شەتەلدە مۇددەمىزدى قورعايتىن زاڭگەرلەر كورپۋسى جاساقتالادى

استانا. KAZINFORM - الداعى ۋاقىتتا شەتەلدە قازاقستاننىڭ مەملەكەتتىك مۇددەلەرىن قورعاۋعا قابىلەتتى ۇلتتىق قۇزىرەتتى كادرلار كورپۋسى قالىپتاستىرىلىپ، زاڭداردى تىكەلەي قازاق تىلىندە ازىرلەۋ تاجىريبەسىن ەنگىزۋ ءۇشىن ناقتى شارالار قولعا الىنباق. Kazinform اگەنتتىگىنە سۇحبات بەرگەن ادىلەت ءمينيسترى ەرلان سارسەمبايەۆ ۆەدومستۆونىڭ جۇمىس باعىتتارى مەن ەنگىزىلەتىن جاڭاشىلدىقتار جايىندا ايتىپ بەردى.

- ەرلان جاقسىلىق ۇلى، مينيستر بولىپ تاعايىندالعانىڭىزعا كوپ ۋاقىت بولعان جوق. دەسەك تە، ۆەدومستۆو جۇمىسىن ودان ءارى جەتىلدىرۋ ءۇشىن قانداي ناقتى ءىس-شارالاردى جوسپارلاپ وتىرسىز؟ 

- سۇراعىڭىزعا راقمەت. وزدەرىڭىزگە ءمالىم، ادىلەت ورگاندارىنىڭ باستى مىندەتى - زاڭ ۇستەمدىگىن قامتاماسىز ەتۋ، ازاماتتار مەن ۇيىمداردىڭ قۇقىقتارى مەن بوستاندىقتارىن قورعاۋ، سونداي-اق مەملەكەتتىك قۇقىقتىق ساياساتتى قالىپتاستىرۋ.

جالپى بارلىق باستامالار مەن رەفورمالار، ەڭ الدىمەن ازاماتتاردىڭ يگىلىگى ءۇشىن جاسالىپ جاتىر. باستى ماقساتىمىز - ادىلەت سالاسىنداعى قىزمەتتەردى تۇسىنىكتى، اشىق ءارى قولجەتىمدى ەتۋ. وسىعان بايلانىستى كوپتەگەن پروتسەستى سيفرلاندىرۋ، قىزمەتتەردى ونلاين فورماتقا كوشىرۋ جۇمىستارى قارقىندى ءجۇرىپ جاتىر جانە بۇل باعىتتاعى جوسپارلارىمىز اۋقىمدى.

بىرىنشىدەن - زاڭ شىعارۋ پروتسەسىن زاماناۋي قۇرالداردى قولدانا وتىرىپ سيفرلاندىرۋ. بۇل وزگەرىس زاڭداردى ساپالى ازىرلەۋگە، زاڭ نورمالارىنداعى قايشىلىقتاردى جويۋعا ءارى ازاماتتاردىڭ قۇقىقتارىن ناقتى جانە ءادىل قورعاۋعا مۇمكىندىك بەرەدى.

اتالعان باعىتتا جاساندى ينتەللەكت نەگىزىندە «ادىلەت» قۇقىقتىق كەڭەسشىسى ازىرلەندى. ول ءقازىر سىناقتان ءوتىپ جاتىر. كەڭەسشى نورماتيۆتىك-قۇقىقتىق اكتىلەردى تالداۋعا جانە ازاماتتارعا قولجەتىمدى قۇقىقتىق كومەك كورسەتۋگە ارنالعان. ونىڭ باستى ەرەكشەلىگى - قۇقىقتىق سۇراقتارعا جاۋاپ بەرگەن كەزدە ول اقپاراتتى تەك اشىق ينتەرنەت كوزدەرىنەن ەمەس، ناقتى قولدانىستاعى زاڭنامادان، رەسمي نورماتيۆتىك- قۇقىقتىق اكتىلەردەن ىزدەپ، زاڭعا نەگىزدەلگەن ناقتى ءارى سەنىمدى جاۋاپ ۇسىنادى. ونى تولىقتاي ىسكە قوسقاننان كەيىنگى كەلەسى كەزەڭ - نورماتيۆتىك-قۇقىقتىق اكتىلەردى تالداۋ ارقىلى قايشىلىقتاردى ىزدەۋ، زاڭ تەحنيكاسىنا سايكەستىگىن تەكسەرۋ، بولجاۋ جانە باسقا دا فۋنكتسيونالدى ەنگىزۋ.

