جاقىن كۇندەرى قازاقستاندىقتار سيرەك كەزدەسەتىن قۇيرىقتى جۇلدىز كورە الادى
استانا. قازاقپارات -جاقىن كۇندەرى ەل تۇرعىندارى سيرەك كەزدەسەتىن استرونوميالىق قۇبىلىستى كورە الادى، دەپ حابارلايدى 24kz.
بىلتىر قىتاي استروفيزيكتەرى ATLAS قۇيرىقتى جۇلدىزىنىڭ كۇنگە جاقىنداپ كەلە جاتقانىن انىقتاعان. جاقىنداعان سايىن جارقىراي تۇسكەن قۇيرىقتى جۇلدىزدى تۇندە ايقىن كورۋگە بولادى. كەڭىستىكتەگى قۇبىلىستى قاشان جانە قالاي تاماشالاۋعا بولاتىنىن وتاندىق استروفيزيكتەر ايتىپ بەردى.
ATLAS قۇيرىقتى جۇلدىزىن العاش رەت قىتايدىڭ نانكين قالاسىندا ورنالاسقان وبسەرۆاتوريا عالىمدارى بايقاعان. ءاۋ باستا كەڭىستىكتەگى استەرويدتاردىڭ ءبىرى دەپ ويلاعان. مۇقيات باقىلاعاننان كەيىن قۇيرىقتى جۇلدىز ەكەنىنە كوز جەتكىزىپتى. ATLAS كۇنگە قاراي جىلدام قوزعالىپ بارادى جانە ارتىنان كۇل ۇشقىندارى قالۋدا. قازىر جۇلدىزدىڭ قۇيرىعى ۇزارىپ، 2,5 گرادۋسقا جەتكەن. استروفيزيك سۆەتلانا موشكينانىڭ ايتۋىنشا، قۇيرىقتى جۇلدىز كوزبەن كورەتىندەي جاقىنداي تۇسكەن.
سۆەتلانا موشكينا، ۆ. فەسەنكوۆ اتىنداعى استروفيزيكا ينستيتۋتىنىڭ عىلىمي قىزمەتكەرى:
- الماتى تۇرعىندارى قۇيرىقتى جۇلدىزدى 9-10-قازان كۇنى كۇن باتقاننان كەيىن بايقاي الادى. كۇن باتىپ ىمىرت ۇيىرىلە باستاعان كەزدە اسپان اشىق بولسا، جارقىراعان سىزىقتى بايقاۋعا بولادى. ول جۇلدىزدىڭ قۇيرىعى ATLAS- تىڭ ءوزى بىرنەشە كۇننەن كەيىن كورىنەدى.
الايدا قۇيرىقتى جۇلدىزدى تاماشالاۋعا اۋا رايى كەدەرگى بولۋى مۇمكىن. سەبەبى ەل اۋماعىنا سولتۇستىك اتلانتيكالىق سيكلون باعىت العان. 11 -قازان كۇنى اسپان بۇلتتى بولادى. اۋا رايى تەك 14-قازاندا اشىلادى دەگەن بولجام بار.
سۆەتلانا موشكينانىڭ ايتۋىنشا، ATLAS قۇيرىقتى جۇلدىزىن باتىس قازاقستان تۇرعىندارى انىق كورە الادى.
سۆەتلانا موشكينا، ۆ. فەسەنكوۆ اتىنداعى استروفيزيكا ينستيتۋتىنىڭ عىلىمي قىزمەتكەرى:
- «قازگيدرومەتتىڭ» مالىمەتىنشە، ەلىمىزدىڭ باتىسىنداعى اتىراۋ، ورال وڭىرىنە سيكلون اسەر ەتپەيدى. سوندىقتان باتىستىقتار تاڭاعاجايىپ قۇبىلىستى باقىلاي الادى. وعان قوسا، تەڭىزدىڭ جاعاسىندا اسپان اشىق، جەر تەگىس بولعاندىقتان جاقسى كورىنەدى. 12-قازان كۇنى اتالعان كومەتا جەرگە بارىنشا جاقىن بولادى. ناقتىراق ايتساق، قاشىقتىق جارتى استرونوميالىق بىرلىككە تەڭ نەمەسە 70 ميلليون شاقىرىم. ارمەن قاراي ATLAS كۇننەن الىستاعان سايىن ساۋلەسى دا سونە باستايدى.
24-قازاننان كەيىن قۇيرىقتى جۇلدىزدى تەلەسكوپ ارقىلى عانا كورۋگە بولادى. ەڭ قىزىعى، ATLAS قۇيرىقتى جۇلدىزى قايتىپ ورالمايدى. ءبىزدىڭ عالامشاردان الىستاي بەرەدى ەكەن.
