حاماس- تىڭ جاڭا باسشىسى يزرايلمەن بىتىمگە كەلگىسى كەلەدى

استانا. KAZINFORM - حاماس- تىڭ جاڭا باسشىسى يزرايلمەن بىتىمگە كەلگىسى كەلەدى. بۇل تۋرالى CNN جازدى.

حاماس قوزعالىسى ساياسي بيۋروسىنىڭ بۇرىنعى باسشىسى يسمايل حانيا ولتىرىلگەننەن كەيىن ونىڭ ورنىنا سايلانعان ياحيا سينۆار مىسىر مەن كاتاردىڭ اراشاشىلارى ارقىلى يزرايلگە بەيبىتشىلىكتى قالايتىنىن جەتكىزگەن.

CNN- ءنىڭ يزرايلدەگى ەكى دەرەككوزىنىڭ حابارلاۋىنشا، پرەمەر- مينيستر بينيامين نەتانياحۋ كەلىسىمگە دايىن. ءبىراق يزرايل قاۋىپسىزدىك شەنەۋنىكتەرى كواليتسياداعى كەيبىر وڭشىل مينيسترلەردىڭ قارسىلىعىن ەسكەرە وتىرىپ، نەتانياحۋدىڭ ماقۇلداۋىنا كۇمانمەن قارايدى.

قارجى ءمينيسترى بەسالەل سموتريچ كەلىسىمگە قارسىلىق بىلدىرگەندەردىڭ ءبىرى بولىپ، ونى «جەڭىلىس» دەپ اتادى. ۇلتتىق قاۋىپسىزدىك ءمينيسترى يتامار بەن- گۆير دە قارسىلىق بىلدىرگەن.

ا ق ش شەنەۋنىكتەرى يزرايل باسشىلىعىنا ايماقتىق سوعىستىڭ الدىن الۋ ءۇشىن اتىستى توقتاتۋ تۋرالى كەلىسىمگە قول جەتكىزۋ كەرەكتىگىن ايتقان.

ايتا كەتەيىك، حاماس ساياسي بيۋروسىنىڭ باسشىسى يسمايل حانيا 31-شىلدەگە قاراعان ءتۇنى تەگەرانداعى قوناقۇيدە جارىلىس بولىپ، قازا تاپتى. يزرايل ۇكىمەتى رەسمي تۇردە حانيانىڭ ولىمىنە جاۋاپكەرشىلىكتى موينىنا العان جوق.

حانيانىڭ ولىمىنەن كەيىن يران يزرايلگە «شەكتەن شىققانىن» ايتىپ، «تەز ءارى قاتال» جاۋاپ بەرۋگە ۋادە بەردى.

سونىمەن بىرگە ا ق ش، مىسىر جانە كاتار بىرلەسكەن مالىمدەمەدە حاماس پەن يزرايلدى تەز ارادا اتىستى توقتاتۋعا جانە يزرايلدىك كەپىلگە الىنعانداردى بوساتۋ تۋرالى كەلىسىمگە كەلۋگە شاقىردى. مەدياتورلار تاراپتار كەلىسسوزدەردى 15-تامىزدا وتكىزەدى دەپ وتىر. يزرايل كەزدەسۋگە كەلىستى، ءبىراق حاماس ءالى جاۋاپ بەرگەن جوق.

اۆتور

جاراسقان نۇرىبايەۆ