شوقاننىڭ قازاسىن ەستىرتۋ
استانا. قازاقپارات - قازاقتىڭ اتاقتى عالىمى، بەلگىلى اعارتۋشى، ساياحاتشى شوقان ۋاليحانوۆ جەتىسۋدا، ايگىلى تەزەك تورەنىڭ اۋلىندا قايتىس بولادى.تەزەك تورە بۇل قازانى سوناۋ كوكشەتاۋداعى شىڭعىس سۇلتانعا ەلدىڭ باستى ادامدارى ارقىلى ەستىرتەدى.
تەزەكتىڭ بۇيىرۋىمەن جەتىسۋدان بارعان بيلەر الدىمەن اتىعاي كەلدىبەك ءبي مەن الىبەك باتىرعا كەلىپ، ودان ارى كوپ نوكەر ەرتىپ شىڭعىس سۇلتاننىڭ ۇيىنە كەلىپ تۇسەدى. كەلسە، سۇلتان ىشتەي سەسكەنىپ وتىر ەكەن. كەلدىبەك ءبي ويلى پىشىنمەن جادىراي سويلەپ:
- تورە، دۇنيەدە نە قىمبات؟ - دەيدى.
- ادام قىمبات، - دەپتى شىڭعىس.
- ادامعا نە قىمبات؟
- بالا قىمبات.
- جانسىزدا نە قىمبات ەكەن؟
- جانسىزدا قىمبات گاۋهار دەۋشى ەدى...
- تەڭىزدىڭ تۇڭعيىق تۇبىندە جاتقان سول گاۋهاردىڭ دا يەسى بولا ما؟
- ە، يەسىز دۇنيە بار دەيسىڭ بە، ءار نارسەنىڭ ەكى يەسى بار عوي.
- ەگەر وسى جاندى-جانسىز ەڭ قىمباتتىعا سول ەكى يەسى تالاسسا، قايسىسى الار ەدى؟ - دەگەندە، شىڭعىس تورە: «ەڭ كۇشتىسى، كۇشتىسى الادى» - دەپ، ءوز سانىن ءوزى ءبىر سوعىپتى دا:
- مەنىڭ گاۋهارىم مۇحاممەد-قاناپياعا تاعدىردىڭ وعى تيگەن ەكەن عوي، - دەپ وكىرە جىلاپ، جەر باۋىرلاپ جاتىپ قاپتى.
كەلدىبەك ءبي توقتاۋ ايتىپ:
- ۋا، سۇلتان، بالا سىزدىكى ەدى، باقىتى حالىقتىكى ەدى. پۇلسىز بەردى، قۇنسىز الدى، نە شارا؟! - دەپ كەمسەڭدەپ، توڭىرەگىنە كوز تاستاعاندا ۇيدەگىلەردىڭ ءبارى ەڭىرەپتى...
ازامات اقىلبەكوۆ، تالدىقورعان.
