شەكارادا 9 ساعات كۇتۋدىڭ ءداۋىرى اياقتالدى: قازاقستاندا نە وزگەردى
استانا. KAZINFORM - قازاقستاندا شەكاراداعى وتكىزۋ پۋنكتتەرىن جاڭعىرتۋ جۇمىستارىنىڭ ناتيجەسىندە كولىك قۇرالدارىن وتكىزۋ جانە كەدەندىك راسىمدەۋ ۋاقىتى ايتارلىقتاي قىسقاردى.
سوڭعى ءۇش جىلدا بۇل ماقساتقا 118,6 ميلليارد تەڭگە باعىتتالىپ، ءبىرقاتار وتكىزۋ پۋنكتتەرى زاماناۋي سيفرلىق جۇيەلەرمەن جابدىقتالدى.
2025-جىلى ەاەو سىرتقى شەكاراسىنداعى 9 اۆتوموبيل وتكىزۋ پۋنكتىن جاڭعىرتۋ جۇمىستارى اياقتالدى. وسى جىلدىڭ قازان ايىندا قازاق-وزبەك شەكاراسىنداعى «جىبەك جولى» وتكىزۋ پۋنكتىن جاڭعىرتۋ جۇمىستارى اياقتالادى. سونىمەن قاتار كولىك مينيسترلىگى ە ا ە و- نىڭ ىشكى شەكارالارىندا اۆتوموبيل وتكىزۋ پۋنكتتەرىن جاڭارتۋدى جالعاستىرىپ جاتىر.
بۇگىندە قازاقستاننىڭ مەملەكەتتىك شەكاراسىندا 70 وتكىزۋ پۋنكتى جۇمىس ىستەيدى. ونىڭ 51 ءى اۆتوموبيل، 5 ءۋى تەمىرجول، 10 ى اۋە، 3 ەۋى تەڭىز پۋنكتى بولسا، 1 وتكىزۋ پۋنكتى «قورعاس» ش ى ح و اۋماعىندا ورنالاسقان. 51 اۆتوموبيل وتكىزۋ پۋنكتىنىڭ 14 ءى ە ا ە و- نىڭ سىرتقى شەكاراسىندا، تاعى 37 ءسى رەسەي مەن قىرعىزستان شەكاراسىندا ورنالاسقان.
شەكارا وتكىزۋ بەكەتتەرىن جاڭعىرتۋ ناتيجەسىندە ءۇش جىلدا شەكارادان وتۋگە كەتەتىن ۋاقىت 9 ساعاتتان 30 مينۋتقا دەيىن قىسقاردى
سوڭعى ءۇش جىلدا وتكىزۋ پۋنكتتەرىن جاڭعىرتۋعا 118,6 ميلليارد تەڭگە باعىتتالدى. وسى كەزەڭدە ە ا ە و- نىڭ سىرتقى شەكاراسىنداعى 11 اۆتوموبيل وتكىزۋ پۋنكتى جاڭارتىلدى. قۇرىلىس- مونتاجداۋ جۇمىستارى جۇرگىزىلىپ، ينفراقۇرىلىم كەڭەيتىلدى، نىساندار زاماناۋي تەكسەرۋ قۇرالدارىمەن جابدىقتالدى.
جەكەلەگەن وتكىزۋ پۋنكتتەرىندە قوزعالىس جولاقتارىنىڭ سانى 2 دەن 6 عا دەيىن كوبەيتىلدى، كىرۋ جانە شىعۋ ايماقتارى قايتا جابدىقتالدى، جۇك جانە جولاۋشىلار تاسىمالىنىڭ اعىندارى ءبولىندى. زاماناۋي ينسپەكتسيالىق-تەكسەرۋ، سالماق پەن گاباريتتى اۆتوماتتى تۇردە باقىلاۋ كەشەندەرى، رادياتسيالىق باقىلاۋ، بەينەباقىلاۋ جانە كولىك قۇرالدارىن سايكەستەندىرۋ جۇيەلەرى ورناتىلعان. تەكسەرۋدىڭ كەيبىر راسىمدەرى ۇزدىكسىز رەجيمگە اۋىستىرىلدى: قاجەتتى پارامەترلەر اۆتوكولىكتەر قوزعالىسى كەزىندە تىكەلەي تىركەلىپ، اقپاراتتىق جۇيەلەرگە اۆتوماتتى تۇردە جىبەرىلەدى.
