شەتەلدىكتەر ج س ن- دى قازاقستاننىڭ شەتەلدەگى ەلشىلىكتەرىنەن الا الادى
استانا. KAZINFORM - شەتەلدىك ازاماتتار ج س ن- دى قازاقستاننىڭ شەتەلدەگى 96 ەلشىلىگى مەن كونسۋلدىعىنان الا الادى. سىرتقى ىستەر مينيسترلىگى، ىشكى ىستەر مينيسترلىگى، سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى «ق ر شەتەلدىك ۇيىمدارى ارقىلى شەتەل ازاماتتارى ءۇشىن جەكە سايكەستەندىرۋ ءنومىرىن قۇرۋ» پيلوتتىق جوباسىن ىسكە اسىرۋ تۋرالى بىرلەسكەن بۇيرىققا قول قويدى.
پيلوتتىق جوبا 2024-جىلدىڭ 13-ساۋىرىنەن 31-جەلتوقسانعا دەيىن جالعاسپاق.
بۇيرىققا سايكەس، ىلكى جوبانى ىسكە اسىرۋ الگوريتمى بەكىتىلدى. مەملەكەتتىك قىزمەت كورسەتۋ مەرزىمى - ءبىر جۇمىس كۇنى. شەتەل ازاماتىنىڭ ق ر شەتەلدەگى مەكەمەسىنە جۇگىنگەن كۇنى مەملەكەتتىك قىزمەتتى كورسەتۋ مەرزىمىنە كىرمەيدى.
مەملەكەتتىك قىزمەتتى الۋ ءۇشىن شەتەلدىك ق ر شەتەلدەگى وكىلدىگىنە ءوزى حابارلاسىپ، جەكە باسىن كۋالاندىراتىن قۇجاتتىڭ نىسانىنداعى ءوتىنىشتى جانە كوشىرمەسىن جانە سالىستىرۋ ءۇشىن ونىڭ ءتۇپنۇسقاسىن (ەگەر باسقا ءتارتىپ بەلگىلەنبەسە، جارامدى شەتەلدىك ءتولقۇجات) ۇسىنادى. بۇل رەتتە، ق ر حالىقارالىق شارتتارى ساقتالۋى ءتيىس.
«كورسەتىلەتىن قىزمەتتى الۋشىنىڭ جەكە باسىن كۋالاندىراتىن قۇجاتتا كيريلليتسا نەمەسە لاتىن قارپىندە سايكەستەندىرۋ دەرەكتەرىنىڭ (تەگى، اتى، اكەسىنىڭ اتى، تۋعان جەرى) جازۋى بولماسا نوتاريۋس كۋالاندىرعان قۇجاتتىڭ ءتيىستى اۋدارماسى قوسا بەرىلەدى»، - دەلىنگەن قۇجاتتا.
حالىققا قىزمەت كورسەتۋ ورتالىعىنىڭ بىرىكتىرىلگەن اقپارات جۇيەسىنە جسن الۋعا تۇسكەن وتىنىمدەر كوشى-قون پوليتسياسىنىڭ اقپاراتتىق جۇيەسىنە اۋدارىلادى. ىشكى ىستەر مينيسترلىگىنىڭ وپەراتورى كەلىپ تۇسكەن وتىنىشتەردى تەكسەرەدى جانە ولار دۇرىس بولعان جاعدايدا جسن الۋ ءراسىمىن جۇرگىزەدى. كەيىن حالىققا قىزمەت ورتالىعىنىڭ بىرىكتىرىلگەن اقپارات جۇيەسىنە جولدانادى. بۇدان سوڭ كونسۋل تىركەۋ كۋالىگىن باسىپ شىعارادى جانە كورسەتىلەتىن قىزمەتتى الۋشىعا بەرەدى.
«كونسۋل كورسەتىلەتىن قىزمەتتى الۋشىلارعا ج س ن الۋ تۋرالى وتىنىشتەردى راستاۋ جانە مەملەكەتتىك قىزمەت كورسەتۋ كەزىندە بەلگىلى بولعان مالىمەتتەردى زاڭسىز جاريا ەتكەنى، سونداي-اق اقپاراتتىق-كوممۋنيكاتسيالىق تەحنولوگيالار سالاسىنداعى ءبىرىڭعاي تالاپتاردى بۇزعانى ءۇشىن دەربەس جاۋاپتى بولادى»، - دەلىنگەن بۇيرىق قۇجاتىندا.
بۇل - اقپاراتتىق قاۋىپسىزدىكتى قامتاماسىز ەتۋ ءۇشىن جاسالعان قادام.
