ايتتى. جارىس الدىندا «كۇتىڭىزدەر، بۇيىرسا مەدالمەن كەلەمىن» دەگەنى بار، - دەدى سپورتشى اناسى.

سونداي- اق ءاليا ساتپايەۆا ۇلىنىڭ نىسانا كوزدەۋ سپورتىن ءوزى ۇناتىپ، تاڭداعىنىن ەرەكشە اتاپ ءوتتى.

- وتباسىمىزدا ەشكىم سپورتشى بولعان جوق. 7 -سىنىپتا وقىپ جۇرگەندە وسى سپورتقا ءوزى باردى. كەيىن نىسانا كوزدەۋ ۇناپ، اتالعان سپورت تۇرىنەن جەتكىستىكتەرگە جەتە باستادى، - دەدى ءاليا ساتپايەۆا.

اۆتور

دوسبول اتاجان