ينفراقۇرىلىمدى كەڭەيتۋ جانە باقىلاۋدى اۆتوماتتاندىرۋ ەسەبىنەن اۆتوموبيل پۋنكتتەرىنىڭ جيىنتىق وتكىزۋ قابىلەتى جىلىنا شامامەن 2 ميلليوننان 5 ميلليونعا دەيىن ارتتى. سونىمەن قاتار جۇك كولىكتەرىن راسىمدەۋ ۋاقىتى 9 ساعاتتان 30 مينۋتقا دەيىن قىسقاردى.
وتكىزۋ پۋنكتتەرىنىڭ مۇمكىندىكتەرىن كەڭەيتۋ كولىك اعىنىنىڭ تۇراقتى وسۋىنە مۇمكىندىك بەردى. ەگەر 2022-جىلى ە ا ە و- نىڭ سىرتقى شەكاراسىنداعى اۆتوموبيل وتكىزۋ پۋنكتتەرى ارقىلى 640 مىڭعا جۋىق كولىك وتسە، 2023-جىلى ولاردىڭ سانى 1 ميلليوننان استى، 2024-جىلى 1,4 ميلليونعا جەتتى، ال 2025-جىلدىڭ قورىتىندىسى بويىنشا - 1,7 ميلليون. وسىلايشا، ءۇش جىل ىشىندە وتكەن اۆتوكولىك سانى 2,6 ەسەدەن استام ءوستى. ءوسىم 2026-جىلى دا جالعاسىپ جاتىر: 8 ايدا وتكىزۋ پۋنكتتەرى ارقىلى 1,3 ميلليونعا جۋىق كولىك ءوتتى، بۇل وتكەن جىلدىڭ سايكەس كەزەڭىمەن سالىستىرعاندا 19,3 پايىزعا ارتىق.
سيفرلىق شەشىمدەر كەدەندىك رەسىمدەۋ ۋاقىتىن 11 ساعاتتان 3,5 ساعاتقا دەيىن قىسقارتتى
ينفراقۇرىلىمدى جاڭارتۋمەن قاتار مەملەكەتتىك كىرىستەر كوميتەتى شەكارادان ءوتۋ پروتسەستەرىن سيفرلاندىرۋ جۇمىستارىن دا جۇرگىزۋدە.
KEDEN اقپاراتتىق جۇيەسىندە الدىن الا حابارلاۋ، كەدەندىك ترانزيت، دەكلاراتسيالاۋ جانە تاۋارلاردى وتكىزۋ اۆتوماتتاندىرىلعان. تاۋەكەلدەر بولماعان جاعدايدا دەكلاراتسيانى شىعارۋ تۋرالى شەشىمدى جۇيە اۆتوماتتى تۇردە ءوزى قابىلدايدى.
سيفرلىق شەشىمدەردى ەنگىزۋدىڭ ناتيجەسىندە كەدەندىك رەسىمدەۋدىڭ ورتاشا ۋاقىتى 2024-جىلعى 11 ساعاتتان 2026-جىلى 3 ساعات 30 مينۋتقا دەيىن قىسقاردى.
CarGoRuqsat ەلەكتروندىق كەزەك جۇيەسى تاسىمالداۋشىلارعا شەكارادان ءوتۋ ۋاقىتىن الدىن الا برونداۋعا جانە كولىك اعىندارىن تارقاتۋعا مۇمكىندىك بەرەدى. بۇگىنگى تاڭدا ول ارقىلى 4,5 ميلليوننان استام برونداۋ راسىمدەلدى.
سونداي-اق حالىقارالىق اۆتوموبيل تاسىمالىنا شەتەلدىك رۇقسات بلانكىلەرىن بەرۋ پروتسەسى سيفرلاندىرىلدى، جۇكتەردى سيفرلىق سۇيەمەلدەۋدى جانە تاسىمالداۋشىلار مەن مەملەكەتتىك ورگاندار اراسىندا دەرەكتەر الماسۋدى قامتاماسىز ەتەتىن Smart Cargo جۇيەسى دامىپ جاتىر.
