حالىقارالىق وليمپيادالىق كوميتەتكە جاڭا پرەزيدەنت سايلاندى

استانا. قازاقپارات - 23 -ماۋسىم كۇنى، حالىقارالىق وليمپيادا كۇنىندە، لوزاننا قالاسىنداعى وليمپيادا ۇيىندە حالىقارالىق وليمپيادالىق كوميتەتى (ح و ك) پرەزيدەنتىنىڭ وكىلەتتىگىن تابىستاۋ ءراسىمى ءوتتى.

2013 -جىلدان بەرى ح و ك-تى باسقارعان توماس باح ءوز وكىلەتتىگىن رەسمي تۇردە زيمبابۆەدەن شىققان جۇزۋدەن ەكى دۇركىن وليمپيادا چەمپيونى كيرستي كوۆەنتريگە تاپسىردى. جاڭا پرەزيدەنت ءتۇن ورتاسىندا ءوز قىزمەتىنە رەسمي كىرىسەدى. بۇل تۋرالى ق ر ۇلتتىق وليمپيادا كوميتەتى حابارلادى.

كوۆەنتري ح و ك- تىڭ تاريحىنداعى ونىنشى پرەزيدەنت جانە العاشقى ايەل، سونداي-اق بۇل لاۋازىمعا تاعايىندالعان افريكا قۇرلىعىنىڭ العاشقى وكىلى اتاندى. ول بيىل ناۋرىز ايىندا گرەكيانىڭ وليمپيا قالاسىندا وتكەن ح و ك-تىڭ 144-سەسسياسىندا سەگىز جىل مەرزىمگە سايلانعان بولاتىن.

سالتاناتتى ءراسىم بارىسىندا توماس باح وليمپيادا ءۇيىنىڭ كىلتىن كوۆەنتريگە سالتاناتتى تۇردە تابىس ەتتى. بۇل ح و ك- تاعى باسشىلىقتىڭ اۋىسۋىن بىلدىرەتىن ءداستۇر. كىلتتى 1992 -جىلعى بارسەلونا وليمپياداسىنىڭ الاۋىن جاساعان يسپان ديزاينەرى اندرە ريكار ازىرلەگەن. شاراعا ح و ك مۇشەلەرى، سپورتشىلار، قوعام قايراتكەرلەرى مەن حالىقارالىق سەرىكتەستەر سياقتى 700-دەن استام قوناق قاتىستى.

سەمسەرلەسۋدەن وليمپيادا چەمپيونى، ح و ك- تىڭ توعىزىنشى پرەزيدەنتى توماس باح ۇيىمنىڭ ەڭ جوعارى ماراپاتى - التىن وليمپيادالىق وردەنىمەن ماراپاتتالدى. قوشتاسۋ سوزىندە ول ارىپتەستەرىنە العىس ءبىلدىرىپ، ءوز شەشىمىنىڭ ماڭىزىن اتاپ ءوتتى.

- جاڭا كەزەڭ جاڭا كوشباسشىلىقتى تالاپ ەتەدى. كيرستي كوۆەنتري - ءومىرى وليمپيادالىق قۇندىلىقتارمەن بىتە قايناسقان تۇلعا. ول ۇيىمعا جاڭا ءۇن مەن تىڭ كوزقاراس اكەلەدى. بۇل بولاشاق ءۇشىن اسا ماڭىزدى، - دەدى باح.

كوۆەنتري ءوز سوزىندە باحقا 12 جىلدىق ەڭبەگى ءۇشىن، وليمپيادالىق قاۋىمداستىقتاعى بىرلىك پەن قولداۋ ءۇشىن العىسىن ءبىلدىردى.

- ءسىز بىزگە «بىرلىك» يدەياسىنا نەگىزدەلگەن مۇرا قالدىردىڭىز. ءبىز بۇل مۇرامەن ماقتانا الامىز دەپ سەنەمىن. ەڭ قيىن كەزەڭدەردە دە ءسىز قۇندىلىقتارعا ادال بولدىڭىز. سىزگە العىسىم شەكسىز، - دەدى ول.

ول سونداي-اق سپورتشىلار كوميسسياسىنىڭ مۇشەسى رەتىندە باحپەن العاشقى كەزدەسۋى، باپكەرى مەن وتباسىنىڭ سپورتتاعى جولىنداعى ماڭىزى جانە بالالاردىڭ وعان وليمپيادالىق قوزعالىستىڭ ءمانىن ەسكە سالىپ وتىراتىنى جايىندا دا ايتتى.

- وليمپيادالىق قوزعالىس - جاي عانا سپورتتىق شارا ەمەس. بۇل - شابىت بەرەتىن، ءومىردى وزگەرتەتىن جانە ءۇمىت سىيلايتىن الاڭ. بولىنگەن الەمدە ول - بىرىكتىرۋشى كۇش بولا الادى، - دەدى.

كوۆەنتري بارشا قاۋىمدى بىرلەسىپ جۇمىس ىستەۋگە شاقىردى.

- ءبىزدىڭ ەكوجۇيەمىز ورمەكشىنىڭ تورىنداي كۇردەلى، ءبىراق ءبىز بىرلىكتى ساقتاساق، ول قۋاتتى بولا بەرەدى. اركىمنىڭ ءوز ءرولى بار. تەك بىرلەسە وتىرىپ قانا ءبىز جاڭا بۋىندى شابىتتاندىرىپ، ارمانداردىڭ ورىندالۋىنا جول اشا الامىز، - دەپ تۇيىندەدى جاڭا پرەزيدەنت.

ءراسىم الدىندا كيرستي كوۆەنتري مەن توماس باح زاماناۋي وليمپيادا ويىندارىنىڭ نەگىزىن قالاۋشى پەر دە كۋبەرتەننىڭ زيراتىنا بارىپ، ونىڭ قۇرمەتىنە گۇل شوعىن قويدى.

ايتا كەتەيىك، گرەكيانىڭ كوستا-ناۆارينو قالاسىندا وتكەن حالىقارالىق وليمپيادالىق كوميتەتىنىڭ (ح و ك) 144- سەسسياسىندا توماس باح ح و ك- ءنىڭ قۇرمەتتى پرەزيدەنتى بولىپ ءومىر بويىنا سايلاندى.