شىعىس قازاقستاندا حالىقارالىق بۇركىتشىلەر فەستيۆالى مارەسىنە جەتتى
وسكەمەن. KAZINFORM - شىعىس قازاقستان وبلىسى ۇلان اۋدانىنىڭ بوزانباي اۋىلىندا ورنالاسقان بۇركىت توبە الاڭىندا ءداستۇرلى حالىقارالىق «شىعىس سالبۇرىنى» بۇركىتشىلەر فەستيۆالى ءوتتى.
ەكى كۇنگە سوزىلعان فەستيۆالدە الەمنىڭ بىرنەشە ەلىنەن كەلگەن قۇسبەگىلەر سايىسقا ءتۇستى. اتاپ ايتقاندا، موڭعوليا، قىتاي، قىرعىزستان، رەسەي جانە ماجارستاننان قاتىسۋشىلار شاقىرىلعان. ش ق و تۋريزم جانە سپورت باسقارماسىنىڭ مالىمەتىنە سۇيەنسەك، بۇل شارانى وتكىزۋدەگى نەگىزگى ماقسات - قازاق حالقىنىڭ باي مادەني مۇراسىن جانداندىرىپ، ۇلتتىق سپورت پەن قۇندىلىقتاردى دارىپتەۋ ارقىلى سالاماتتى ءومىر سالتىن ناسيحاتتاۋ.
بۇركىتشىلەر قۇستاردى جەمگە، ەركىن جانە يەسىنىڭ شاقىرۋىمەن ۇشىرۋ سايىستارىندا، شىرعامەن قويان جانە تۇلكى اۋلاۋ جارىستارىندا باق سىناستى. رەسپۋبليكالىق «قۇسبەگىلىك» فەدەراتسياسىنىڭ پرەزيدەنتى بەرىك ءۋاليدىڭ ايتۋىنشا، فەستيۆال دۇنيەجۇزىلىك كوشپەندىلەر ويىندارىنىڭ جالعاسى بولعانداي.
«وسىنداي فەستيۆالدىڭ رەسپۋبليكامىزدا ءوتىپ جاتقانىنا وتە قۋانىشتىمىز. بۇل تۋريزمدى دامىتۋعا ۇلەس قوسىپ، شەتەلدىك قوناقتاردى ەلىمىزدىڭ سالت-داستۇرىمەن، تاريحىمەن تانىستىردى. بۇگىنگى فەستيۆال جوعارى دەڭگەيدە ۇيىمداستىرىلدى. پرەزيدەنت قاسىم-جومارت توقايەۆ اتاپ وتكەندەي، كوشپەندىلەر ويىندارىنىڭ باعدارلاماسىنا ەنگەن بۇل ۇلتتىق سپورت وليمپيادالىق دەڭگەيگە دە جەتۋى ءتيىس»، - دەدى بەرىك ءۋالي.
جارىس قورىتىندىسى كەلەسىدەي:
بۇركىت سالۋ:
1-ورىن ءسالىمحان ەرعازى ۇلى (جەتىسۋ وبلىسى)
2-ورىن كۇنتۋعان سەرىكبەك (استانا قالاسى)
3-ورىن ەرلان كەنجەتايەۆ (اقمولا وبلىسى)، ولجاس بەردىمۇرات (الماتى وبلىسى)
قارشىعا سايىسى:
1-ورىن ەراسىل سەرىكبەك ۇلى (استانا قالاسى)
2-ورىن ەرمۇحان بايەتباي (الماتى وبلىسى)
3-ورىن جامبىربەك بەرديار (جامبىل وبلىسى)، باباجان بەرىكبولسىن (جامبىل وبلىسى).
سۇڭقار مەن يتەلگى سالۋ:
1 جانە 2 -ورىن تاڭات وسپانقۇلوۆ (قاراعاندى وبلىسى)
3-ورىن تەمىرالى تولەگەن ۇلى (قاراعاندى وبلىسى)، يمانزايىپ ەرمەك (پاۆلودار وبلىسى).
اۆتور
تالعاتجان مۇحامەتبەك ۇلى