ەكىنشىدەن، ادىلەت ورگاندارى ۇسىناتىن قىزمەتتەردىڭ اشىقتىعى مەن قولجەتىمدىلىگىن قامتاماسىز ەتۋ ماقساتىندا ولاردى سيفرلىق فورماتقا كوشىرۋ جۇمىستارىنا باستى نازار اۋدارىلدى. اتاپ ايتساق، «E-notariat» ارقىلى تۇرعىندار ونلاين تۇردە جىلجىمايتىن مۇلىكتى راسىمدەي الادى، «Zan-komegi» پلاتفورماسى ارقىلى ازاماتتار قۇقىقتىق كەڭەسكە جەدەل قول جەتكىزەدى.

سونىمەن قاتار، سيفرلىق رەفورمالار اۆتورلىق قۇقىقتى قورعاۋ سالاسىنا دا وڭ وزگەرىستەر اكەلە باستادى. بۇرىن اۆتورلار مەن قۇقىق يەلەرى ءوز شىعارمالارىنىڭ پايدالانىلۋى مەن سىياقىسىنىڭ تولەنۋ بارىسىن تولىق باقىلاي المادى. ۇجىمدىق باسقارۋ ۇيىمدارى اراسىنداعى شارتتار قاعاز تۇرىندە جاسالىپ، راسىمدەر اشىق ەمەس ءارى ءتيىمسىز جۇرگىزىلدى. بۇل اۆتورلىق قۇقىقتى قورعاۋدا سەنىمسىزدىك پەن تۇسىنىسپەۋشىلىك تۋدىردى.

اتالعان ماسەلەلەردى شەشۋ ماقساتىندا ادىلەت مينيسترلىگى اۆتورلاردىڭ سىياقى الۋ قۇقىعىن قامتاماسىز ەتۋ ءۇشىن قۇقىقتاردى ۇجىمدىق باسقارۋ جۇيەسىن سيفرلاندىرۋدى قولعا الدى. قازپاتەنت بازاسىندا اۆتورلىق جانە ساباقتاس قۇقىقتاردى باسقارۋ جونىندەگى سيفرلىق پلاتفورما قۇرىلادى. بۇل پلاتفورمادا قۇقىق يەلەرى جانە ۇجىمدىق باسقارۋدىڭ وزگە دە تاراپتارى ونلاين فورماتتا «جەكە كابينەت» ارقىلى شارتتار جاساي الادى. سيفرلىق شارتتار نەگىزىندە پلاتفورمادا بارلىق قۇقىق يەلەرى مەن پايدالانۋشىلاردىڭ اشىق تىزىلىمدەرى قالىپتاساتىن بولادى. بۇل باستاما شىعارماشىلىقپەن اينالىساتىن تۇلعالارعا ءوز قۇقىقتارىن ءتيىمدى باسقارۋعا مۇمكىندىك بەرىپ، اۆتورلىق ەڭبەكتىڭ ءادىل وتەلۋىن قامتاماسىز ەتەدى. سونىمەن قاتار، اۆتورلىق قۇقىق سالاسىنداعى اشىقتىقتى ارتتىرىپ، قۇقىق يەلەرى مەن پايدالانۋشىلارى اراسىنداعى ءوزارا سەنىمدى نىعايتادى.

ۇشىنشىدەن، سوت اكتىلەرىنىڭ ورىندالۋ ساپاسىن جاقسارتۋ جانە ازاماتتاردىڭ بۇل پروتسەسكە دەگەن سەنىمىن ارتتىرۋدى جوسپارلاۋدامىز.

قازىرگى تاڭدا سوت ورىنداۋشىلارىنىڭ قىزمەتىنە قاتىستى سوت شەشىمدەرىنىڭ ۋاقىتىلى ورىندالماۋى، اقپاراتتىڭ جەتىسپەۋى (مىسالى ازاماتتار ءوز ءىسىنىڭ قاي ساتىدا ەكەنىن بىلە الماۋى)، زاڭسىز شەكتەۋلەر مەن ارتىق ارەكەتتەر (مىسالى مۇلىككە بۇعات قويۋ) بويىنشا ازاماتتاردان كوپتەگەن وتىنىشتەر مەن شاعىمدار كەلىپ تۇسەدى.

