IT سالاسىنداعى تالانتتى جاستاردى ارناۋلى ورگاندارعا قىزمەتكە تارتۋعا دەن قويىلادى
استانا. KAZINFORM - ەلدە سيفرلىق قاۋىپسىزدىك سالاسىنداعى مامانداردى قولداۋعا ەرەكشە نازار اۋدارىلادى. بۇل تۋرالى ءماجىلىستىڭ جالپى وتىرىسىندا ارناۋلى مەملەكەتتىك ورگاندارىنىڭ قىزمەتى ماسەلەلەرى بويىنشا زاڭ جوباسىن تالقىلاۋ كەزىندە دەپۋتات بولات كەرىمبەك ءمالىم ەتتى.
- بۇگىندە قاراپايىم ازاماتتاردىڭ قۇقىقتارى مەن مۇددەلەرىن قورعاۋدا ينتەرنەت-قىلمىسقا قارسى ءتيىمدى كۇرەس جۇرگىزۋ جۇمىسى وتە ماڭىزدى. ءار ادامنىڭ جەكە دەرەگىنىڭ، قارجىسى مەن كۇندەلىكتى سيفرلىق ءومىرىنىڭ قاۋىپسىزدىگىن قامتاماسىز ەتۋ وزەكتى. ال بۇل قىزمەتتى ءتيىمدى اتقارۋ زاماناۋي سيفرلىق قۇزىرەت پەن اناليتيكالىق داعدىلارى بار جوعارى بىلىكتى كادرلارسىز مۇمكىن ەمەس. سوندىقتان زاڭ جوباسىندا IT سالاسىنداعى تالانتتى جاستاردى، قابىلەتتى مامانداردى ارناۋلى مەملەكەتتىك ورگاندارعا قىزمەتكە تارتۋ تەتىگى ۇسىنىلادى، - دەدى ب. كەرىمبەك.
ونىڭ ايتۋىنشا، حالىقارالىق تاجىريبە كورسەتكەندەي، IT-مامانداردى تارتۋدا يكەمدى تاسىلدەردى قولدانۋ مەملەكەتتىك ينستيتۋتتاردىڭ يننوۆاتسيالاردى تەزىرەك ەنگىزۋىنە، سيفرلىق دامۋدىڭ تيىمدىلىگىن ارتتىرۋىنا مۇمكىندىك بەرەدى.
بۇدان بۇرىن حابارلانعانداي، وتاندىق IT-كومپانيالار مەملەكەتكە كاسىپورىنداردا سيفرلىق جوبالاردى جۇزەگە اسىرۋعا قولداۋ كورسەتەدى.
