جاقىندا قازاقستان مەن قىتاي ترانسشەكارالىق سۋ رەسۋرستارىن ءبولۋ كەلىسىمىن بەكىتۋى مۇمكىن

استانا. KAZINFORM - قازىر قازاقستان مەن قىتاي ەكى ەل اراسىنداعى ترانسشەكارالىق سۋ رەسۋرستارىن ءبولۋ تۋرالى كەلىسىمنىڭ جوباسىن ازىرلەپ جاتىر. جاقىن ارادا بۇل قۇجات بەكىتىلۋى مۇمكىن.

بۇل تۋرالى ق ر سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز ءمالىم ەتتى.

«جالپى، ورتالىق ازيا ەلدەرىمەن جانە رەسەيمەن ءتيىستى شارتتار بار. قازىر قىتايمەن ارادا سۋ ءبولۋ بويىنشا كەلىسىم جوباسىن پىسىقتاپ جاتىرمىز. ازىرگە، وعان قول قويىلمادى، ياعني بەكىتۋگە جاقىنداپ قالدىق. وسى قۇجات جوباسىن ءبىراز جىلدان بەرى تالقىلاپ كەلەمىز. ق ح ر- مەن ارادا ترانسشەكارالىق 25 وزەن بار، سونىڭ ىشىندە ەكەۋىندە عانا اعىن كولەمىن بىلەمىز. وسى ەكى وزەندە گيدروبەكەتتەر بولدى. ال قالعانىندا ءتيىستى جابدىقتار ەسكەرىلمەگەن»، - دەدى ب. بەكنياز ەلوردادا وتكەن جيىندا تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، بۇل باعىتتا زەرتتەۋلەر ۇيىمداستىرىلدى.

«ءبىزدىڭ ماماندار قىتايعا ساپارلادى، سونداي-اق كورشى ەلدىڭ ساراپشىلارى بىزگە كەلدى. بىرلەسىپ بۇكىل وزەندەردى زەرتتەدىك. اتالعان كەلىسىمدى بەكىتۋ ءۇشىن وسى وزەندەرگە قاتىستى ناقتى دەرەكتەردى انىقتاۋ كەرەك. قازىر قانشا سۋ كەلەتىنىن ءبىلىپ وتىرمىز»، - دەدى ۆيتسە-مينيستر.

بۇدان بۇرىن حابارلانعانداي، قازاقستاندا سۋ سەكتورىن دامىتۋ بويىنشا سەرىكتەستەردىڭ ۇيلەستىرۋ كەڭەسى قۇرىلدى. وعان سۋ رەسۋرستارى جانە يرريگاتسيا مينيسترلىگىنىڭ، ب ۇ ۇ دامۋ باعدارلاماسى (ب ۇ ۇ د ب) مەن حالىقارالىق ۇيىمداردىڭ، قارجى ينستيتۋتتارىنىڭ، دونورلىق قاۋىمداستىقتاردىڭ جانە باسقا دا ءبىرقاتار قۇرىلىمداردىڭ وكىلدەرى كىرەدى.