شەتەلدە قانشا قازاقستاندىق جازاسىن وتەپ جاتىر

استانا. KAZINFORM - بۇگىندە 1 مىڭنان استام قازاقستان ازاماتى شەت مەملەكەتتە جازاسىن وتەپ جاتىر. بۇل تۋرالى باس پروكۋروردىڭ ورىنباسارى عالىمجان قويگەلديەۆ ءمالىم ەتتى.

- 1100 دەن استام قازاقستاندىق ازامات شەتەلدە جازاسىن وتەپ جاتىر، ولاردىڭ دەنى رەسەي فەدەراتسياسىندا، - دەدى عالىمجان قويگەلديەۆ ءماجىلىس وتىرىسىنان كەيىن وتكەن باسپا ءسوز ءماسليحاتىندا.

ونىڭ ايتۋىنشا، قازاقستاندا 900 شەتەل ازاماتى جازاسىن وتەپ جاتىر.

- ءبىز قازىر قازاقستاندىقتاردى وتانعا قايتارۋ بويىنشا جۇمىس جۇرگىزىپ جاتىرمىز. ولاردىڭ كوبى ۇزاق مەرزىمگە سوتتالعاندار، ولاردى ۇستاۋعا، ياعني اسىراۋعا ايتارلىقتاي قاراجات كەتەدى. سوتتالعانداردى تاپسىرۋ تۋرالى كەلىسىم الدىمەن ادامگەرشىلىك تۇرعىدان جانە شەتەلدە جازاسىن وتەپ جاتقان وتانداستارىمىزعا كومەكتەسۋگە باعىتتالعان، - دەپ تولىقتىردى باس پروكۋروردىڭ ورىنباسارى.

ايتا كەتەيىك، بۇگىن ءماجىلىس قاتارمەن ارادا قۇقىقتىق كومەك ماسەلەسىنە قاتىستى زاڭدى قابىلدادى.

ق ر باس پروكۋرورىنىڭ ورىنباسارى عالىمجان قويگەلديەۆتىڭ ايتۋىنشا، كەلىسىم كۇدىكتىلەر مەن ايىپتالۋشىلاردىڭ كىناسىن دالەلدەۋ ءۇشىن ءتيىستى ءىس-ارەكەتتەردى قامتىپ وتىر.