فۋتبولدان ۇلتتار ليگاسى: بۇگىن قازاقستان قۇراماسى العاشقى ويىنىندا نورۆەگيامەن كەزدەسەدى
استانا. KAZINFORM - بۇگىن، 6 -قىركۇيەكتە قازاقستان قۇراماسى UEFA ۇلتتار ليگاسىنداعى العاشقى ويىنىن نورۆەگياعا قارسى وتكىزەدى.
ەل قۇراماسى в ليگاسى ءۇشىنشى توبىندا نورۆەگيا، سلوۆەنيا جانە اۆستريا قۇرامالارىمەن سىنعا تۇسەدى.
كەزدەسۋ قازاقستاندىق ۋاقىتپەن 19:00-دە باستالىپ، «Qazsport» تەلەارناسىنان تىكەلەي ەفيردە كورسەتىلەدى.
اتالعان ويىندا نيدەرلاند ەلىنەن كەلگەن اللارد ليندحاۋت باس تورەشى مىندەتىن اتقارادى. وعان وتانداستارى يووست ۆان زۋيلەن مەن روگير حونيگ كومەكشىلىك جاسايدى. ءتورتىنشى تورەشى دە سول ەلدىڭ وكىلى الەكس بوس.
ءوز تاريحىندا ەكى قۇراما العاش رەت شەبەرلىك بايقاسادى.
قازاقستان قۇراماسى ساپىندا ماكسيم سامورودوۆ، رامازان ورازوۆ سىندى فۋتبولشىلار جاراقاتىنا بايلانىستى بۇگىنگى ويىنعا قاتىسا الماۋى مۇمكىن. بۇل كەزدەسۋ رەسەيلىك مامان ستانيسلاۆ چەرچەسوۆتىڭ ءوز قىزمەتىندەگى العاشقى ويىنى بولماق.
ال نورۆەگيا ساپىندا بارلىق نەگىزگى ويىنشىلار الداعى كەزدەسۋگە ساقاداي ساي. ولاردىڭ قاتارىندا الەم فۋتبولىنىڭ جارىق جۇلدىزدارى ەرلينگ حولاند («مانچەستەر سيتي»، انگليا) پەن مارتين ەدەگور («ارسەنال»، انگليا) بار.
ايتا كەتسەك، قازاقستاندىق فۋتبولشىلار ۇلتتار ليگاسىندا ءتورتىنشى مارتە باق سىنايدى. قازىرگە دەيىن 20 كەزدەسۋدە 7 مارتە جەڭىسكە جەتىپ، 5 مارتە تەڭ ويناسا، 8-دە قارسىلاسىنا ەسە جىبەردى.
2022/23 -جىلعى ماۋسىمدا C ليگاسىندا ازەربايجان، سلوۆاكيا، بەلارۋستى ارتتا قالدىرىپ، в ليگاسىندا باق سىناۋعا مۇمكىندىك الدى.
اۆتور
ءادىلجان ۇمبەت
