دۇنيەجۇزىلىك كوشپەندىلەر ويىنى: قازاقستان قۇراماسىنىڭ نەگىزگى قارسىلاسى

استانا. KAZINFORM - بۇگىن قازاقستان قۇراماسى ب ا ق وكىلدەرىنە ارنالعان V دۇنيەجۇزىلىك كوشپەندىلەر ويىندارى الدىنداعى اشىق وقۋ-جاتتىعۋ جيىنىن وتكىزدى. سپورتشىلار فيزيكالىق جانە تاكتيكالىق دايىندىعىن كورسەتىپ، الداعى جارىستان نە كۇتەتىنىن ايتىپ بەردى.

جاتتىعۋ «ارعىماق» ات سپورتى كەشەنىندە ءوتتى. ءبىرىنشى بولىپ قۇسبەگىلىكتەن ەل نامىسىن قورعايتىن ۇلتتىق قۇرامانىڭ مۇشەلەرى شەبەرلىگىن پاش ەتتى. ايتا كەتەيىك، قۇسبەگىلەر بۇركىت، سۇڭقار جانە قارشىعانى ىرقىنا كوندىرىپ، جۇلدەگە تالاساتىن بولادى.
ەرەجەگە سايكەس، ءار كوماندادا 9 سپورتشى بار. ءار قۇسقا ءۇش سپورتشىدان كەلەدى. بۇركىت بويىنشا قازاقستان نامىسىن اباي اۋدانىنان ەرزات بايقاداموۆ، استانالىق سەرىكبەك كۇنتۋعان جانە اتىراۋلىق ارمان قوشقاروۆ قورعايدى.
قارشىعامەن تۇركىستاندىقتار داۋرەن ارشاباي مەن باعدات كەۋنوۆ، استانالىق قۇدايبەرگەن راۋيل ۇلى جۇلدەگە تالاسىپ كورەدى.
اقمولالىق ەرلان كەنجەتايەۆ، جامبىلدىق باقداۋلەت باباجان جانە تۇركىستاندىق يبراگيم بازاربايەۆ سۇڭقارمەن توپ جارۋعا تىرىسادى.
«بۇل - V دۇنيەجۇزىلىك كوشپەندىلەر ويىندارى الدىنداعى سوڭعى وقۋ- جاتتىعۋ جيىنىمىز. جەتىنشى قىركۇيەكتە اياقتايمىز. بۇكىل تۇركى الەمىنىڭ نازارىندا بولاتىن ماڭىزدى سپورتتىق ءىس- شاراعا سپورتشىلار، ءتىپتى، قۇستار دا جان- جاقتى دايىندالدى. كۇنىنە ەكى مارتە جاتتىعۋ جۇمىستارى بەكىتىلگەن ەدى. بۇعان دەيىن الماتىدا، بۋرابايدا جاتتىعۋ جيىندارى ۇيىمداستىرىلدى»، - دەيدى قۇسبەگىلەر ۇلتتىق قۇراماسىنىڭ باس باپكەرى ارمانبەك كۇنتۋعان.
سونداي- اق بىلىكتى مامان وتاندىق سپورتشىلاردىڭ باستى قارسىلاسىن اتادى.
«بارلىق ەلدەر بىزگە باسەكەلەس، سەبەبى، ولاردىڭ ءارقايسىسى ءوز ۇلتىنىڭ نامىسىن قورعاۋعا ۇمتىلاتىنى انىق. قىرعىزستان جانە موڭعوليادان كەلگەن بۇركىتشىلەردى ەرەكشە اتاپ وتكىم كەلەدى. ءبىزدىڭ اتا- بابامىز بۇل ونەردى ۇرپاقتان-ۇرپاققا قالدىردى. ءبىز بۇل ۇلتتىق مۇرانى ماقتان تۇتامىز»، - دەدى جاتتىقتىرۋشى.
كوماندا قۇرامىندا سوڭعى جىلدارداعى رەسپۋبليكالىق چەمپيوناتتاردىڭ جەڭىمپازدارى بار. سولاردىڭ ءبىرى - قۇدايبەرگەن راۋيل ۇلى.

