«دۇرىس دەپ ويلايمىن»: شەرزات ىسىندەگى ايىپتالۋشى ءوزىنىڭ ۇرىپ-سوققانى جايلى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى سوت وتىرىسى ءوتىپ جاتىر.

بۇگىن سوتتا ايىپتالۋشى نۇربول توقتاۋبايەۆتان جاۋاپ الىنىپ جاتىر. ول ءوز سوزىندە شەرزاتتىڭ اعاسى نۇرقانات عايىپبايەۆتى تەپكەنىن راستادى.

سۋديا نۇربول توقتاۋبايەۆتان نۇرقانات عايىپبايەۆتى تەپكەن كەزدە جابىرلەنۋشى قانداي كۇيدە بولعانىن سۇرادى.

- وتىردى ما، جاتتى ما ەسىمدە جوق. كوز الدىمدا قالعان بەينەسى - بىزگە مىلتىق اتىپ، انايى سوزدەردى ايتقانى جادىمدا ساقتالىپ قالعاننان كەيىن توبەلەسۋگە شەشىم قابىلدادىم، - دەدى سوتتالۋشى.

ءارى قاراي سۋديا مەن سوتتالۋشى اراسىندا قىسقا سۇراق-جاۋاپ بولدى.

- جاڭا عانا «مىلتىقتى كىم اتقانىن كورگەن جوقپىن، تەك قانا ەستىدىم، كىم تارتىپ العانىن دا كورگەن جوقپىن» دەپ ايتتىڭىز. ەندى عايىپبايەۆ مىلتىقتى اتتى دەپ وتىرسىز، - سۋديا.

- عايىپبايەۆ مىلتىقتى اتتى. ونىڭ قولىنان تارتىپ العان ازاماتتى تانىمايمىن، - ايىپتالۋشى.

- تارتىپ الدى، ونىڭ قولىندا قارۋ جوق، عايىپبايەۆ جاتىر. ءسىز بارىپ تەپتىڭىز. ءوز ءىس-ارەكەتىڭىزدى دۇرىس دەپ ويلايسىز با؟ - سۋديا.

- دۇرىس دەپ ويلايمىن، قۇرمەتتى سوت. سەبەبى ول بىزگە مىلتىق اتتى، - ايىپتالۋشى.

- ءسىز عايىپبايەۆتى تەپتىڭىز. ال پوليتسيا قىزمەتكەرلەرى ءسىزدى ۇردى دەدىڭىز. ولاردىكى دۇرىس ەمەس پا؟ - سۋديا.

- اياۋسىزدىقپەن ۇردى، - ايىپتالۋشى.

- ال ءسىز اياۋشىلىقپەن تەپكەن جوقسىز با؟ - سۋديا.

- ول جەردە توبەلەس بولدى عوي. ال ءبىز پوليتسيا قىزمەتكەرلەرىمەن توبەلەسكەن جوقپىز، - ايىپتالۋشى.

بىلتىر 4- قازان كۇنى توبەلەستەن 16 جاستاعى جاس ءوسپىرىم قايتىس بولعانىن جازعان ەدىك.

2024 -جىلدىڭ 12- قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

2024 -جىلدىڭ جەلتوقسان ايىندا تالعار ماڭىندا شەرزات اعاسىنىڭ دەنەسى تابىلدى.

اۆتور

دوسبول اتاجان