شەتەلدىك بلوگەرلەر دۇنيەجۇزىلىك كوشپەندىلەر ويىندارىنداعى سپورت تۇرلەرىمەن تانىستى
استانا. KAZINFORM - بۇگىن «Qazaqstan» جەڭىل اتلەتيكا كەشەنىندە 5- دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكتسياسى ماماندارى شەتەلدىك بلوگەرلەرگە وتاندىق تۋريزمدى دامىتۋ پەرسپەكتيۆالارى مەن پرەزەنتاتسياسىن جانە ۇلتتىق سپورت تۇرلەرى ەلەمەنتتەرىن كورسەتتى.
ءىس-شاراعا 8 مەملەكەتتەن، اتاپ ايتقاندا، تايلاند، مالايزيا، قىتاي، ومان، تۇركيا، ازەربايجان، ۆەتنام، يتاليا جانە قىرعىزستاننان 11 شەتەلدىك بلوگەر قاتىستى. بۇل رەتتە، ق ر سىرتقى ىستەر مينيسترلىگىنىڭ دە تانىمدىق كەزدەسۋگە مۇرىندىق بولعانىن اتاپ وتكەن ءجون. قاتىسۋشىلار اراسىندا مالايزيالىق Nur Ruhainies Farehah ،Instagram-دا 1,7 ميلليون جانە TikTok-تا 738,7 مىڭ جازىلۋشىسى بار اكتريسا ءارى جۇرگىزۋشى، قىتايدان كەلگەن Wang Jianing ،Xiaohongshu ،Douyin جانە Weibo-دا ۇلكەن وقىرمانى بار فۋد- بلوگەرلەر بولدى.
ءىس-شارا اياسىندا شەتەلدىك بلوگەرلەر قازاق كۇرەسى، قۇسبەگىلىك، اسىق اتۋ، توعىزقۇمالاق، مانگالا، وۆاري، ماس-رەستلينگ جانە ساداق اتۋ سپورت تۇرلەرىمەن تانىستى.
«بۇل ءىس-شارا ەلىمىزدىڭ وڭ ءيميدجىن، تۋريستىك الەۋەتىن جانە دۇنيەجۇزىلىك كوشپەندىلەر ويىندارىن ميلليونداعان شەتەلدىك بلوگەرلەر اۋديتورياسىنا ناسيحاتتاۋعا مۇمكىندىك بەرەدى»، - دەيدى دۇنيەجۇزىلىك كوشپەندىلەر ويىندارىنداعى مادەني، عىلىمي ءىس-شارالاردى، «بىرلىك كەرۋەنى» جانە «ەتنواۋىل» جوبالارىن ۇيلەستىرۋ ءبولىمىنىڭ باس مامانى ارايلىم زيات.
تۇركيا ەلىنەن كەلگەن بلوگەر كەمال كايا كەز كەلگەن سپورتتىق جارىس كوپتەگەن ەل حالقىن جاقىنداستىرا تۇسەتىنىن اتاپ ءوتتى.
«دۇنيەجۇزىلىك كوشپەندىلەر ويىندارىنىڭ ارايلى استانا قالاسىندا ءوتۋى دۇرىس شەشىم. جىلدان-جىلعا كوركەيىپ كەلە جاتقان سۇلۋ شاھاردا سايىسۋدىڭ ءوزى مارتەبە. بۇل رەتتە، قازاقستان جارىستى جوعارى دەڭگەيدە وتكىزەتىنىنە سەنىمدىمىن»، - دەدى ول.
ايتا كەتەيىك، 8-13-قىركۇيەكتە استانا قالاسىندا 5-شى دۇنيەجۇزىلىك كوشپەندىلەر ويىندارى وتەدى. ءىس-شاراعا 89 ەلدەن 2000-نان استام سپورتشى قاتىسادى دەپ جوسپارلانىپ وتىر. دۇنيەجۇزىلىك كوشپەندىلەر ويىندارىندا بارلىعى 21 سپورت تۇرىنەن 97 مەدال جيىنتىعى ساراپقا سالىنادى.
اۆتور
ورالحان قوجانوۆ