اتالعان ماسەلەلەردى شەشۋ جانە سوت اكتىلەرىنىڭ ورىندالۋ بارىسىن بارىنشا اشىق ءارى باقىلاۋعا قولجەتىمدى ەتۋ ءۇشىن «تاراپتار كابينەتى» دەپ اتالاتىن جاڭا سيفرلىق شەشىمدى ۇسىنامىز. جۇيە ارقىلى ءوندىرىپ الۋشى دا، بورىشكەر دە سوت ورىنداۋشىسىنىڭ ءىس- ارەكەتتەرىن ونلاين باقىلاپ، قابىلدانعان شارالار تۋرالى ناقتى اقپارات الا الادى. سونىمەن بىرگە، جۇيە ارقىلى وتىنىشتەر مەن شاعىمدار جولداۋ جانە وعان جاۋاپ الۋ مۇمكىندىگى قاراستىرىلعان. بۇل سوت ورىنداۋشىلارىنىڭ جۇمىسىنا باقىلاۋ جۇرگىزۋ جانە راسىمدەردى بارىنشا اشىق ەتۋ ماقساتىندا ەنگىزىلگەن ماڭىزدى جاڭاشىلدىق.

سونىمەن قاتار، اتقارۋ ءوندىرىسى سالاسىندا بۇگىنگى تاڭدا وڭ كورسەتكىشكە يە «روبوت سوت ورىنداۋشىسىنىڭ» قۇزىرەتىن كەڭەيتۋ جوسپاردا بار. بۇرىن جەكە تۇلعالار حابارلاما ۋاقتىلى كەلمەگەندىكتەن ايىپپۇل العانىن بىلمەي قالاتىن جاعدايلار ءجيى كەزدەسەتىن. ونىڭ ۇستىنە قارىز ۋاقىتىندا وتەلمەگەن جاعدايدا بورىشكەر جەكە سوت ورىنداۋشىسىنا ايىپپۇل سوماسىنىڭ 25 پايىزىن قوسىمشا تولەۋگە ءماجبۇر بولاتىن. ال «روبوت سوت ورىنداۋشىسى» مۇنداي قوسىمشا اقىنى تالاپ ەتپەيدى. وعان قوسا، بۇرىن ازاماتتار قارىزدى تولەگەن سوڭ، تۇبىرتەكتى جەكە سوت ورىنداۋشىعا اپارىپ، شەكتەۋدىڭ الىنۋىن كۇتۋگە ءماجبۇر ەدى. ەندى بۇل پروتسەسس اۆتوماتتاندىرىلىپ، ازامات تولەم جاساعاننان كەيىن شەكتەۋ اۆتوماتتى تۇردە الىنادى، ياعني ازاماتتار جەڭىلدەتىلگەن ءىس جۇرگىزۋ بويىنشا 80 مىڭعا (20 ا ە ك) دەيىنگى سومالاردى ءوندىرىپ الۋ كەزىندە جەكە سوت ورىنداۋشىسىنىڭ قىزمەتىنە قوسىمشا اقى تولەۋ مىندەتىنەن بوساتىلدى. ەندىگى كەزەكتە وسىنى 20 دان 40 ا ە ك-كە دەيىن كوتەرۋ جوسپارلانىپ وتىر. بۇل بورىشى بار ازاماتتاردىڭ قاراجاتىن جانە ۋاقىتىن ۇنەمدەۋ ماقساتىندا جاسالدى.

مۇنداي وزگەرىستەر، ەڭ الدىمەن ازاماتتاردىڭ ءوز قۇقىقتارىن قورعاۋداعى سەنىمدىلىگىن ارتتىرۋعا باعىتتالعان. ءبىز بۇل سالانى تەك تەحنيكالىق جاعىنان عانا ەمەس، قۇقىقتىق مادەنيەت تۇرعىسىنان دا جاڭارتۋعا ءتيىسپىز.

