دەپۋتات مەديتسينالىق ۇيىمداردىڭ شىعىنعا باتۋ سەبەبىن ايتتى
استانا. KAZINFORM - مەديتسينالىق ۇيىمداردىڭ كوممۋنالدىق شىعىندارىن تاريفتەن الىپ تاستاۋ ۇسىنىلدى. بۇل ۇسىنىستى ءماجىلىس دەپۋتاتى اسحات ايماعامبەتوۆ ۇكىمەت ساعاتىندا كوتەردى.

− بۇگىندە تاريفتەردى قايتا قاراۋ مينيسترلىكتىڭ ەركىنە بايلانىستى. قالاسا - كوتەرەدى، قالاماسا - كوتەرمەيدى. مىسال رەتىندە ونكولوگياداعى بازالىق تاريفتى قىسقارتۋدى الايىق. بۇل نە بەردى؟ ەشقانداي ۇنەم بولماي، تەك دەنساۋلىققا زيان كەلدى. ۇلكەن داۋمەن تاريفتى %20 عا قىسقارتتى. ال ناتيجە قانداي بولدى؟ ەشقانداي ۇنەم بولعان جوق، كەرىسىنشە، شىعىندار ارتتى. بۇل قاتەلىك بولدى. قازىرگى تاريف مەديتسينالىق ۇيىمداردىڭ، اسىرەسە ستاتسيونارلاردىڭ ناقتى شىعىندارىن وتەمەيدى. ولار تەك جالاقى تولەۋگە جانە شۇعىل قاجەتتىلىكتەردى قامتاماسىز ەتۋگە ارەڭ جەتەدى. مەديتسينالىق ۇيىمدار «شىقپا، جانىم، شىقپانىڭ» كۇيىن كەشىپ وتىر، - دەيدى ا. ايماعامبەتوۆ.
ونىڭ ايتۋىنشا، كوممۋنالدىق قىزمەتتەردى تولەۋ شىعىندارىن تاريفتەن الىپ تاستاۋ ايتىلعانىمەن، بۇل ماسەلە ءالى كۇنگە دەيىن شەشىلگەن جوق.
− ءبىز تۇتىنۋدىڭ ەڭ تومەنگى نورمالارىن بەكىتۋ قاجەتتىلىگى تۋرالى ايتىپ كەلەمىز. كەڭەس زامانىندا سەماشكو ينستيتۋتى بولدى، نورماتيۆتەر بولدى. ال بىزدە ونداي نورماتيۆتەر جوق. ولارسىز مەديتسينالىق قىزمەتتىڭ ناقتى قۇنىن ەسەپتەۋ نەمەسە شامادان تىس تۇتىنۋ تۋرالى ايتۋ مۇمكىن ەمەس. ءدال وسى نورماتيۆتەر نەگىزىندە مەديتسينالىق قىزمەتتەردىڭ كولەمى، تاريفتەر قۇرىلىمى جانە كلينيكالىق شىعىن پارامەترلەرى قالىپتاسۋى كەرەك، - دەيدى دەپۋتات.
سونىمەن بىرگە، دەپۋتات العاشقى مەديتسينالىق-سانيتارلىق كومەك قىزمەتىنىڭ جۇمىسىن قايتا رەتتەۋ كەرەگىن ايتتى.
− قازىر بارلىق ەمحانالار، ازاماتتارعا قىزمەت كورسەتكەن-كورسەتپەگەنىنە قاراماستان، وزىنە تىركەلگەن ءار ادام ءۇشىن اي سايىن ورتا ەسەپپەن 2000 تەڭگە جان باسىنا شاققانداعى قارجىلاندىرۋ الادى. بۇل ءتاسىل ەمحانالاردى ساپالى مەديتسينالىق قىزمەت كورسەتۋگە مۇلدەم ىنتالاندىرمايدى. ەشتەڭەگە قاراماستان قاراجات بولىنەدى. كوپتەگەن مەملەكەتتىك ەمحانالار ءوز كولەمىنىڭ ەداۋىر بولىگىن جەكە جانە ۇلەستەس كلينيكالارعا سۋبمەردىگەرلىككە بەرەدى. جەكە ۇيىمدار دا شەت قالمايدى. قوردىڭ مالىمەتىنشە، مىندەتتى الەۋمەتتىك مەديتسينالىق ساقتاندىرۋ پاكەتىن جەتكىزۋشىلەرىنىڭ %60 جەكە ۇيىمدار، - دەدى ول.
جوعارى اۋديتورلىق پالاتانىڭ مالىمەتىنشە، مەملەكەتتىك تاپسىرىس ليسەنزياسى جوق، ماماندارى مەن قاجەتتى جابدىعى جوق ەمحانالارعا بەرىلگەن فاكتىلەر كوپ.
− ءبىزدىڭ ۇسىنىسىمىز - مەديتسينالىق قىزمەتتەر كولەمىن جوسپارلاۋ ادىستەمەسىن، تۇتىنۋ نورمالارىن ازىرلەۋ، تاريفتەر قالىپتاستىرۋدىڭ جاڭا ادىستەمەسىن بەكىتۋ، كوممۋنالدىق قىزمەتتەرگە جۇمسالاتىن شىعىنداردى تاريفتەردەن بولەك كورسەتۋ. مەديتسينالىق قىزمەتتەر كولەمىن سۋبمەردىگەرلىككە بەرۋ ءۇشىن ناقتى كريتەريلەر مەن شارتتاردى بەلگىلەپ، كولەمنىڭ شەكتى مولشەرىن جانە مەديتسينالىق قىزمەت تۇرلەرىن انىقتاۋ كەرەك. ليتسەنزيا بەرۋ ءراسىمىن قايتا قاراپ، ليسەنزيادان كەيىنگى باقىلاۋدى ءار 5 جىل سايىن مەملەكەتتىك اتتەستاتسيا تۇرىندە ەنگىزگەن ءجون، - دەدى ا. ايماعامبەتوۆ.
بۇعان دەيىن ا. ايماعامبەتوۆ م ءا م س- ءتىڭ قازىرگى مودەلى مەديتسينانى حالىققا قولجەتىمسىز ەتىپ، شىعىندى كوبەيتىپ، قاراجاتتىڭ ءتيىمسىز جۇمسالۋىنا اكەلگەنىن، ءبىر ادامنىڭ 82 ءتىسى «ەمدەلىپ»، 5 ايلىق بالانىڭ ءالى شىقپاعان تىستەرىن قانقۇرتتان ەمدەگەنىن ايتقان ەدى.