نۇرسۇلتان نازاربايەۆ Glencore International AG كومپانياسىنىڭ باسشىلىعىمەن كەزدەستى
ەلباسى Glencore International AG كومپانياسىنىڭ باسشىسى ايۆان گلازەنبەرگكە قازاقستاننىڭ تاۋ-كەن ونەركاسىبىن دامىتۋعا قوسقان ۇلەسى ءۇشىن ريزاشىلىعىن ءبىلدىردى.
قازاقستاننىڭ تۇڭعىش پرەزيدەنتى نەگىزگى ينۆەستورى Glencore International AG بولىپ تابىلاتىن «قازمىرىش» جاۋاپكەرشىلىگى شەكتەۋلى سەرىكتەستىگىنىڭ ءتيىمدى جۇمىسىن اتاپ ءوتتى.
- جيىرما جىلعا جۋىق ۋاقىت تابىستى جۇمىس ىستەگەننەن كەيىن ءسىز كومپانيا باسشىسى لاۋازىمىنان كەتىپ جاتىرسىز. ءبىزدىڭ ءتيىمدى ىنتىماقتاستىعىمىز مەملەكەت بيۋجەتىنە قوماقتى كىرىس اكەلدى. وسى ۋاقىت ىشىندە كومپانيانىڭ وندىرىستىك كورسەتكىشتەرى ايتارلىقتاي ۇلعايدى، - دەدى نۇرسۇلتان نازاربايەۆ.
سونداي-اق ەلباسى «قازمىرىش» كاسىپورنى ءوڭىردىڭ ەكولوگيالىق جانە الەۋمەتتىك ماسەلەلەرىن شەشۋگە بەلسەنە اتسالىسىپ جۇرگەنىنە توقتالدى.
- پاندەميا سالدارىنان تۋىنداعان قازىرگى قيىن جاعدايدا حالىققا قولداۋ كورسەتىپ، جۇمىس ورىندارىن ساقتاۋدى جانە الەۋمەتتىك ماسەلەلەردى شەشۋدى جالعاستىرا بەرۋدى سۇرايمىز. جالپى وسى باعىتتا سىزدەردىڭ كومپانيالارىڭىز ەلىمىز بويىنشا كوشباسشىلاردىڭ ءبىرى بولىپ سانالادى، - دەدى قازاقستاننىڭ تۇڭعىش پرەزيدەنتى.
ءوز كەزەگىندە ا. گلازەنبەرگ نۇرسۇلتان نازاربايەۆقا تاۋ-كەن سالاسى ەڭبەككەرلەرىنە كورسەتكەن قولداۋى ءۇشىن، سونداي-اق تاۋەلسىزدىك جىلدارىندا ەلدە قولايلى ينۆەستيتسيالىق كليمات قالىپتاستىرعانى ءۇشىن العىسىن ءبىلدىردى.
- قازاقستان - تاۋ-كەن سالاسىنداعى ينۆەستورلار ءۇشىن ەڭ سەنىمدى ءارى قاۋىپسىز ەلدەردىڭ ءبىرى. Glencore جۇمىس ىستەيتىن باسقا ەلدەردەن ەرەكشەلىگى، قازاقستاندا ينۆەستورلارعا قاتىستى زاڭناما مەن سالىق رەجيمى تۇراقتى، ساياسي رەجيم سەنىمدى ءارى ورنىقتى.
چيليدە، پەرۋدە سالىق وزگەرەدى، افريكادا ۇنەمى ءبارى قۇبىلمالى، ءتىپتى اۆستراليادا دا وزگەرىس بولىپ تۇرادى. قازاقستاندا تۇسىنىكتى، قاراپايىم ءارى وزگەرمەيتىن ەرەجەلەر بار. بۇل الاڭسىز جۇمىس ىستەپ، ينۆەستيتسيانى ارتتىرۋعا مۇمكىندىك بەرەدى، - دەدى ا. گلازەنبەرگ.