- كەلەسى سۇراعىم سوت ساراپتاماسى قىزمەتىنە قاتىستى بولماق. بۇل سالاعا قاتىستى قانداي دا ءبىر وزگەرىستەر بار ما؟

- سوت ساراپتاماسى - ءادىل سوت تورەلىگىنىڭ نەگىزى سانالاتىن ماڭىزدى سالا. قاي ءىستىڭ دە وبەكتيۆتى ءارى ناقتى شەشىلۋى ساراپتامانىڭ ساپاسىنا تىكەلەي بايلانىستى. سوندىقتان بۇل باعىتتا جۇرگىزىلىپ جاتقان جۇمىستاردىڭ باستى ماقساتى - زەرتتەۋلەردىڭ دالدىگى مەن بەيتاراپتىعىن قامتاماسىز ەتۋ جانە ەڭ باستىسى ازاماتتاردىڭ تولىق قۇقىعىن قورعاۋ.

بىرىنشىدەن، ءبىز سوت ساراپتاماسىن جۇرگىزۋ پروتسەسىن سيفرلاندىرۋدى قولعا الدىق. قازىرگى تاڭدا قولدانىستاعى «E-saraptama» جوباسىنا جاساندى ينتەللەكت پەن لوگيكالىق باقىلاۋ ەلەمەنتتەرى ەنگىزىلەتىن بولادى. بۇل ساراپتامانىڭ زاڭعا سايكەستىگىن تەكسەرۋگە، مەرزىمدەردى باقىلاۋعا جانە ادامي فاكتور اسەرىن ازايتۋعا مۇمكىندىك بەرەدى.

سىبايلاس جەمقورلىققا قارسى شارانىڭ ەلەمەنتى رەتىندە سوت ساراپتاماسىن سيفرلاندىرۋ، ياعني دەنساۋلىق ساقتاۋ ۇيىمدارىنىڭ اقپاراتتىق جۇيەسىمەن ينتەگراتسيالاۋ تۋرالى نورمالاردى زاڭ تۇرعىسىنان بەكىتۋ ماسەلەسى باستى نازاردا. بۇل سوت ساراپتاماسىنىڭ جەدەلدىگى مەن ساپاسىنا ايتارلىقتاي اسەر ەتەدى.

جالپى، سوت ساراپتاماسى سالاسى - جاي عانا تەحنيكالىق قىزمەت ەمەس، ول ادامنىڭ تاعدىرىنا اسەر ەتەتىن وتە ماڭىزدى تەتىك. سوندىقتان بۇل جۇيەدە ساپا جانە ازاماتتىق سەنىم باسىم بولۋى ءتيىس. وسىنى قامتاماسىز ەتۋ ءۇشىن ءبىز بارلىق دەڭگەيدە رەفورمالار جۇرگىزۋدەمىز.

- جاڭا ءوزىڭىز زاڭ شىعارۋ پروتسەستەرىنە ءبىرقاتار تىڭ وزگەرىس ەنگىزۋ جوسپارىنا توقتالىپ كەتتىڭىز. ۇكىمەتتىڭ زاڭ جوبالاۋ جۇمىستارىنىڭ بيىلعى جوسپارىندا 19 قۇجات ازىرلەۋ كوزدەلگەن ەكەن. ونىڭ ىشىندە مەملەكەتتىك، ياعني قازاق تىلىندە دايىندالىپ جاتقاندارى بار ما؟

- بۇل - وتە ماڭىزدى ءارى ورىندى سۇراق. شىن مانىندە، زاڭداردى باستاپقىدا قازاق تىلىندە جازۋ تاجىريبەسى - تاۋەلسىز ەلىمىزدىڭ رۋحاني جانە قۇقىقتىق دەربەستىگىن بىلدىرەتىن ماڭىزدى قادام. قازىرگى تاڭدا مينيسترلىك تاراپىنان زاڭداردى تىكەلەي قازاق تىلىندە ازىرلەۋ تاجىريبەسىن ەنگىزۋ ءۇشىن ناقتى شارالار قولعا الىنىپ جاتىر. بۇل باعىتتا العاشقى ناتيجەلەر دە بار.

زاڭ شىعارۋ پراكتيكاسىندا ءماتىنى بىردەن قازاق تىلىندە جازىلىپ، قابىلدانعان مىسالدار بار: «حالىقتىڭ كوشى- قونى تۋرالى» جانە «بالالاردىڭ قۇقىعىن قورعاۋ تۋرالى» زاڭدار. ولار قولدانىستا جانە زاڭنامالىق رەتتەۋ سالاسىندا وڭ باعاسىن الدى.

