فرانسۋزشا سويلەپ تۇرسىڭ با؟: چەرچەسوۆ قازاقشا سۇراق قويعان جۋرناليسكە وسىلاي جاۋاپ بەردى
استانا. KAZINFORM - فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆ كەزەكتى رەت ءوزىنىڭ تىلشىلەرمەن تاتۋ ەمەستىگىن كورسەتتى، دەپ حابارلايدى Ulysmedia.kz.
قازاقستان فۋتبول قۇراماسىنىڭ باس باپكەرى ستانيسلاۆ چەرچەسوۆ UEFA ۇلتتار ليگاسىندا سلوۆەنياعا قارسى 0:1 ەسەبىمەن جەڭىلگەن ماتچتان كەيىن باسپا ءسوز ءماسليحاتىندا جۋرناليستىڭ قازاق تىلىندە قويعان سۇراعىنا توسىن جاۋاپ بەردى.
«سەن قازىر فرانسۋزشا سويلەپ تۇرسىڭ با؟» - دەدى چەرچەسوۆ.
مەدياساراپشى مولديار ەرگەبەكوۆ ستانيسلاۆ چەرچەسوۆ وسى ءسوزى ارقىلى ۇلت ارالىق ارازدىقتى قوزدىرىپ وتىرعانىن ايتادى.
«قازاق تىلىندە سۇراق قويعان جۋرناليستكە ءناسىلشىل تىلمەن جاۋاپ بەردى. ءبىر مەملەكەتكە كەلىپ، سول مەملەكەتتىڭ مەملەكەت تىلىنە قۇرمەت كورسەتپەۋ – ۇلت ارالىق ارازدىقتى قوزدىرۋ، ال سول ءتىلدى تۇسىنبەگەنسىپ مازاقتاۋ - ناسىلشىلدىك. سۇراق: ستانيسلاۆ چەرچەسوۆ قازاقستان رەسپۋبليكاسى زاڭى بويىنشا جاۋاپقا تارتىلا ما؟» دەپ جازدى ساراپشى فەيسبۋكتەگى پاراقشاسىندا.
بۇل ءبىرىنشى رەت ەمەس. بىرنەشە اي بۇرىن چەرچەسوۆ قازاقشا سۇراق قويعان جۋرناليسكە: «ساعان وسەتينشە جاۋاپ بەرۋگە بولا ما؟» دەپ جاۋاپ قايتارعان. كەيىنىرەك قازاقستان فۋتبول فەدەراتسياسى چەرچەسوۆتىڭ قازاق ءتىلىن ۇيرەنە باستاعانىن حابارلاعان ەدى.
سونىمەن قاتار، باپكەر بۇعان دەيىن ۇلتتىق قۇرامادا جۇمىس ىستەگەن ۋاقىتى ىشىندە قازاقستاندىق ويىنشىلاردىڭ تەگىن ءالى كۇنگە دەيىن جاتتاپ الماعانى ءۇشىن سىنعا قالعان.
ايتا كەتەيىك ماۋسىم ايىندا قازاقستان ۇلتتىق قۇراماسىنا باس باپكەرلىككە تاعايىندالعان چەرچەسوۆ ءالى بىردە-ءبىر رەت جەڭىسكە جەتكەن جوق. ۇلتتىق قۇراما جەڭىلىستەن كوز اشپاي كەلەدى.
چەرچەسوۆ دەگەن كىم؟
رەسەيلىك فۋتبول جاتتىقتىرۋشىسى، فۋتبولشى، ك س ر و جانە رەسەي قۇرامالارىنىڭ قاقپاشىسى ستانيسلاۆ سالاموۆيچ چەرچەسوۆ 1963-جىلى 2-قىركۇيەكتە سولتۇستىك وسەتيا اۆتونوميالىق كەڭەستىك سوتسياليستىك رەسپۋبليكاسىنىڭ الاگير قالاسىندا (قازىرگى سولتۇستىك وسەتيا- الانيا رەسپۋبليكاسى) دۇنيەگە كەلگەن.
2016 -جىلدىڭ 11-تامىزىندا ستانيسلاۆ چەرچەسوۆ رەسەي قۇراماسىنىڭ باس باپكەرى بولىپ تاعايىندالدى.
ونىڭ جەتەكشىلىگىمەن رەسەيلىك فۋتبولشىلار ءوز جەرىندەگى الەم چەمپيوناتىنىڭ شيرەك فينالىنا دەيىن جەتتى (2018)، ءبىراق 2021 -جىلى رەسەي قۇراماسى ەۋروپا چەمپيوناتىندا پلەي-وفف كەزەڭىنە وتە المادى، ب توبىندا سوڭعى ورىن الدى. كوماندا فينليانديا قۇراماسىن جەڭدى (1: 0) جانە بەلگيالىقتاردان (0:3) جانە داتتاردان (1:4) ۇتىلدى.
2021-جىلدىڭ 8-شىلدەسىندە ستانيسلاۆ چەرچەسوۆتىڭ فۋتبولدان رەسەي قۇراماسىنىڭ باس باپكەرى قىزمەتىنەن كەتكەنى بەلگىلى بولدى.