ينتەگراتسيالانعان باقىلاۋ جۇيەسى كامەرالاردان، ينسپەكتسيالىق-تەكسەرۋ كەشەندەرىنەن، سالماق-گاباريتتى جانە رادياتسيالىق جابدىقتاردان كەلىپ تۇسەتىن مالىمەتتەردى بىرىكتىرەدى. وسىنىڭ ەسەبىنەن كولىك قۇرالىنىڭ كىرگەننەن شىققانعا دەيىنگى ءبىرىڭعاي سيفرلىق باعىتى قالىپتاستىرىلادى.
اۆتوماتتاندىرۋ تەمىرجولدا دا ەنگىزىلۋدە. قىتاي - قازاقستان - ورتالىق ازيا باعىتى بويىنشا ترانزيتتىك دەكلاراتسيالاردى اۆتوماتتى تۇردە باسىپ شىعارۋ تەتىگى جۇزەگە اسىرىلىپ جاتىر. ەگەر بۇرىن ءبىر كونتەينەرلىك پويىزدىڭ راسىمدەۋ ۋاقىتى شامامەن 3 ساعاتتى السا، اۆتوماتتاندىرىلعان شىعارىلىم ەنگىزىلگەننەن كەيىن بۇل ۋاقىت 30 مينۋتقا دەيىن قىسقاردى.
8 ايدا قازاقستان ارقىلى ترانزيتتىك تاسىمال كولەمى 19 پايىزعا ارتتى
وتكىزۋ پۋنكتتەرىن دامىتۋ قازاقستان ارقىلى ترانزيتتىك تاسىمالدار كولەمىنىڭ ۇلعايۋىمەن قاتار جۇرەدى. 2025-جىلدىڭ قورىتىندىسى بويىنشا 1,4 ميلليون ترانزيتتىك دەكلاراتسيا راسىمدەلدى. بۇل 2024-جىلمەن سالىستىرعاندا 8,6 پايىزعا ارتىق. كەدەندىك شەكارادان وتكەن جۇكتەردىڭ جالپى سالماعى 2024-جىلعى 20,3 ميلليون توننادان 2025-جىلى 23,1 ميلليون تونناعا دەيىن ءوستى.
2026-جىلدىڭ 8 ايىندا 1,1 ميلليون ترانزيتتىك دەكلاراتسيا رەسىمدەلدى. وتكەن جىلدىڭ سايكەس كەزەڭىمەن سالىستىرعاندا كورسەتكىش 19 پايىزعا ءوستى.
نەگىزگى باعىت قىتايدان ترانزيت بولىپ قالا بەرەدى. وسى جىلدىڭ 8 ايىندا قىتايدان قازاقستان ارقىلى 814,5 مىڭ دەكلاراتسيا راسىمدەلدى. وتكەن جىلدىڭ سايكەس كەزەڭىندە بۇل كورسەتكىش 655,3 مىڭدى قۇراعان.
جۇك تاسىمالىن ودان ءارى جەدەلدەتۋ ءۇشىن «جاسىل ءدالىز» قاعيداتى ەنگىزىلۋدە. زاماناۋي تەكسەرۋ جانە ولشەۋ جابدىقتارى ءبىرىڭعاي اۆتوماتتاندىرىلعان باقىلاۋ پروتسەسىنە بىرىكتىرىلەدى، الدىن الا حابارلاۋ جانە «ءبىر تەرەزە» قاعيداتى قولدانىلادى.
كەلەسى كەزەڭ - جۇكتەردى رەسىمدەۋ كەزىندە سەرىكتەس ەلدەردىڭ ەكسپورتتىق جانە ترانزيتتىك دەكلاراتسيالارىنىڭ دەرەكتەرىن اۆتوماتتى پايدالانۋدى كوزدەيتىن «كەدەرگىسىز ترانزيت» جوباسى بولماق.
وتكىزۋ پۋنكتتەرىندە سەرۆيستىك جانە تەلەكوممۋنيكاتسيالىق ينفراقۇرىلىم دامىتىلۋدا
اۆتوموبيلمەن جۇك تاسىمالداۋشىلار ءۇشىن جاعداي جاساۋعا ەرەكشە كوڭىل بولىنۋدە.