سوڭعى جولدارى اتقارىلىپ جاتقان جۇمىسقا توقتالا كەتسەك، 2024 -جىلى ءۇش زاڭ جوباسى گيبريد فورماتىندا تالقىلانىپ، قازاق تىلىنە سوزبە- ءسوز اۋدارىلماي، ماعىناسىنا ساي جازىلدى. ولار: «تۇركىستان قالاسىنىڭ ەرەكشە مارتەبەسى تۋرالى»، «نورما شىعارۋدى جەتىلدىرۋ» جانە «مۇراعات ماسەلەلەرى» بويىنشا زاڭ جوبالارى.

سونىمەن بىرگە، ادىلەت مينيسترلىگى دەپۋتاتتارمەن بىرلەسە وتىرىپ، 7 زاڭ جوباسىنىڭ قازاق جانە ورىس تىلىندەگى ماتىندەرىنىڭ سەمانتيكالىق سايكەستىگىن قامتاماسىز ەتۋ ماقساتىندا تالداۋ جۇمىستارىن جۇرگىزدى. تالداۋ ناتيجەلەرى بويىنشا قازىر تاعى 4 جاڭا زاڭ جوباسىنىڭ قازاق تىلىندەگى نۇسقالارىن رەداكتسيالاۋ جۇمىستارى جۇرگىزىلىپ جاتىر.

2025 -جىلعى جوسپارداعى زاڭ جوبالارى بويىنشا دا ءتيىستى ماسەلەلەر پىسىقتالادى. ءوز كەزەگىندە، نورماتيۆتىك- قۇقىقتىق اكتىلەردى قازاق تىلىندە ازىرلەنۋىنە زاڭناما تەرمينولوگياسىنىڭ قولدانىلۋى ماڭىزدى ءرول اتقارادى. بۇل تەك اۋدارمالار ساپاسىن ارتتىرۋعا عانا ەمەس، سونىمەن قاتار زاڭ شىعارۋ ۇدەرىسىندە قازاق ءتىلىنىڭ قولدانىس اياسىن كەڭەيتۋگە دە وڭ اسەرىن تيگىزەدى. وسىعان بايلانىستى قۇقىقتىق تەرميندەردىڭ ءبىرىڭعاي سوزدىگىن بەكىتۋ جۇمىسى جۇرگىزىلىپ جاتىر. ءقازىر بۇل باعىت - زاڭداردى اۋدارما ارقىلى ەمەس، باستاپقىدا مەملەكەتتىك تىلدە ساپالى دايىنداۋ. بۇل تەك ءتىل ساياساتى ءۇشىن ەمەس، قۇقىقتىق مادەنيەتتىڭ دامۋى ءۇشىن دە ۇلكەن مانگە يە. ءبىز مۇنى كەزەڭ- كەزەڭىمەن، ءبىراق جۇيەلى تۇردە ىسكە اسىرامىز.

- سوڭعى سۇراعىم مەملەكەتتىڭ مۇلىكتىك قۇقىقتارىن قورعاۋعا قاتىستى. ادىلەت مينيسترلىگى شەتەلدىك سوتتاردا ەلىمىزدىڭ مۇددەسىن قورعاۋ جۇمىستارىمەن اينالىساتىنىن بىلەمىز. وسى باعىتتا جۇرگىزىلىپ جاتقان جۇمىستارعا توقتالىپ كەتسەڭىز.

- بۇل - وتە جاۋاپتى ءارى ستراتەگيالىق باعىت. قازاقستان - حالىقارالىق ارەنادا ينۆەستيتسيالىق تارتىمدىلىعىن ساقتاۋعا مۇددەلى مەملەكەت. سوندىقتان قانداي دا ءبىر داۋلار تۋىنداعان جاعدايدا ءوزىمىزدىڭ ۇلتتىق مۇددەلەرىمىزدى كاسىبي ءارى دالەلدى تۇردە قورعاۋىمىز كەرەك.

ادىلەت مينيسترلىگى ۇكىمەتتىڭ كونسۋلتانتتارىمەن بىرلەسىپ، شەتەلدىك تورەلىكتەر مەن سوتتاردا ەلىمىزدىڭ مۇددەسىن قورعاۋدى، داۋ تاراپتارىمەن كەلىسسوزدەر جۇرگىزۋدى جانە قازاقستاننىڭ ۇستانىمىن نەعۇرلىم ءتيىمدى قورعاۋ جونىندەگى قۇقىقتىق ستراتەگيانى ازىرلەيدى، سونداي- اق داۋلاردى سوتقا دەيىنگى تارتىپپەن رەتتەۋ بويىنشا جۇمىستاردى ۇيلەستىرەدى.

