ش ق و مەن اباي وبلىسىندا تۇرعىندار اشىققان ايۋلاردان ۇرەيلەنىپ وتىر
وسكەمەن. KAZINFORM - شىعىس قازاقستان مەن اباي وبلىستارىندا جاز بويى ماي قورىن جيناپ ۇلگەرمەگەن ايۋلار قىستا قالىڭ ۇيقىعا كەتپەۋى مۇمكىن. سەبەبى ولار قورەكتەنەتىن اعاشتار، جيدەكتەر، كەدر جاڭعاقتارى از ءونىم بەرگەن. بۇدان ماڭايداعى اۋىل جۇرتى زارداپ شەگەمىز بە دەپ قاۋىپتەنىپ وتىر.
شىعىس قازاقستان تۇرعىندارى كوكتەمدە ەلدىمەكەن ماڭايىن ايۋ كەزىپ جۇرگەنىن ايتىپ تالاي مارتە شاعىمدانعان ەدى. اسىرەسە ريددەر، سەرەبريانسك قالالارى، پوپەرەچنوە، ميحايلوۆكا جانە گلۋبوكوە اۋىلدارىنىڭ حالقى ءتۇز تاعىسىن كورگەندىكتەرىن ايتىپ، قۇزىرلى ورگاندارعا ءجيى حابارلاسقان. سونىڭ سالدارىنان ولار ءالى كۇنگە دەيىن تۇندە دالاعا شىعۋعا قورقىپ وتىر.
- تۇرعىنداردان ءار اپتا سايىن شاعىم تۇسەدى. جانۋارلار مەملەكەت قاراۋىندا بولعاندىقتان ولاردى تۇگەل اتىپ تاستاي المايمىز. ءبىزدىڭ ينسپەكتورلار شاعىم تۇسكەن جەرگە بارىپ، قاتتى دىبىس پەن جارىقتى قولدانۋ ارقىلى ايۋدى ۇركىتىپ، اۋىل ماڭىنان الشاقتاتۋعا تىرىسادى، - دەدى ورمان جانە اڭشىلىق جەدەل ارەكەت ەتۋ جاساعىنىڭ ينسپەكتورى ۆاديم ليتۆينەنكو.
سونداي-اق ينسپەكتور جيدەك پەن جاڭعاقتاردىڭ جەتىسپەۋشىلىگىنەن قورەك ىزدەگەن مايماق اڭ ومارتالارداعى بال قالدىقتارىنىڭ يىسىنە قاراي بەت الاتىندىعىن ايتتى. اۋىل ماڭىندا مال سويعاننان قالعان قالدىقتار دا ايۋلاردىڭ جايىلىمداعى مالعا شابۋىنا سەبەپ بولىپ جاتادى. سەرەبريانسكىدەگى بالىق سەحىنەن شىعاتىن ءيىس تە جىرتقىش اڭدى وزىنە تارتادى.
ءدال وسىنداي ماسەلە اباي وبلىسىندا دا تۋىنداپ وتىر. حالىق مايماق اڭنىڭ مازا بەرمەيتىنىن ايتىپ شاعىمداندى. اسىرەسە جارما اۋدانىنىڭ تۇرعىندارىنان ارىز-شاعىم كوپ ءتۇسىپ جاتىر. بۇعان قاتىستى Kazinform تىلشىسىنە اۋدان اكىمىنىڭ ورىنباسارى رايىم جولداسبەكوۆ جاۋاپ بەردى.
- جارما اۋدانى قالباتاۋ اۋىلىندا تامىزدا بال ومارتالارىنا قوڭىر ايۋدىڭ شابۋىلداعانى تۋرالى بىرنەشە اقپارات كەلىپ ءتۇستى. وسىعان قاتىستى جەرگىلىكتى اتقارۋشى ورگان وكىلدەرى، قۇقىق قورعاۋ ورگاندارى، ءتيىستى باسقارما باسشىلارى بىرلەسىپ، مەملەكەتتىك ۇلگىدەگى اڭشىلىق كۋالىگى بار جانە قارۋدى ساقتاۋ مەن الىپ جۇرۋگە رۇقساتى بار 28 ادامنان قۇرالعان ارنايى كوميسسيا قۇردى. بۇل كوميسسيا تۇرعىنداردان شاعىم تۇسكەن جەرگە بارۋعا ءازىر وتىر. كوكتەمدە ايۋ ءبىر ءىرى قارانى جارىپ تاستاعان. ودان وزگە مۇنداي جاعداي تىركەلگەن جوق، - دەدى ول.
جارما اۋداندىق پوليتسيا ءبولىمى الەۋمەتتىك جەلىلەر مەن مەسسەندجەرلىك چاتتاردا گەورگييەۆكا اۋىلىندا ەكى تۇرعىندى ايۋ جەپ كەتتى دەگەن جالعان اقپاراتقا قاتىستى پىكىر ءبىلدىردى.
- ەل اراسىندا گەورگيەۆكا اۋىلىندا ايۋ ەرلى-زايىپتىلارعا شابۋىل جاسادى دەگەن اقپارات تاراعان. بۇل وقيعا رەسەيدەگى گەورگييەۆكا اۋدانىندا بولعان. جارما اۋدانى قالباتاۋ اۋىلىنىڭ بۇرىنعى اتاۋىمەن شاتاسقان تۇرعىندار دۇرلىگىپ كەتتى. وسى ورايدا، پوليتسيا ءبولىمى تۇرعىنداردى شىندىققا جاناسپايتىن اقپارات تاراتپاۋعا شاقىرادى. ەگەر جالعان مالىمەت بۇقارالىق اقپارات قۇرالدارىندا نەمەسە ونلاين-پلاتفورمالاردا تاراتىلسا 3000 ا ە ك (11 ميلليون تەڭگەگە جۋىق) ايىپپۇل نەمەسە ءۇش جىلعا دەيىن باس بوستاندىعىن شەكتەۋ نە ايىرۋ جازاسى قاراستىرىلعان، - دەلىنگەن اقپاراتتا.
ەسكە سالا كەتسەك، بۇعان دەيىن س ق و-دا ەش جەردە ەسەپتە جوق 9 مىڭ گ ا ورمان القابى انىقتالعانى تۋرالى جازعان ەدىك.
