ج ءى ءو- نى 450 ميلليارد دوللارعا جەتكىزۋ ءورشىل، ءبىراق مۇمكىن مىندەت - ۇكىمەت باسشىسى
استانا. KAZINFORM - پرەمەر- مينيستر ولجاس بەكتەنوۆ ۇكىمەت وتىرىسىنان كەيىن ءوتىپ جاتقان باسپا ءسوز ءماسليحاتىندا 2029 -جىلعا دەيىن جالپى ىشكى ءونىمدى 450 ميلليارد دوللارعا جەتكىزۋ تۋرالى پرەزيدەنت تاپسىرماسىن ورىنداۋ قانشالىقتى مۇمكىن ەكەنى تۋرالى پىكىر ءبىلدىردى.
- ءبىزدىڭ ويىمىزشا، بۇل - ءورشىل مىندەت. ءبىراق قول جەتكىزۋگە بولادى. بىلتىر جالپى ىشكى ءونىمنىڭ كولەمى 286 ميلليارد دوللار بولدى. بيىل ەكونوميكانىڭ ءوسۋ كورسەتكىشتەرىن ەسكەرسەك، 300 ميلليارد دوللارعا جەتكىزۋ تۋرالى مەجەگە ءۇمىت ارتىپ وتىرمىز. ەكونوميكانى قارقىنمەن ءوسۋىن قامتاماسىز ەتە الساق، 450 ميلليارد دوللاردىڭ مەجەسىن باعىندىرۋعا تولىقتاي بولادى، - دەدى ول جۋرناليست سۇراعىنا بەرگەن جاۋابىندا.
سونداي-اق ۇكىمەت باسشىسى بۇل ءۇشىن ەلدىڭ ونەركاسىپ الەۋەتىن ارتتىرۋ، ەكونوميكانى ءارتاراپتاندىرۋ، جوعارى بولىنىستەگى ءوندىرىستى دامىتۋ باعىتتارىندا ۇلكەن جۇمىس ءجۇرىپ جاتقانىن ايتتى.
- «بايتەرەك» حولدينگى ارقىلى قوماقتى قاراجات قاراستىرىلعانىن تالاي رەت ايتتىق. بۇل بيىلدىڭ وزىندە ەكونوميكاعا 8 تريلليون تەڭگەدەن استام قاراجات بولۋگە مۇمكىندىك بەرەدى، - دەدى پرەمەر- مينيستر.
ايتا كەتسەك، بۇگىنگى ۇكىمەت وتىرىسىندا پرەمەر- ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ۇكىمەت وتىرىسىندا جىلدىڭ 6 ايىندا ەل ەكونوميكاسى 6,2 پايىز ءوسىم كورسەتكەنىن ءمالىم ەتكەن ەدى.
