شەكارا ماڭىنداعى اۋىلداردا قاراپايىم تۇرمىس جاعداي دا جوق - سەناتور
جوعارى ءبىلىمى بار ماماندار قاراپايىم تۇرمىستىق جاعدايدىڭ بولماۋىنا بايلانىستى اۋىلدىق جەرلەرگە بارمايدى. بۇل تۋرالى پرەمەر-مينيستر اتىنا دەپۋتاتتىق ساۋال جولداعان سەناتور ولگا بۋلاۆكينا ايتتى، دەپ حابارلايدى Kazinform.
سەناتور دەپۋتاتتىق ساۋالىندا قازاقستاننىڭ شەكارا ماڭىنداعى وڭىرلەرىنىڭ ينفراقۇرىلىمىن دامىتۋ ماسەلەلەرىن كوتەردى. ايتۋىنشا، شىعىس قازاقستان وبلىسىنىڭ 36 مىڭ حالقى بار زايسان اۋدانىندا اۋداندىق ەمحانا سالۋ قاجەت، ال كاتونقاراعاي اۋدانىندا مەديتسينالىق پۋنكت عيماراتى اۋىلدىق كلۋبتا ورنالاسقان.
«كاتونقاراعاي اۋدانىندا ۆەتەريناريا سالاسىنداعى مامانداردىڭ جىل سايىن 25-30 پايىزعا دەيىن كوشىپ كەتۋى بايقالىپ وتىر. وسى سالاداعى قىزمەتكەرلەردىڭ ءبىر بولىگىندە ارنايى ءبىلىم جوق. بۇل جاعداي شالعايداعى ءار اۋىلدا بايقالادى. جوعارى ءبىلىمى بار ماماندار قاراپايىم تۇرمىستىق جاعدايدىڭ بولماۋىنا بايلانىستى اۋىلدىق جەرلەرگە بارمايدى»، - دەدى ولگا بۋلاۆكينا.
دەپۋتات وسىعان بايلانىستى ۇكىمەت باسشىسى ءاليحان سمايىلوۆقا جاڭادان قۇرىلعان اكىمشىلىك اۋماقتاردى وڭالتۋدىڭ جول كارتاسىن ازىرلەۋدى جانە ءتيىستى قارجىسى بەكىتىلگەن ءارى ناقتى مەرزىمدەرى كورسەتىلگەن شارالاردى ىسكە اسىرۋدى ۇسىندى.
«سونىمەن قاتار كاسىپكەرلىك قىزمەت سالاسىندا ەرەكشە رەتتەۋ ساياساتىن قالىپتاستىرۋ ماقساتىندا كاسىپكەرلەر جۇكتەمەسىن ازايتۋعا باعىتتالعان باعدارلامالار كەشەنىن ازىرلەۋ قاجەت. شەكارالاس وڭىرلەردىڭ وڭىرلىك جانە ءوڭىرارالىق لوگيستيكاسىن قامتاماسىز ەتۋ ءۇشىن قاجەتتى شارالار قابىلدانۋى ءتيىس. ەكونوميكالىق دامۋدا جاڭا كاسىپورىندار مەن اۋىل شارۋاشىلىعى ءوندىرىسىن ءتيىمدى وركەندەتۋدى قولداۋعا باعىتتالاتىن ارنايى شەكارا ماڭى ايماقتارىن قۇرۋ ماسەلەسىن قاراستىرۋ كەرەك»، - دەدى سەناتور.
