حاربين-2025: قازاقستان قۇراماسىنىڭ سپورتشىلارى جارىس وتەتىن ورىنداردىڭ ينفراقۇرىلىمىمەن تانىستى
استانا. KAZINFORM - قازاقستان ۇلتتىق وليمپيادالىق كوميتەتىنىڭ وكىلدەرى قىتايدىڭ حاربين قالاسىنا بارىپ، 2025 -جىلعى ازيا ويىندارىنىڭ قارساڭىندا العاشقى دايىندىق جۇمىستارىن جۇرگىزدى، دەپ حابارلايدى كوميتەت وكىلدەرى.

دەلەگاتسيا قازاقستان قۇراماسىنىڭ سپورتشىلارىن ءساتتى تىركەپ، جارىس وتەتىن ورىنداردىڭ ينفراقۇرىلىمىمەن جان-جاقتى تانىستى.
وليمپيادا ويىندارىنان ايىرماشىلىعى، حاربيندەگى ازيا ويىندارىندا ءبىرىڭعاي اتلەتتەر اۋماعى قاراستىرىلماعان.
قازاقستان ۇ و ك سپورت دەپارتامەنتىنىڭ باسشىسى بەكتۇر قياتبايدىڭ ايتۋىنشا، سپورتشىلار ەكى جەردە ورنالاسادى: حاربيننىڭ وزىندە جانە شاڭعى جارىستارى وتەتىن يابۋلي تاۋ شاڭعىسى كۋرورتىندا.
- بۇگىن ءبىز سپورتتىق ينفراقۇرىلىممەن تانىسىپ، بارلىق قاجەتتى اقپاراتتى الدىق. بۇل مالىمەتتەردى تولىقتاي كوماندالارعا جەتكىزۋگە دايىنبىز. جالپى، حاربين ازيا ويىندارىن وتكىزۋگە تولىق دايىن، جوعارى دەڭگەيدەگى ۇيىمداستىرۋ جۇمىستارى اۋەجايدان باستاپ-اق سەزىلەدى. بارلىق ماڭىزدى جايتتار ەسكەرىلگەن. بياتلون كومانداسىنا قارۋ-جاراقتى الىپ وتۋگە رۇقسات الۋ پروتسەسى دە ءساتتى ءوتتى. ينفراقۇرىلىم بويىنشا بارلىق نىساندار قاجەتتى تالاپتارعا ساي. سونىمەن قاتار اشىلۋ ءراسىمى وتەتىن الاڭ سپورتشىلار ورنالاساتىن قوناق ۇيگە جاقىن. بۇل وتە ىڭعايلى، ويتكەنى الىسقا بارۋدىڭ قاجەتى جوق. بۇل - حاربيندەگى ازيا ويىندارىنىڭ ەرەكشەلىكتەرىنىڭ ءبىرى.
تاماقتانۋ ماسەلەسىنە قاتىستى دا ەشقانداي سۇراق نەمەسە ەسكەرتۋ جوق. بارلىق قاجەتتى تالاپتار ەسكەرىلگەن، ءاربىر سپورتشى وزىنە قاجەتتى ءمازىردى تاڭداي الادى، - دەدى قازاقستان ۇ و ك سپورت دەپارتامەنتىنىڭ باسشىسى.
ايتا كەتەيىك، 2025 -جىلعى ازيا ويىندارى 7- 14 -اقپان ارالىعىندا حاربيندە وتەدى. قازاقستان قۇراماسى 3 -اقپاننان باستاپ مەدال ءۇشىن سايىسقا تۇسەدى.
ەسكە سالساق، IX قىسقى ازيا ويىندارى 2025 -جىلدىڭ 7-14-اقپانى ارالىعىندا قىتاي حالىق رەسپۋبليكاسى حيلۇڭجياڭ پروۆينتسياسىنىڭ حاربين قالاسىندا وتەدى. سپورتشىلار 11 سپورت ءتۇرى بويىنشا 64 مەدال جيىنتىعىن ساراپقا سالادى.
ق ر تۋريزم جانە سپورت مينيسترلىگىنىڭ حابارلاۋىنشا، قازاقستاننان 139 سپورتشى ەل نامىسىن قورعايدى.
اۆتور
مۇحتار قاليموللا ۇلى