دۇنيەجۇزىلىك كوشپەندىلەر ويىنىنا دايىندىق بارىسى تالقىلاندى
ەلوردادا تۋريزم جانە سپورت ءمينيسترى ەرمەك مارجىقپايەۆتىڭ توراعالىعىمەن 5- دۇنيەجۇزىلىك كوشپەندىلەر ويىندارىنا دايىندىق بارىسى تۋرالى كەڭەس ءوتتى، دەپ حابارلايدى Kazinform.
اتالعان ۆەدموستۆانىڭ باسپا ءسوز قىزمەتى ءمالىم ەتكەندەي، القالى جيىنعا ۇلتتىق سپورت قاۋىمداستىعىنىڭ، ۇلتتىق جانە ات سپورت تۇرلەرى ورتالىعىنىڭ، 5- دۇنيەجۇزىلىك كوشپەندىلەر ويىندارىن وتكىزۋ جونىندەگى ديرەكسياسى باسشىلىعى جانە ۇلتتىق سپورت فەدەراتسيالارىنىڭ پرەزيدەنتتەرى قاتىسىپ، اتقارىلىپ جاتقان جۇمىستارى تۋرالى بايانداما جاسادى.
جيىندا ءسوز العان ەرمەك مارجىقپايەۆ مەملەكەت باسشىسى قاسىم-جومارت توقايەۆتىڭ دۇنيەجۇزىلىك كوشپەندىلەر ويىندارىن وتكىزۋ - ەلىمىز ءۇشىن ماڭىزدى سپورتتىق ءىس-شارا ەكەنىن ەرەكشە اتاپ وتكەنىن جەتكىزدى.
«ويىنداردىڭ باستالۋىنا ءبىر جىلدان از ۋاقىت قالدى. مەملەكەت باسشىسىنىڭ تاپسىرماسىنا سايكەس، 5-دۇنيەجۇزىلىك كوشپەندىلەر ويىندارىن جوعارى دەڭگەيدە ۇيىمداستىرۋمىز قاجەت. بۇگىنگە دەيىن قانداي شارالار اتقارىلدى، الدا قانداي مىندەتتەر تۇر، سونىمەن قاتار قانداي ماسەلەلەر بار ەكەنىن انىقتاۋىمىز قاجەت. ويىندارعا دايىندىق جاعدايىنا كەلەر بولساق، ازىرگە ءىس-شارالار جوسپار بويىنشا جۇرگىزىلىپ جاتىر. ۇلتتىق سپورت تۇرلەرىنەن قۇراما كوماندالاردىڭ دايىندىعى جوعارى دەڭگەيدە ءوتۋى كەرەك. سونىمەن قاتار سپورتشىلارعا ساپالى جاعداي جاساپ، قارجى ماسەلەلەرى تولىق شەشىلۋگە ءتيىس»، - دەدى مينيستر.
V دۇنيەجۇزىلىك كوشپەندىلەر ويىندارى اياسىندا ەلىمىزگە الەمنىڭ 100-دەن استام ەلىنەن دەلەگاتسيا كەلەدى دەپ جوسپارلانعان. ويىننىڭ بىرەگەيلىگى - سپورتتىق، مادەني جانە عىلىمي باعدارلامالاردىڭ ۇشتاسۋىندا. باعدارلاماعا 20 جارىستىق جانە 10 كورنەكى سپورت ءتۇرى ەنىپ، 110 مەدال جيىنتىعى ويناتىلادى. جارىس ات سپورتى، ۇلتتىق كۇرەس، ساداق اتۋ، قۇستارمەن اڭ اۋلاۋدىڭ تۇرلەرى، ءداستۇرلى زياتكەرلىك ويىندار بويىنشا وتەدى.
قازىرگى ۋاقىتتا ءدۇبىرلى دوداعا قاتىساتىن سپورتشىلاردىڭ ءتىزىمى، 2024 -جىلعا ارنالعان سپورتتىق- بۇقارالىق ءىس- شارالاردىڭ ءبىرىڭعاي رەسپۋبليكالىق كۇنتىزبەسىنە كىرەتىن سپورت تۇرلەرى بويىنشا جارىستاردىڭ تىزبەسى بەكىتىلدى. ويىندارعا دايىندىق شەڭبەرىندە ۇلتتىق قۇراما كوماندالاردىڭ سپورتشىلارى 2024 -جىلعى قاڭتاردان باستاپ 13 حالىقارالىق، 39 جەرگىلىكتى وقۋ- جاتتىعۋ جيىندارىنا جانە 17 رەسپۋبليكالىق جانە 23 حالىقارالىق جارىسقا قاتىسادى.
ەسكە سالا كەتەيىك، 5- دۇنيەجۇزىلىك كوشپەندىلەر ويىندارى بيىل استانا تورىندە 8-14 -قىركۇيەك ارالىعىندا وتەدى.
اۆتور
كۇنسۇلتان وتارباي
