دەپۋتات ەڭبەككە باۋلۋ تۋراسىندا: بالالار ازىق-تۇلىك دۇكەن سورەسىندە وسەدى دەپ ويلايدى

استانا. KAZINFORM - ءماجىلىس دەپۋتاتى اناس باققوجايەۆ قالالارداعى مەكتەپ وقۋشىلارىن اۋىل شارۋاشىلىعى كورمەلەرىنە ءجيى اپارۋدى ۇسىندى.

- ءبىز كەڭەستىك كەزەڭدە مەكتەپتە وقىدىق. سول كەزدە جىل سايىن كۇزدە بالالار اۋىل شارۋاشىلىعى جۇمىستارىنا باراتىن. اۋىل تۇرعىندارى وسىنى جاقسى بىلەدى. اۋىلداعى بالالار شارۋانىڭ ءونىمدى الۋ ءۇشىن ماڭداي تەرىن توگىپ جۇرگەنىن، ءونىم قالاي الىناتىنىن بىلەدى. قازىر حالىقارالىق كونۆەنتسياعا بايلانىستى بالالاردىڭ ەڭبەگىنە تىيىم سالۋدى قابىلدادىق. ءبىراق قازىر جاستارعا قاراساق، ىسىراپشىل. دالادا كارتوپ نەمەسە ءسابىز جاتسا، جەردەن الىپ كوتەرمەيدى. سونىمەن قاتار، ازىق-تۇلىكتىڭ ءبارى ەگىستىكتە ەمەس، دۇكەن سورەسىندە وسەدى دەپ ويلايدى. سوندىقتان مەكتەپ وقۋشىلارىن، ستۋدەنتتەردى اۋىل شارۋاشىلىعىنا نەگە جۇمىلدىرمايمىز؟! جۇمىس ىستەسىن دەپ ايتىپ تۇرعان جوقپىز. ءبىراق اۋىل شارۋاشىلىعىنا قاتىستى ءتۇرلى تەگىن كورمەلەرگە بارعانى دۇرىس بولار ەدى. جىل سايىن وسىنداي 4-5 كورمە ۇيىمداستىرىلادى، - دەدى ا. باققوجايەۆ ءماجىلىستىڭ جالپى وتىرىسىندا.

ونىڭ پايىمىنشا، بالالار وسى كورمەلەردە تەحنيكامەن تانىسىپ، مالدى باعۋ جۇمىستارىنان جالپى تۇسىنىك الادى. ءوز كەزەگىندە ق ر وقۋ-اعارتۋ ۆيتسە-مينيستر ەدىل وسپان بالالاردى ەڭبەككە باۋلۋ قازىر جاڭا فورمادا جۇزەگە اسىرىلىپ جاتقانىن ايتتى.

- وقۋشىلار ەڭبەك ءپانى اياسىندا ءتالىم الىپ جاتىر. سونداي-اق مەكتەپتىڭ اينالاسىندا جىلىجايلاردى قۇرۋ بويىنشا جۇمىستى اتقارىپ وتىرمىز. وسى ءىس-شارالار تاربيە جۇمىسى باعىتىندا ۇيىمداستىرىلدى. قازىر بالالاردى اۋىل شارۋاشىلىعىنداعى دالاداعى ەڭبەككە جاپپاي تارتۋ ۇسىنىسىن قولدامايمىز. اتاپ ايتقاندا، وقۋشىلاردى ەڭبەك الاڭدارىنىڭ قىزمەتىمەن تانىستىرۋدى، كورمەلەرگە بارۋىن ۇيىمداستىرامىز، - دەدى ۆيتسە-مينيستر.

ونىڭ سوزىنە قاراعاندا، بيىل جۇمىسشى ماماندىقتار جىلى اياسىندا ءتيىستى ءىس-شارالار بەكىتىلگەن. بۇل تۇرعىدا جوعارى سىنىپ وقۋشىلارىن ءوندىرىس الاڭدارىنا الىپ بارۋ ەسكەرىلگەن.

ايتا كەتەيىك، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا قارالدى.

اۆتور

رۋسلان عابباسوۆ