جالعان اقپارات پەن ءدىني ارانداتۋعا قاتىستى قاتاڭ شارالار قابىلدانادى - پروكۋراتۋرا

ۆەدومستۆو مالىمەتىنشە، سوڭعى ۋاقىتتا جەكەلەگەن تۇلعالاردىڭ ۇلتتىق داستۇرلەرگە، ادەت-عۇرىپتارعا جانە كوپعاسىرلىق تاريحى بار ناۋرىز مەيرامىن اتاپ وتۋگە قاتىستى تەرىس پىكىرلەردى جاريا تۇردە تاراتۋ دەرەكتەرى تىركەلگەن.

اتالعان پىكىرلەر داستۇرلەر مەن ادەت-عۇرىپتاردى جالعان ءدىني دوگمالارمەن ۇيلەسپەيدى دەگەن بۇرمالانعان تۇجىرىمدارمەن نەگىزدەلگەن.

- مۇنداي مالىمدەمەلەر قازاقستاننىڭ زايىرلى مەملەكەت رەتىندەگى كونستيتۋتسيالىق قاعيدالارىنا قايشى كەلەدى. سونىمەن قاتار ولار قوعامدىق كەلىسىمگە، ۇلتارالىق جانە ءدىنارالىق تاتۋلىققا زيان كەلتىرۋى مۇمكىن، - دەپ مالىمدەدى باس پروكۋراتۋرا.

سونداي-اق ۆەدومستۆو جۋرناليستەردىڭ، بلوگەرلەردىڭ جانە اقپاراتتىق الاڭ يەلەرىنىڭ جاۋاپكەرشىلىگىنە ەرەكشە نازار اۋداردى.

- جالعان ءدىني كوزقاراستاردى ناسيحاتتايتىن تۇلعالارعا كوپشىلىك الدىندا ءسوز بەرۋ ارانداتۋشىلىق سيپاتتاعى مالىمدەمەلەردىڭ تارالۋىنا ىقپال ەتەدى. بۇل قوعام ساناسىنا تەرىس اسەر ەتىپ، گەندەرلىك تەڭسىزدىكتى ناسيحاتتاپ، ايەلدەردىڭ ار- نامىسى مەن قادىر-قاسيەتىن قورلاۋعا اكەلۋى مۇمكىن، - دەلىنگەن حابارلامادا.

باس پروكۋراتۋرا ماسس-مەديا وكىلدەرىن كاسىبي ەتيكانى، وبەكتيۆتىلىكتى ساقتاۋعا جانە قوعامدىق كەلىسىمگە ءقاۋىپ توندىرەتىن يدەيالاردى تاراتپاۋعا شاقىردى.

ۆەدومستۆو ەسكەرتكەنىندەي، كورىنەۋ جالعان اقپارات تاراتۋ قر قىلمىستىق كودەكسىنىڭ 274-بابىنا سايكەس جاۋاپتىلىققا اكەپ سوعادى.

ال ۇلتتىق، ءدىني نەمەسە الەۋمەتتىك الاۋىزدىقتى قوزدىرۋعا باعىتتالعان ارەكەتتەر قىلمىستىق كودەكستىڭ 174-بابى بويىنشا اۋىر قىلمىس رەتىندە قاراستىرىلادى.

سونداي- اق مۇنداي ارەكەتتەر ءدىني قىزمەت جانە ءدىني بىرلەستىكتەر تۋرالى زاڭنامانى بۇزۋ رەتىندە باعالانىپ، اكىمشىلىك قۇقىق بۇزۋشىلىق تۋرالى كودەكستىڭ 490-بابىنا سايكەس جاۋاپكەرشىلىككە اكەلۋى مۇمكىن.

باس پروكۋراتۋرا ازاماتتاردى جالعان اقپارات تاراتۋدان باس تارتۋعا، ۇلتتىق جانە مادەني قۇندىلىقتارعا قۇرمەتپەن قاراۋعا جانە قوعامدا الاۋىزدىق تۋدىراتىن مالىمدەمەلەرگە جول بەرمەۋگە شاقىردى.

قۇقىق قورعاۋ ورگاندارى مۇنداي فاكتىلەر انىقتالعان جاعدايدا زاڭناماعا سايكەس قاتاڭ شارالار قابىلدايتىنىن اتاپ ءوتتى.

ايتا كەتەيىك، بۇعان دەيىن «102» - گە جالعان قوڭىراۋ شالعاندارعا قانداي جازا قولدانىلاتىنى حابارلاندى.