قازىرگى ۋاقىتتا ادىلەت مينيسترلىگى ەۋروپالىق وداق ەلدەرى جانە ا ق ش، رەسەي فەدەراتسياسى، شۆەيتساريا جانە باسقا دا ەلدەردىڭ يۋريسديكتسيالارىنداعى شامامەن 20 ءىس بويىنشا مەملەكەتتىڭ مۇددەلەرىن قورعاۋ بويىنشا جۇمىستى جۇرگىزىپ وتىر. اتالعان داۋلاردىڭ ۇشتەن ءبىرى اياقتالۋعا جاقىن. مىسالى، «World Wide Minerals» كومپانياسىمەن داۋدا تورەلىك شەشىم قازاقستان پايداسىنا شىقتى. ناتيجەسىندە رەسپۋبليكا كومپانياعا 65 ميلليون ا ق ش دوللارىن تولەۋدەن بوساتىلىپ، كەرىسىنشە تورەلىككە كەتكەن شىعىنداردىڭ 75 پايىزىن وتەۋدى تالاپ ەتۋ مۇمكىندىگىنە يە بولدى.

سونىمەن قاتار، 2024 -جىلى 7-اقپاندا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى بەرگەن تاپسىرمالاردى ورىنداۋ اياسىندا مەملەكەتتىڭ مۇلىكتىك قۇقىقتارىن قورعاۋ سالاسىنا وتاندىق زاڭگەرلىك كومپانيالاردى ساراپشى رەتىندە تارتۋ جۇمىستارى جۇرگىزىلىپ جاتىر.

اتالعان جۇمىستاردىڭ ناتيجەسىندە شەتەلدە مەملەكەتتىك مۇددەلەردى قورعاۋعا قابىلەتتى ۇلتتىق قۇزىرەتتى كادرلار كورپۋسى قالىپتاسادى دەگەن سەنىمدەمىز. بۇدان باسقا، وتاندىق زاڭ فيرمالارىن تارتۋ سالىق تولەۋشىلەردىڭ قاراجاتىنىڭ ەل ەكونوميكاسىندا قالۋىنا ىقپال ەتەتىن بولادى. سونىمەن قاتار، قازاقستاندىق ساراپشىلاردى تارتۋ ءىرى الەمدىك زاڭ فيرمالارىنىڭ ۇقساس ۇسىنىستارىمەن سالىستىرعاندا ەداۋىر تيىمدىرەك بولماق. وسىلايشا قازاقستاننىڭ زاڭدى مۇددەلەرىن كاسىبي، شىعىنسىز جانە بەدەلدى قورعاۋدى قامتاماسىز ەتەمىز. بۇل - تەك ءبىر داۋدى شەشۋ ەمەس، ەلىمىزدىڭ بەدەلىن ينۆەستيتسيالىق بەدەلىن قورعاۋ دەگەن ءسوز.

جالپى قورىتىندىلاي كەلە، ادىلەت مينيسترلىگى ازاماتتارعا باعىتتالعان قىزمەتتەردى دامىتۋ ارقىلى قۇقىقتىق سەنىمدى نىعايتۋدى ماقسات ەتەدى. ادىلەت - ءجاي عانا جۇيە ەمەس، بۇل - ءار ازاماتتىڭ تاعدىرىنا، سەنىمىنە تىكەلەي اسەر ەتەتىن تىرەك. ءبىز جاساپ جاتقان ءار وزگەرىس، ءار قادام حالىققا جاقىن، ءادىل ءارى اشىق ادىلەت جۇيەسىن قالىپتاستىرۋعا باعىتتالعان. الداعى ۋاقىتتا دا ادىلەت جۇيەسىن جەتىلدىرۋ، ازاماتتاردىڭ قۇقىقتارىن قورعاۋ جانە حالىققا قىزمەت كورسەتۋ ساپاسىن ارتتىرۋ باعىتىندا جۇمىستارىمىزدى جالعاستىرامىز.

اۆتور

مارلان جيەمباي