قازاق-قىتاي ۋچاسكەسىندە كولىك-لوگيستيكالىق ورتالىقتار، ۋاقىتشا ساقتاۋ قويمالارى مەن اۆتوحابتار جۇمىس ىستەيدى. جۇك كولىكتەرىنە ارنالعان كۇتۋ ايماقتارى مەن تۇراقتار وتكىزۋ پۋنكتتەرىنەن تىس جەرلەرگە ورنالاستىرىلۋدا. بۇل كىرمە جولدارعا تۇسەتىن جۇكتەمەنى ازايتىپ، شەكارالىق نىسانداردىڭ ءوزىن جەڭىلدەتۋگە مۇمكىندىك بەرەدى.
ءبىر مەزگىلدە تەلەكوممۋنيكاتسيالىق ينفراقۇرىلىم جاڭعىرتىلۋدا. جاڭارتىلاتىن كەدەن بەكەتتەرىندە بايلانىس ارنالارىنىڭ وتكىزۋ قابىلەتى 165 مبيت/س- كە دەيىن ۇلعايتىلدى. 13 وتكىزۋ پۋنكتىندە شەكارا ماڭىنداعى نىسانداردا ەلەكتروندىق سەرۆيستەرگە قولجەتىمدىلىكتى قامتاماسىز ەتەتىن سپۋتنيكتىك بايلانىس پايدالانىلادى.
ىرگەلەس مەملەكەتتەرمەن جۇمىستى ۇيلەستىرۋ بويىنشا دا شارالار جۇرگىزىلۋدە. «نۇر جولى - قورعاس» باعىتىندا تاۋلىك بويى جۇمىس ىستەۋ رەجيمى ەنگىزىلگەن. قىتاي تاراپىمەن كولىكتى تاۋلىكتىك قابىلداۋدى ۇلعايتۋ جانە ينسپەكتسيالىق-تەكسەرۋ كەشەندەرىنىڭ ناتيجەلەرىن ءوزارا پايدالانۋ جونىندە ۋاعدالاستىقتارعا قول جەتكىزىلدى.
قازاق - وزبەك شەكاراسىندا جۇكتەمەگە بايلانىستى كولىك اعىندارى وتكىزۋ پۋنكتتەرى اراسىندا قايتا بولىنەدى، اۋىسىمدار كۇشەيتىلەدى جانە قابىلداناتىن جۇك كولىگىنىڭ سانى ارتادى.
ە ا ە و ىشكى شەكارالارىنداعى وتكىزۋ پۋنكتتەرىن جاڭعىرتۋ 2030-جىلعا دەيىن اياقتالادى
باعدارلامانىڭ كەلەسى كەزەڭى ەاەو ىشكى شەكارالارىنداعى اۆتوموبيل وتكىزۋ پۋنكتتەرىن جاڭارتۋمەن بايلانىستى.
شەكارا ماڭىنداعى اۋماقتاردى دامىتۋ جونىندەگى جول كارتاسىنا سايكەس 2030-جىلعا دەيىن رەسەي جانە قىرعىزستان شەكارالارىنداعى اۆتوموبيل وتكىزۋ پۋنكتتەرىن كەزەڭ-كەزەڭىمەن رەكونسترۋكتسيالاۋ كوزدەلگەن.
جۇمىس ينفراقۇرىلىمدى كەڭەيتۋگە، وتكىزۋ قابىلەتىن ودان ءارى ارتتىرۋعا، باقىلاۋدى اۆتوماتتاندىرۋعا جانە راسىمدەردى سيفرلىق فورماتقا اۋىستىرۋعا باعىتتالاتىن بولادى.
قابىلدانىپ جاتقان شارالار كەشەنى ترانزيتتىك جانە سىرتقى ساۋدا تاسىمالدارىنىڭ ودان ءارى ءوسۋىن قامتاماسىز ەتۋگە، كولىكتىڭ توقتاپ قالۋىن جانە بيزنەستىڭ لوگيستيكالىق شىعىندارىن قىسقارتۋعا، سونداي-اق قازاقستان اۋماعى ارقىلى جۇكتەردىڭ ءوتۋ جىلدامدىعى مەن بولجامدىلىعىن ارتتىرۋعا ءتيىس.
