دەپۋتاتتار جوعارى ءبىلىم تۋرالى 457 جالعان ديپلومدى انىقتادى

استانا. قازاقپارات - Jibek Joly تەلەارناسى «فوكۋس ۆنيمانيا» باعدارلاماسىنىڭ تىكەلەي ەفيرىندە جوعارى ءبىلىم تۋرالى ديپلومنىڭ قارا نارىعىنداعى وزەكتى ماسەلەلەر تالقىلاندى.

«جوعارى ءبىلىم تۋرالى جالعان ديپلومنىڭ 457 فاكتىسى انىقتالدى. جان-جاقتى قاراستىرعان كەزدە كوپ جاعدايدا ولاردىڭ پەداگوگتەر مەن دارىگەرلەر ەكەندىگىن كوردىك. پاۆلودار وبلىسىندا 80 فاكتىنىڭ تىركەلگەنىن انىقتادىق. ماڭعىستاۋ، سولتۇستىك قازاقستان وبلىستارىندا دا دەرەكتەر بار. ماسەلەنى ودان ارى تەرەڭدەي زەرتتەۋ بارىسىندا عىلىم جانە جوعارى ءبىلىم مينيسترلىگىندە ديپلومنىڭ ءتۇپنۇسقا ەكەندىگىن انىقتايتىن ارناۋلى سايت جۇمىس ىستەۋى تيىستىگىن بايقادىق. الايدا ول جۇمىس ىستەمەي تۇر. وسى جايتتان كەيىن دەپۋتاتتىق ساۋال تۋىندادى. ءبىز عىلىم مينيسترلىگى جۇمىستى جەدەلدەتىپ، ديپلومداردى تەكسەرۋگە قاتىستى بارلىق دەرەكتەردى ەنگىزۋىن، ال ىشكى ىستەر مينيسترلىگى سايتتاردى بۇعاتتاۋ جۇمىستارىن جۇرگىزۋىن سۇراپ وتىرمىز. ويتكەنى، ولار اشىق ساتىلىپ جاتىر. ولار قۇجاتتىڭ ءتۇپنۇسقا بولاتىندىعىنا، ءتىپتى ديپلومدى تابىستاۋ ءىس-شاراسىنا كەلىپ، الۋعا بولاتىنىن ايتىپ سەندىرەدى. مۇنان بولەك، الدىن الۋ جۇمىستارىن جۇرگىزگىمىز كەلەدى. قىلمىستىق جاۋاپكەرشىلىك بار - 7 ميلليون تەڭگە مولشەرىندە ايىپپۇل نەمەسە 4 جىلعا دەيىن باس بوستاندىعىن ايىرۋ»، - دەدى ءماجىلىس دەپۋتاتى يسلام سۇڭقار.

ونىڭ اتاپ وتۋىنشە، ماسەلە وتە وزەكتى بولىپ وتىر. سەبەبى تۇپتەپ كەلگەندە قىزمەت الۋشى، ياعني وسىنداي بىلىكسىز مامانداردان قىزمەت العاندار زارداپ شەگەدى.

 

اۆتور
مارلان جيەمباي