«مەن 8-سىنىپتان باستاپ جىرتقىش قۇستارمەن اڭ اۋلادىم. 2023 -جىلى اتىراۋ قالاسىندا وتكەن چەمپيوناتتا 3-ورىن الىپ، كوشپەندىلەر ويىندارىنا قاتىساتىن ۇلتتىق قۇراما ساپىنا ەندىم. 2013 -جىلدان بەرى قارشىعانى باپتايمىن. ارينە، جەڭىسكە سەنەمىز. ناتيجە كوبىنەسە قۇستىڭ جاعدايىنا بايلانىستى بولاتىنىن اتاپ وتكەن ءجون. ولار يەسىن دۇرىس ءتۇسىنۋى ءۇشىن دۇرىس تاماقتاندىرۋ جانە قارىم- قاتىناستى ساقتاۋ ماڭىزدى»، - دەيدى سپورتشى.
قۇسبەگىلەردەن كەيىن جامبى اتۋدىڭ شەبەرلەرى ءوز ونەرىن كورسەتتى.
ىرىكتەۋ ويىنىنىڭ قورىتىندىسى بويىنشا V دۇنيەجۇزىلىك كوشپەندىلەر ويىندارىندا ەل نامىسىن تۇركىستاندىقتار - ايتبەك سارىباي، ەرالحان ايكوز، باتىر بەكساۋىت، سونداي-اق جامبىل وبلىسىنان ابزال ت ۇلىبەكوۆ قورعايدى.
«23-تامىزدان باستاپ ارنايى الاڭدا قورىتىندى وقۋ-جاتتىعۋ جيىندارىن وتكىزىپ جاتىرمىز. جاتتىعۋ بارىسىندا باستى باسەكەلەس سانالاتىن موڭعوليا، قىتاي جانە تۇركيا سپورتشىلارىنىڭ ءادىس-تاسىلدەرىن، تاكتيكاسىن جان-جاقتى زەرتتەپ، ارنايى دايىندىق جۇرگىزدىك. الداعى ويىندارعا دايىندىق دەڭگەيى جانە پسيحولوگيالىق ازىرلىك اجەپتاۋىر ارتقانى انىق. تامىز ايىندا ەلىمىزدەگى ۇزدىك ساداقشىلاردى جيناپ، ارنايى ىرىكتەۋ وتكىزدىك. وسىلايشا، V دۇنيەجۇزىلىك كوشپەندىلەر ويىندارىندا ەلىمىزدىڭ نامىسىن مىقتىلار قورعايتىن بولادى»، - دەدى جامبى اتۋدان ۇلتتىق قۇرامانىڭ باس باپكەرى ەلدوس باداشيەۆ.
سونىمەن قاتار، دۇنيەجۇزىلىك كوشپەندىلەر ويىندارىندا Powerful Nomad بويىنشا جۇلدەگەرلەر انىقتالادى. قازاقستان قۇراماسىنىڭ قۇرامىندا قوشقار كوتەرۋدەن ەلىمىزدىڭ رەكوردشىسى، قازاقستاننىڭ رەكوردتار كىتابىنا رەسمي تۇردە ەنگەن ازامات ماقۇلبەكوۆ بار.
«بۇل جارىسقا قاتىسۋعا 17 دەن استام ەلدىڭ مىقتىلارى ءوتىنىش بىلدىرگەن. ولاردىڭ قاتارىندا يسپانيا، فرانسيا، ا ق ش، رەسەي جانە باسقا دا ەلدىڭ سپورتشىلارى بار. اتى اڭىزعا اينالعان بالۋانىمىز قاجىمۇقان سياقتى جاۋىنگەر دەگەن اتقا لايىق ەكەنىمىزدى دالەلدەۋىمىز كەرەك»، - دەدى قازاقستان رەكوردشىسى، Powerful Nomad بويىنشا ۇلتتىق قۇرامانىڭ جاتتىقتىرۋشىسى تەمىر سپاتايەۆ.
ەستەرىڭىزگە سالا كەتەيىك، V دۇنيەجۇزىلىك كوشپەندىلەر ويىندارى استانا قالاسىندا 8-13-قىركۇيەك ارالىعىندا وتەدى. ءدۇبىرلى دوداعا 89 ەلدەن 2800 سپورتشى قاتىسپاق.

اۆتور
ورالحان قوجانوۆ