ش ى ۇ- عا مۇشە ەلدەردىڭ قاۋىپسىزدىك كەڭەستەرى حاتشىلارىنىڭ كەزدەسۋى ءوتتى
استانا. KAZINFORM - شانحاي ىنتىماقتاستىق ۇيىمىنا مۇشە مەملەكەتتەردىڭ قاۋىپسىزدىك كەڭەستەرى حاتشىلارىنىڭ كەزدەسۋى ءوتتى، دەپ حابارلايدى اقوردانىڭ باسپا ءسوز قىزمەتى.
استانا قالاسىندا قازاقستان تاراپىنىڭ توراعالىعىمەن شانحاي ىنتىماقتاستىق ۇيىمىنا (ش ى ۇ) مۇشە مەملەكەتتەردىڭ قاۋىپسىزدىك كەڭەستەرى حاتشىلارىنىڭ ون توعىزىنشى كەزدەسۋى ءوتتى.
ءىس-شاراعا قازاقستان رەسپۋبليكاسى قاۋىپسىزدىك كەڭەسىنىڭ حاتشىسى عيزات نۇرداۋلەتوۆ، ءۇندىستان رەسپۋبليكاسى پرەمەر-ءمينيسترىنىڭ ۇلتتىق قاۋىپسىزدىك جونىندەگى كەڭەسشىسى ادجيت دوۆال، يران يسلام رەسپۋبليكاسىنىڭ ۇلتتىق قاۋىپسىزدىك جونىندەگى جوعارى كەڭەسىنىڭ حاتشىسى الي اكبار احماديان باباكي، قىتاي حالىق رەسپۋبليكاسى مەملەكەتتىك كەڭەسىنىڭ مۇشەسى، قوعامدىق قاۋىپسىزدىك ءمينيسترى ۆان سياوحۋن، قىرعىز رەسپۋبليكاسى قاۋىپسىزدىك كەڭەسىنىڭ حاتشىسى مارات يمانقۇلوۆ، پاكىستان يسلام رەسپۋبليكاسى پرەمەر-ءمينيسترىنىڭ كەڭسەسى جانىنداعى ۇلتتىق قاۋىپسىزدىك ءبولىمىنىڭ حاتشىسى ۆاكار احماد، رەسەي فەدەراتسياسى قاۋىپسىزدىك كەڭەسىنىڭ حاتشىسى نيكولاي پاترۋشيەۆ، تاجىكستان رەسپۋبليكاسى قاۋىپسىزدىك كەڭەسىنىڭ حاتشىسى ناسرۋللو ماحمۋدزودا، وزبەكستان رەسپۋبليكاسى پرەزيدەنتىنىڭ جانىنداعى قاۋىپسىزدىك كەڭەسىنىڭ حاتشىسى ۆيكتور ماحمۋدوۆ قاتىستى.
شانحاي ۇيىمىنىڭ تۇراقتى جۇمىس ىستەيتىن ورگاندارىنان وتىرىسقا ش ى ۇ- نىڭ باس حاتشىسى چجان مين جانە ش ى ۇ- نىڭ وڭىرلىك تەرروريزمگە قارسى قۇرىلىمىنىڭ (ءو ت ق ق) اتقارۋشى كوميتەتىنىڭ ديرەكتورى رۋسلان ميرزايەۆ، شىۇ جانىنداعى باقىلاۋشى مەملەكەتتەردەن بەلارۋس رەسپۋبليكاسى قاۋىپسىزدىك كەڭەسىنىڭ مەملەكەتتىك حاتشىسى الەكساندر ۆولفوۆيچ جانە موڭعوليا رەسپۋبليكاسى قاۋىپسىزدىك كەڭەسىنىڭ حاتشىسى بيامباجارگال التانگەرەل قاتىستى.
دەلەگاتسيا باسشىلارى ش ى ۇ- عا تولىققاندى مۇشە بولعان يرانعا، سونداي-اق الداعى ۋاقىتتا ۇيىمعا كىرەتىن بەلارۋسكە قولداۋ ءبىلدىردى.
قاۋىپسىزدىك كەڭەستەرىنىڭ حاتشىلارى تەرروريزم، سەپاراتيزم مەن ەكسترەميزم، قارۋ-جاراق پەن ەسىرتكىنىڭ زاڭسىز اينالىمى، ترانسۇلتتىق ۇيىمداسقان قىلمىسقا قارسى ءىس-قيمىل، حالىقارالىق اقپاراتتىق قاۋىپسىزدىك سالاسى بويىنشا ىنتىماقتاستىق تەتىكتەرىن ودان ءارى دامىتۋ ماسەلەلەرىن تالقىلادى.
كەزدەسۋگە قاتىسۋشىلار تەرروريزمنىڭ بارلىق ءتۇرى مەن ونىڭ بەلگىلەرىن قاتاڭ ايىپتاپ، وسى زۇلىمدىققا قارسى كۇرەستە حالىقارالىق قوعامداستىقتى جاھاندىق ىقپالداستىقتى نىعايتۋعا شاقىردى.
لاڭكەستىك، سەپاراتيزم مەن ەكسترەميزم سيپاتىنداعى قاۋىپ-قاتەرلەرگە قارسى ءىس-قيمىلدى، لاڭكەستىك ماقساتتا قولدانىلاتىن ترانسۇلتتىق ۇيىمداسقان قىلمىسقا قارسى كۇرەستى، سونىڭ ىشىندە زاڭسىز كوشى-قون ارنالارىنىڭ جولىن كەسۋ جونىندەگى ىنتىماقتاستىقتى ودان ءارى جەتىلدىرۋ قاجەت ەكەنى اتاپ ءوتىلدى.
قاۋىپسىزدىك كەڭەستەرىنىڭ حاتشىلارى وڭىرلىك قاۋىپسىزدىك پەن تۇراقتىلىقتى بىرلەسىپ قامتاماسىز ەتۋگە باسا ءمان بەرەتىنىن راستادى.
ش ى ۇ- عا مۇشە مەملەكەتتەردىڭ قاۋىپسىزدىك كەڭەستەرى حاتشىلارىنىڭ ون توعىزىنشى كەزدەسۋىنىڭ قورىتىندىسى بويىنشا حاتتاماعا قول قويىلدى.
ش ى ۇ- عا مۇشە مەملەكەتتەردىڭ قاۋىپسىزدىك كەڭەستەرى حاتشىلارىنىڭ كەلەسى كەزەكتى كەزدەسۋى 2025-جىلى قىتاي حالىق رەسپۋبليكاسىندا وتەدى.
جيىن اياسىندا قازاقستان رەسپۋبليكاسى قاۋىپسىزدىك كەڭەسىنىڭ حاتشىسى ش ى ۇ- نىڭ باس حاتشىسىمەن، سونداي-اق ءۇندىستان، يران، قىتاي، موڭعوليا دەلەگاتسيالارى باسشىلارىمەن ەكىجاقتى كەزدەسۋلەر وتكىزدى.
