حالىقارالىق وليمپياداعا قاتىسقان ءاربىر ەكىنشى وقۋشى جۇلدەگەر بولدى - وقۋ-اعارتۋ مينيسترلىگى

استانا. قازاقپارات - 2024-2025 وقۋ جىلىندا قازاقستان وقۋشىلارى حالىقارالىق وليمپيادالاردا 362 مەدال جەڭىپ الدى.

بۇل تۋرالى ورتالىق كوممۋنيكاتسيالار قىزمەتىندەگى بريفينگتە وقۋ-اعارتۋ مينيسترلىگىنىڭ رەسمي وكىلى مەرەكە نۇرمۇحانوۆا ايتتى.

- 2024-2025 وقۋ جىلىنىڭ ەڭ باستى جەتىستىكتەرىنىڭ ءبىرى - حالىقارالىق وليمپيادالارعا قاتىسقان ءاربىر ەكىنشى قازاقستاندىق وقۋشىنىڭ ەلگە جۇلدەمەن ورالۋى. ۇلتتىق قۇراما قورجىنىندا - 362 مەدال، ونىڭ ىشىندە 41 التىن بار. بۇل - قازاقستان ءبىلىم ساپاسىنىڭ حالىقارالىق دەڭگەيدە جوعارى باعالانۋىنىڭ ايقىن دالەلى. اتالعان وقۋ جىلىندا 40 پايىزدان استام وقۋشى رەسپۋبليكالىق جانە حالىقارالىق دەڭگەيدەگى زياتكەرلىك شارالارعا قاتىستى، - دەدى ول.

رەسمي وكىلدىڭ دەرەگىنشە، ونىڭ ىشىندە قازاقستان وقۋشىلارى ازيا جانە الەمدىك وليمپيادالاردا بىلىمدەرىمەن ەرەكشە دارالانىپ، بەدەلدى ماراپاتتارعا يە بولدى. ولار لينگۆيستيكادان - «ەڭ ۇزدىك قاتىسۋشى»، فيزيكادان - «ەڭ ۇزدىك قاتىسۋشى قىز بالا»، حيميادان - «ەڭ ۇزدىك پراكتيك»، ينفورماتيكادان - «ەڭ ۇزدىك ينفورماتيك» اتاندى. حيميا پانىنەن ەڭ بەدەلدى حالىقارالىق وليمپيادادا - ەكى دۇركىن، First Global Challenge روبوتوتەحنيكا چەمپيوناتىندا ءۇش دۇركىن الەم چەمپيونى بولدى.

- بۇل مينيسترلىك تاراپىنان ءبىلىم ساپاسىن ارتتىرۋ باعىتىندا جۇرگىزىلىپ جاتقان جۇمىستاردىڭ ناقتى ناتيجەلىلىگى مەن تيىمدىلىگىن كورسەتەدى. بۇدان بولەك، قازاقستان - وليمپيادا جۇلدەگەرلەرىن قارجىلاي ىنتالاندىرۋ جۇيەسىن ەنگىزگەن بىردەن ءبىر ەل. 2024-جىلى حالىقارالىق بەدەلدى وليمپيادالاردا توپ جارعان 26 وقۋشىعا جانە ولاردى دايىنداعان پەداگوگتەرگە اقشالاي سىياقى بەرىلدى، - دەدى مەرەكە نۇرمۇحانوۆا.

وسىعان دەيىن قازاقستاندىق جاس حيميكتەر مەندەلەيەۆ وليمپياداسىندا 11 مەدال جەڭىپ العانىن جازدىق.