حالىقتى دەسترۋكتيۆتى اعىمداردان مەملەكەت قانا قورعايدى - دەپۋتات
پارلامەنت سەناتىنىڭ دەپۋتاتى، الەۋمەتتىك- مادەني دامۋ جانە عىلىم كوميتەتىنىڭ ءتوراعاسى نۇرتورە ءجۇسىپ ءدىني اعىمداردان قورعايتىن زاڭدى جەتىلدىرۋ تۋرالى پىكىر ءبىلدىردى، دەپ حابارلايدى Kazinform.
«قازاقتىڭ ءداستۇرلى اتا ءدىنى بار، 20 ميلليون حالقىمىز بولسا، سونىڭ ىشىندە يسلام ءدىنىن ۇستاناتىن 14 ميلليون حالىق مولشەرىن انىقتاۋعا بولادى. اتا زاڭ بويىنشا زايىرلى قوعام ەسەپتەلەمىز. ءداستۇرلى ەمەس، دەسترۋكتيۆتى ءتۇرلى اعىمدار وزدەرىنىڭ كوزقاراسىن قوعامعا، ازاماتتارعا تاڭۋ ۇدەرىسى كۇشەيدى. «نەگە باسىڭا مىنانى كيمەيسىڭ؟» بولماسا «نەگە بىلاي جۇرمەيسىڭ» دەگەن نارسە كوبەيىپ كەتتى. شولاق بالاق، قابا ساقالدىلاردىڭ كوبەيىپ كەتكەنىن حالىق كورىپ وتىر. حالىقتى، اسىرەسە جاس ۇرپاقتى ونداي دەسترۋكتيۆتى اعىمداردىڭ جەتەگىندە كەتۋدەن قورعايتىن مەملەكەت قانا. مەملەكەت ءوزىنىڭ زاڭىمەن قورعاۋى كەرەك. سوندىقتان دىنگە قاتىستى زاڭنامالاردى جەتىلدىرۋ ماسەلەسى وتە وزەكتى دەپ ەسەپتەيمىن»، - دەدى ن. ءجۇسىپ Jibek joly تەلەارناسىنداعى ۋادە» باعدارلاماسىندا.
دەپۋتات ءدىني ساۋاتقا كوپ نارسە بايلانىستى ەكەنىن باسا ايتتى.
«ءبىزدى ەندى ناداندىققا يتەرمەلەپ، ورتا عاسىرعا قايتادان الىپ كەلۋگە ۇمتىلۋشىلىقتى ءوز باسىم قۇپتامايمىن جانە قولدامايمىن. قازىر عاسىر بولەك، پرەزيدەنتتىڭ ايتىپ وتىرعانى قايدا، ءبىز قايدامىز؟ باسەكەلەستىك، ءوزىڭىز ايتقان ۇلت بولمىسى ماسەلەلەرىندە كوزى قاراقتى، كوكىرەگى وياۋ قازاق بولماسا، ءتۇرلى اعىمنىڭ جەتەگىندە كەتەدى»، - دەدى سەناتور.
بۇعان دەيىن نۇرتورە ءجۇسىپ جۋرناليستەردىڭ ەش ساناتقا جاتپايتىنىن، ولاردى قورعايتىن مەحانيزم كەرەگىن ايتقان ەدى.
