دەۆيد و'سالليۆان قازاقستان مەن ەۋرووداق اراسىندا ۆيزا رەجيمىن جەڭىلدەتۋ تۋرالى پىكىر ءبىلدىردى
استانا. KAZINFORM - ەۋروپالىق وداقتىڭ سانكسيالار جونىندەگى ارنايى وكىلى دەۆيد و'سالليۆان استانادا وتكەن باسپا ءسوز كونفەرەنسيادا قازاقستان مەن ەۋرووداق اراسىندا ۆيزا رەجيمىن جەڭىلدەتۋ تۋرالى پىكىر ءبىلدىردى.
«جالپى قازاقستان مەن ەۋروپالىق وداق اراسىنداعى قارىم-قاتىناس جاقسى دامىپ كەلەدى. ءبىز ماڭىزدى سەرىكتەس بولىپ وتىرمىز. ەۋروپالىق وداق قازاقستان ءۇشىن ءىرى ساۋدا سەرىكتەس جانە تىكەلەي شەتەلدىك ينۆەستيتسيالاردىڭ ءىرى كوزى بولىپ وتىر، سونداي-اق، ءبىز وسى سەرىكتەستىك اياسىندا ەكى اراداعى ەكونوميكالىق ارىپتەستىكتى دامىتامىز»، - دەدى ول.
ەۋروپالىق وداق وكىلى ەكى اراداعى ۆيزا رەجيمىن جەڭىلدەتۋ ماسەلەسى بويىنشا كەلىسسوز باستالعانىن اتاپ ءوتتى.
«ءبىزدىڭ ۆيزا رەجيمىن جەڭىلدەتۋ بويىنشا كەلىسسوزدى باستاعانىمىز قۋانتادى. بۇل ارىپتەستىك بايلانىستاردى ودان ءارى نىعايتۋعا ءوز سەپتىگىن تيگىزەدى»، - دەدى دەۆيد و'سالليۆان.
