دەپۋتات اۋرۋ بالانىڭ كۇتىمىنە جاۋاپتى اتا-انانى زەينەتكە ەرتە شىعارۋدى ۇسىندى
استانا. KAZINFORM - بۇگىن پارلامەنت ماجىلىسىندە مەديتسينا سالاسىنداعى ماسەلەلەردى تالقىلاۋعا ارنالعان جيىندا دەپۋتات داۋلەت مۇقايەۆ سەرەبرالدى سال اۋرۋىنا شالدىققان بالانىڭ كۇتىمىنە جاۋاپتى اتا-انانىڭ ءبىرىن زەينەتكە ەرتە شىعارۋ ۇسىنىسىن ايتتى.
«اۋتيزم، سەرەبرالدى سال اۋرۋىنا شالدىققان بالالارعا ءومىر بويى ەرەسەك ادامنىڭ كۇتىمى كەرەك. ونىڭ جانىندا ادام ءجۇرۋى قاجەت. وسىعان بايلانىستى ولاردىڭ اتا- انالارىنىڭ بىرەۋىنىڭ زەينەت جاسىن تومەندەتۋ جاعىن قاراستىرىپ وتىرسىزدار ما؟ ەڭبەك جانە حالىقتى الەۋمەتتىك قورعاۋ مينيسترلىگىمەن بىرگە كەشەندى جۇمىستى جوسپارلاپ وتىرسىزدار ما؟»،-دەپ سۇرادى د. مۇقايەۆ.
ءوز كەزەگىندە دەنساۋلىق ساقتاۋ ءمينيسترى اقمارال ءالنازاروۆا زەينەتكە بايلانىستى ءتيىستى مينيسترلىك قاراجات كولەمىن ەسەپتەۋى كەرەك ەكەنىن ايتتى.
سونىمەن قاتار وتىرىستان كەيىن تىلشىلەر مينيستردەن دەپۋتاتتىڭ اتالعان ۇسىنىسىن جۇزەگە اسىرۋ مۇمكىندىگى تۋرالى سۇرادى.
«نەگىزى ماسەلەنى زەرتتەۋگە، ۇسىنىستى قابىلداۋعا بولادى. ءبىز ۇسىنىستى قاراستىرامىز»، - دەدى ا. ءالنازاروۆا.
