فرانسيادا جۇمىستامىز، ەلدوستى قولداۋعا سۇرانىپ كەلدىك - قازاقستاندىق ازاماتتار

پاريج. KAZINFORM - فرانسيادا ءوتىپ جاتقان وليمپيادا ويىندارىندا پاريج قالاسىندا جۇمىس ىستەپ جۇرگەن ءبىر توپ قازاق ازاماتتارىن كەزدەستىرىپ قالدىق. ولار ارنايى ەلدوس سمەتوۆقا قولداۋ كورسەتۋ ءۇشىن جۇمىستارىنان سۇرانىپ، جارىسقا كەلگەندەرىن ايتىپ بەردى.

«ءبىز نەگىزى باتىس قازاقستان وبلىسىنىڭ جىگىتتەرىمىز. پاريجدە جۇمىس ىستەپ جاتقانىمىزعا 3 ايعا جۋىقتاپ قالدى. الايدا، جۇمىس ورىنىمىز قالادان اجەپتاۋىر الستا، شامامەن 50-60 شاقىرىمداي جەردە زاۆودتا ەڭبەك ەتىپ جاتىرمىز. بۇگىن، ەلدوس سمەتوۆ جارىسقا شىعاتىنىن ەستىپ، ارنايى جۇمىس ورىنىمىزدان سۇرانىپ كەلدىك. بەكەر كەلمەگەن ەكەنبىز، ەلدوستىڭ تاريحي جەڭىسىنە بىرگە كۋا بولدىق»، - دەيدى قازاق ازاماتتارى.

سونداي-اق جىگىتتەر الداعى قازاق سپورتشىلارىنىڭ جارىستارىنا تاعى دا كەلىپ، قولداۋ كورسەتۋگە دايىن ەكەندەرىن جەتكىزدى.

«ءبىز، تەك ەلدوسقا عانا ەمەس، بارلىق قازاقستاندىق سپورتشىلارعا، وتانداستارىمىزعا قولداۋ كورسەتۋگە دايىنبىز. الداعى كۇندەرى تاعى دا جارىسقا كەلەمىز. جەرلەستەرىمىزگە بارىنشا قولاۋ كورسەتۋگە، جانكۇيەر بولۋعا دايىنبىز»، - دەدى ولار.

اڭگىمە بارىسىندا قازاق ازاماتتارىنان نەگە پاريجدە جۇمىس جاساپ جاتقاندارىن، الاتىن جالاقى مولشەرىن دە سۇراپ قالدىق.

«ءبىز قازاقستاندا ءولىپ-تالىپ ءۇش اي جۇمىس جاساعانداعى تاباتىن اقشامىزدى وسىندا ءبىر ايدا تاۋىپ ءجۇرمىز. قازىرگى جۇمىسىمىز وزىمىزگە ۇنايدى. ءۇش اي كولەمىندە ەلگە ءبىر بارىپ تۇرامىز»، - دەدى جىگىتتەر.

ەستەرىڭىزگە سالا كەتەيىك، وليمپيادانىڭ العاشقى كۇنى قازاقستاندىق سپورتشىلار ەل قورجىنىنا 1 التىن، 1 قولا مەدال سالدى.

اۆتور

كۇنسۇلتان وتارباي