حالىق 7-20-25 باعدارلاماسىنا كىرگىزۋ ءۇشىن اقشا سۇراعانىن ايتىپ شاعىمداندى - داۋلەت مۇقايەۆ

 ءماجىلىس وتىرىسىندا حالىقتى تۇرعىن ۇيمەن قامتۋ ماسەلەسى تاعى قارالدى، دەپ حابارلايدى Kazinform اگەنتتىگى. 

депутат
Фото: Фото: Мәжіліс

«مەنىڭ قوزعايتىنىم - باسپانا ماسەلەسى. بىلەسىزدەر، اتالعان ماسەلە قازاقستاندىقتاردىڭ باس اۋرۋىنا اينالدى. اسىرەسە سوڭعى جىلدارى ماسەلە كۇرت شيەلەنىسكەندەي. باسپانا جايلى ءماجىلىس مىنبەرىنەن بىرنەشە رەت كوتەرگەن ەدىك. ۇكىمەت تاراپىنان ماردىمدى جاۋاپ بولمادى. ماعان ۇنەمى سىرعىتپا جاۋاپ كەلەدى. بۇگىنگى تاڭدا باسپانا نارىعى تۇرالاپ تۇر. ءۇي الۋدىڭ بارلىق باعدارلاماسى توقىراۋعا ۇشىرادى. ءوز دەپۋتاتتىق ساۋالىمدا «باقىتتى وتباسى» جانە «شاڭىراق» باعدارلامالارىنا وزگەرىس ەنگىزۋ، «7-20-25» باعدارلاماسى بويىنشا ليميتتى الىپ تاستاۋ، «جاس وتباسى» باعدارلاماسى جايلى بىرنەشە ۇسىنىس ايتقان ەدىم. بۇل ماسەلەلەر ءالى دە وزەكتىلىگىن جوعالتقان ەمەس. «7-20-25» باعدارلاماسى اينالاسىندا جەمقورلىق از ەمەس. باعدارلاما ارقىلى ءۇي الۋ ءۇشىن پارا بەرۋشىلەر دە كوبەيىپ وتىر»، - دەدى داۋلەت مۇقايەۆ ءماجىلىس وتىرىسىندا ونەركاسىپ جانە قۇرىلىس مينيسترىنە ساۋال جولداپ.

سونىمەن قاتار حالىق قالاۋلىسى جاستاردى تۇرعىندى ۇيمەن ماسەلەسىن دە كوتەردى.

«رەسپۋبليكالىق جاستارعا ارنالعان مەملەكەتتىك باعدارلامانىڭ قاجەتتىگى ارتۋدا. ەلىمىزدە باسپانا باعىتىندا قانداي جۇمىستار اتقارىلۋدا؟ پرەزيدەنتىمىز «وتباسى بانكتىڭ» قىزمەتىن قايتا قاراۋدى، وبلىس ورتالىقتارىنا ەمەس، اۋداندارعا، مونوقالالارعا جانە اۋىلدارعا باسىمدىق بەرۋ كەرەك دەگەن ەدى. وزگەرىس قاشان بولادى؟ قاشان حالىققا ءتيىمدى قولجەتىمدى باعدارلاما ىسكە قوسىلادى؟ بۇگىن «7-20-25» - كە ليميت اشىلدى. 5 مينۋتتا ءبىتتى دە قالدى. وقىرمانداردان «بۇل نە دەگەن سۇمدىق» دەگەن حاتتار كەلىپ جاتىر. «مەنەن بانك مەنەدجەرى 1 ميلليون 400 مىڭ سۇرادى»، «مەنەن 700 مىڭ تەڭگە سۇرادى» دەگەن حاتتار جولدادى. بۇل قاشان توقتايدى؟»، - دەيدى ول.

ونەركاسىپ جانە قۇرىلىس ءمينيسترى قانات شارلاپايەۆ حالىقتى تۇرعىن ۇيمەن قامتۋدا مەملەكەتتىك باعدارلامالار ىسكە اسىپ جاتىر.

«ەڭ الدىمەن، مۇنداي ۇلكەن ماسەلەنى ءبىر جاۋاپپەن ايتا المايمىن. ءبىراق، سىزگە بىرنەشە فاكتى كەلتىرەيىن. مىسالى، بيىل مەملەكەت 10 مىڭ پاتەر بەردى. وعان 105 ميلليارد تەڭگە ءبولىندى. كەلەسى جىلعا دا جوسپارىمىز بار. ەكىنشى ماسەلە، مەملەكەت باسشىسىنىڭ تاپسىرماسى بويىنشا وتكەن جىلى جالعا الۋدى جەڭىلدەتۋ ءۇشىن سۋبسيديالاۋ باعدارلاماسى ىسكە اسىرىلدى. تاعى باسقا باعدارلاما بويىنشا مەملەكەت قاراجات ءبولىپ جاتىر. ءوزىڭىز بىلەسىز، بارلىق حالىقتى باسپانامەن قامتۋ ەتۋ وڭاي ەمەس. ەگەر ۋاقىتىڭىز بولسا بىرگە وتىرىپ، بارلىق باعدارلامانى بىرگە قارايىق»، - دەيدى ۆەدومستۆو باسشىسى.

سوڭعى جاڭالىقتار